Цашиврул кьини жула билаятрай яла жагьилмур байран дур, цурдагу Лакку улк­лун щиннияргу язисса, цанчирча Лаккуй хьуну тIий мунил дайдихьу. Дурусну ххюра шинал хьхьичI кIий, Надир-шагьнал аьрал ххит буккан бувну 270 шин там шаврил юбилейран хасну, му талатавриву ххувшаву ларсъсса Да­гъусттаннал аьралуннал бакIрай ивкIсса Хан-Муртазааьлил гьайкал тIитIаврийну. Муния мукьах гьар шинал ларайсса сакиншиннарай дувайссар ва байран Ла­ккуй. Байран архIалла хас дай­ссар Дагъусттаннал аьрщарая къачагътурал кьюкьри лихъа дуккан дурсса кьинилунгу.
Цашиврул кьини – му дур Дагъусттаннал оьрмулуву ца яла яргсса ва бюхттулсса тарихрая бусласисса байран. Му тарихрал чIапIи тIитIлай бухьувкун, Лак­рал райондалул бакIчи Юсуп МахIаммадовлул маслихIат був­ссар байрандалийн райондалул къуллугъчитал аслийсса миллат­рал янналуву буккаван гьаршинал, жула ппухълу дакIнийн бичиншиврул, аьпа учиншиврул, тайннал лажин ва журат ялун нанисса никирангу ккаккан даншиврул.
Байрандалий гьуртту хьунни райондалул бакIчитал, идарарттал каялувчитал ва зузалт, райондалул школарттал учительтал ва дуклаки оьрчIру :
Хан-Муртазааьлил гьай­кал­данучIа тIутIал шалкри бивхьуну махъ байран барча дуллай, райондалул бакIчинал хъиривчу Абакар Къюннуевлул увкуна:
— ХIурмат бусса ватанлувтал зущал цинявннащала нагу хъинну пахрулий ура сайки шанна ттуршукулул хьхьичI жула аьрщарай Надир-шагьнал аьрал ххит буккан бувсса ппухълуннал чувшиврия ва къучагъшиврия. Цумурцагу миллатрал тарихраву хьуссар яргсса ишру, буссар тарихраву цIа кьариртсса инсантал, миллатрал вирттал. Амма Дагъусттаннал циняв­ппагу миллатирттал яла кьимат бюхттулмур хъусну гьарзаманнай диркIссар ва дикIантIиссар жула цашиву.
Та заманнай гьарцагу миллат ялапар хъанай бивкIссар цала-цала аьдатирттай, амма жува цинявппагу цачIун буллай бивкIссару дусшиврул ва уссушиврул аьдатирттал. Гьамин, ми аьдатру гьануну хьуссар ­оьсса кьинирдай дагъусттаннал агьлу лахIан къабитан. Жулла аьдатирттал агьамшиву хIакьинусса кьинигу хъуннассар,
Байрандалун хас бувсса цала гьарта-гьарзасса ихтилатраву Ккурккуллал школалул директор Даниял Магьдиевлул увкуна:
— Надир-шагьнал цала увкуну бивкIссар: «Хан-Муртазааьли кунмасса вирттал бусса кIанттул аьрщарайн ца ттупанг битарчагума щалла аьрщи щаран дикIай, урттура кIири лагай, ка гьаз дансса хIал къаличIай,»- куну. Муртазааьлил чувшиврун лайкьну бувкссар Хъун дяъвилий талан лавгсса 180 азара дагъусттанчу, миннава сайки 90 азараксса зана къавхьуссар. 56-нная хьуссар Совет Союзрал виричу, миннавагу чIивисса лакрал миллатрава увк­ссар 5, ряххилчин Муса Маннаровгу. 1999 шинал къачагътурал кьюкьри ЦIуссалаккуйн ххярхсса чIумалгу Муслим Да­ххаев бакIчину буккан бувссар оькъав­ку хъамал. Мутай Исяевлуя ва Халид Мурачуевлуя хьуссар Аьра­сатнал вирттал. Да­гъусттаннал цашивугу, уссушивугу жуйра ялув къадурхIуссар, му тарихраву, зунттаву буттал буттахъал чирчусса дусшивур, цашивур. Къашайссар тачIав бух бан дагъусттаннал миллатру.
Муния махъ райондалул магьирлугърал зузалтрал ккаккан дуруна концерт.