Ноябрь зурул 5-нний ттун бавуна Ккуллал райондалийн МахIачкъалалия творчествалул зузалтрал десант най бушиву. 2014-ку шиналгу бувкIуна мукунма чIявусса творчествалул зузалт райондалийн. ТIайланма учин, къачIяву шай укунсса хъамал Ккуллал райондалий. Мунийн бувну, укунсса хъамал бувкIсса чIумал, гьай-гьай, чIявусса инсантал вайннащал хьунабакьин хъинну ххарину бучIай. Хъиннува ххуйну хьунссия чIумул хьхьичIва кказитирттай чичаварча вайннал цивппа та ва чун наниссарив.
Цукун бухьурчагу, райондалул Аьрасатнал халкьуннал аслийсса культуралул центрдануву хьуна творчествалул зузалтрал жяматращалсса хьунабакьаву. Хъамаллуравух бия: А. Къапиевлул цIанийсса Лакрал театрданул артистал, сурат дихьу Ибрагьин-Халил Супиянов, скульптор МахIаммад-Аьли Аьлиев, шаэр, чичу Космина Исрапилова.
Творчествалул зузалтрахь барчаллагь куна райондалул бакIчинал хъиривчу Чаринов МахIаммадлул.
Укунсса макьанну жущалла кIидачIлачIисса чIумал, жула дянивсса дахIавугу хъиннура ягин хъанахъиссар, ялун нанисса никирал хияллугу гьарта-гьарза хъанахъиссар. Вай жуяватур бусласисса, цалва пикри искусствалул зумуну чIюлу бувну, — увкуна ванал.
Лакрал театрданул директор ХIусайнов МахIаммадлул бувсуна цалла ккаккан дувансса программалия.
СахIналийн увккун, цалла давурттая бувсуна Ибрагьин-Халил Супияновлул. Ванал сахIналул лахъишиврий дирхьуна, махъсса шиннардий китайнал чулуха жучIанна дуркIсса, чарттай ранг дурсса щинал кумаграйну дишайсса суратру. Вайннух ябитлатисса чIумал, хIатта художникнан учин ччимур гацIана къабувчIлай бивкIхьурчагу, чIалай дия куртIсса философиялул пикрирду хIисавравун лавсун дирхьусса суратру душиву.
Ванал хъирив тамашачитурал хьхьичIун увккуна чIярусса шинну Дянивмур Азиянал хIукуматирттай зий гьан дурсса скульптор МахIаммад-Аьли Аьлиев. Ванал бувсуна Дагъусттаннайн зана хьуну махъ дуршиву Гъумучиял Мазукъурувсса ПартIу-ПатIимал, МахIачкъалаллал аэропортрайсса, Ваччавсса, Ярославрайсса АхIмад-Хан Султаннул, МахIачкъалалив МахIаммадссалам Оьмахановлул, Расул ХIамзатовлул гьайкаллу. Р. ХIамзатовлул гьайкал дурну махъ ванан дуллуну дур Дагъусттаннал паччахIлугърал премиягу. Ванал кIицI бувна утти СССР-данул Виричу ЦIаххуй Маккаевлун гьайкал дувансса пикри бушиву, Аллагьнал кабакьирча.
Лакрал театрданул артистурал ккаккан бунни пьесардавасса парчри, балайрду увкуна ХIажиаьли ХIажиаьлиевлул, Луиза Шагьдиловал, Саният Рамазановал, Халисат Батирбековал.
Райондалул жяматращал хьунабакьин бувкIун бия 12 луттирал автор, Шахьуйннал шяравасса Космина Исрапилова. Ванил бувсуна цилла творчествалия ва бувккуна цаппарасса шеърирду.
Ва давривух гьуртту хьуна Ккуллал райондалул культуралул зузалтгу. Балайрду увкуна Саманият Аьлиевал, Зульфия Даллаевал, Шавлухъ СалихIовал, Гриша Ванатиевлул.