Августрал 5-нний МахIачкъалаллал муниципалитетрал вакилтал бивунни Красноармейскаллал шяравун, инвестициярдал проект «Югагрохолдинг» ООО-рал теплицардал комплекс цукун буллай бурив ххал бан.

ХIасан Аьдилов
КIа объектрай комиссия хьунабавкьунни «Югагрохолдинг» ООО компаниялул куратор Шарип Шариповлул. Ганал бувсъсса куццуй, шинал ахирданийнин буван аьркин­ссар 5,5 гектарданийсса теплицарду, гай бувукун теплицарду бикIантIиссар 20 гектарданий­сса. Шариповлул бувсунни теплицардал хIакъиравугу. Ганал мукъурттийн бувну, ва теплица цIанасса ппурттуву хъанай бур яла лахъмур, ванил лахъшиву дур магъучIан диянцIа 5 метра, шивун занантIиссар гидравликалийсса аьравартту, 3 метра лахъшиврия ахънилсса ратIаван. Щин дихьлантIиссар гидропонная технологиялий, ми цинярда давуртту дуллантIиссар компьютерданул кумаграйну, ххяххиярттан дихьлантIиссар лухччинувату нанисса щин, ми марцI дуллантIиссар лавайсса даражалул технологиялул системалийну. Теплицарду гъилигу буллантIиссар мира лухччинува нанисса щин турбардавух дачин дуллай. мунийну проект таман­сса кьюркьуну дацIанцIиссар.
Шарип Шариповлул мукъур­ттийн бувну, гьашину теплицарду бантIиссар 5,5 гектарданий, теплицардал рынок­райн дуллантIиссар 2500 тонна ахънил­ссаннул. Ва площадкалий тIитIинтIиссар агрономтурал кIулшиву ларай дай­сса школа.
Ва объект зун бивкIун махъ 600 зузи кIану хIасул хьунтIиссар МахIачкъаллал ва гъансса шяраваллал инсантуран.