Март зурул 29-нний райондалул оьрчIал багъирдал тарбиячитурал дянив хьунни конкурс. Ва бяст-ччал най бия Ккуллал шяраваллил оьрчIал багъраву.

ХIажимурад ХIусайнов
Ккуллал шяраваллил оьр­чIал багъ бур хъинну марцIсса, оьрчIахь дарс дишайсса, уттубишайсса къатри дузалсса, аьркинмунил щаллу бувсса. ХIаятгу дия чIюлу дурну личIи-личIисса тIуркIурду бувайсса карусельлал, магьравасса персонажирттал. Конкурс байбишиннин ва цукун бачинтIиссарив бувсуна Ккуллал райондалул УО-лул хъунмур ХIаммакуева Альбинал.
Конкурсравух гьуртту хьуна 6 оьрчIал багърал тарбиячи. ТIайланма учин, ттун оьрчIру хъинну ххуй бивзуна, цана цалчин ххал хъанахъисса тарбиячинах ххуйну вичIи дихьлай, ганал суаллан жавабру дуллай бивкIшиврийну. Вайннал хъазамирттай лачIун дурну дия цIарду чирчусса бейджругу. Цалчин цила дарс дишаврил пагьму-гьунар ккаккан бувна Вихьуллал оьрчIал багърал тарбиячи Халилова Аьйшал. Ванил цилла дарс дайдирхьуна кулпат щийн учайссарив, гивун цу уххайссарив буслай. Яла, оьрчIан цила бувсмур дакIний ливчIун бурив цIухлай, кулпатраятусса ихтилатру бувна. ОьрчI ва душ бусса, дирхьусса сурат кка­ккан дуллай, ганий гай ци зий бу­ссарив, тIабиаьтрал ци чIун ду­ссарив, гайннал лагма ци дуссарив цIухлахисса суаллу буллай, оьрчIан чIалачIимур цуксса ххуйну лаласлай бурив кIул буллай бия. ОьрчIайх гьивчру бавчIуну, цIувххуна цукунсса рангирал бикIайссарив гьивчру. ОьрчIал бувсуна щюллисса, хъахъисса, ятIулсса ва цаймигу рангирдал бикIайшиву гьивчру. ТIабиаьтравусса жанаварт ва ичIаллил хIайвант оьрчIан кIулну бикIаншиврул, ссигъри буллай, цIувххуна ссигъравусса хIайвантрая. Буниялагу, оьрчIан хъинну ххуйну кIулну бия жанаварт ва ичIаллил хIайвантру.
Вайва оьрчIахь дарс дирхьуна Ккуллал шяраваллил оьрчIал багърал тарбиячи МахIаммадова Динаятлул. Ванил дарс хас дурну дия интдайдихьулул кьинирдан. ОьрчIру лагма лаган бувну, дянив бия интдайдихьулул аьдатран ккаллисса «къувтIи». ОьрчIал бувсуна интдайдирхьусса чIумал тIабиаьтраву ур­тту хъанай, дараччи тIутIив чантIа тIун дикIайшиву, кьинирду гъилисса хъанан дикIайшиву, кIинттул лаххайсса гъилисса лаххия лир­ккун, куклусса лаххия лаххайшиву, хъуру дугьан инсантал къурдарав буккайшиву. Динаятлул був­ккуна оьрчIахь мукунма интнин хас бувсса МахIаммад-Загьид Аминовлул шеъригу. Бувсуна оьрчIал хъуруннай бугьайшиву къама, нувщи, чIикIунтIа, калан ва цаймигу гьаннарду. ЧIирайн лахъан дур­сса, тIабиаьтравусса 4 шин ккаккан дуллалисса суратру ккаккан дуллалиний, гайннуй ци хъанахъиссарив бувсуна оьрчIал.
ЧIяйннал багърал тарбиячи КьурбанмахIаммадова Самиржигьаннул дарс хас дурну дия щинан. Ванил бувсуна оьрчIахь щин дакъа инсаннаща яхьун къашайшиву. Щин аьркиншиву дукра дуван, хIачIан, ичIаллил хIайвантран хIачIан, багъравусса мурхьирдайн дишин, янна шюшин, тIабиаьтраву шайсса циняв ххяххиярттан, вахIшисса жанавартран ва цаймигу иширттан. Бувсуна мукунма оьрчIахь щин дикIайшиву цIу бусса ва цIу бакъасса. ПутIирду буллуну, оьрчIру цIупIатIи бувну щин, бусласи бувна гай цалла ххал дуллалисса щин цIу бусса ва бакъасса дуссарив кIул дуван. Глобус ккаккан буллай, бувсуна чув буссарив хьхьирирду ва океанну. Бувсуна хьхьири, океан ссайн чайссарив. ХIатта жулла лагма щин чIярусса духьурчагу, хIачIансса щин дузал къахъана­хъисса кIанттугу дунияллий бушиву кIицI бувна.
Ккуллал шяраваллил оьрчIал багърал тарбиячи ХIусайнова Изал дихьлахьисса дарс дия вацIлул жанавартран буккин лахьхьин буллали­сса. Дарсирай гьуртту хъана­хъисса оьрчIру цала кьабакIирттавун лавххун бия оьрватIул, ццацкIуллул, цулкIлул, бурцIил, цухьлул ва цаймигу жанавартрал нетIри. Лагьсса столданий бивхьусса чIаплува личIи дуван багьлай бия «жанаварт­ран» цалла дукайсса дукия. Гай ца-кIи-шан тIий ккалайгу бия. Буллуна тарбиячинал оьрчIахьхьун чIявусса ссигъригу. Хъинну ххуйну жаваб­ру дуллай бия оьрчIру. Ва дарс нанисса кIану чув буссарив кIулну бикIаншиврул, лагмара дирхьуну дия мурхьирдал суратру. КъавтIун бивзуна, балайрду увкуна, цаймигу тIуркIурду бувна оьрчIал.
Хъусращиял шяраваллил багърал тарбиячи Сулиева Шамайл дарс хас дурну дия физкультуралун. ОьрчIру, шалкка бувну, анаварну, хIурхIа, къис бивкIун щябивкIун, лечлачи бувна. ЛичIи-личIисса физкультуралул дарсирай бувай­сса упражненияртту буллали бувна. КIивагу чулух шалкри бусса, чIан дакъа дарвагравух буклаки бувна. Ккуртлуйх, тIабиаьтраву хьунабакьайсса чIивисса къатIуйх тIанкIатIи бувна. Бия цаймигу тIуркIурду.
Вихьуллал шяраваллил оьрчIал багърал тарбиячи АхIмадова Хха­ссул дарс хас дурну дия, кIи ларгун, инт дуркIсса чIумал тIабиаьтраву хъанахъисса дахханашивурттан. Вайннуя буслай, оьрчIал кIицI бувна инттухунмай левххун бучIайшиву личIи-личIисса лелуххант. ЖучIара кIи дутайссагу бусса бувсуна лелуххант. Бувсуна оьрчIал жучIава кIи дутлатисса лелуххант ккашил къахьун дичайшиву къатта-къушливасса ххиличIрурду. Увкуна оьрчIал интнин хас бувсса балайрдугу. Буниялагу, дарсру мукун ххуйну, бусласимур кувнницIун кув бавхIуну бувчIинну буслай бияхха, дия ва ишираву шеъриятрал чIярусса лагрурдугу. Конкурсрал ахирданий жюрилул жям дур­сса чIумал кIул хьуна ххув хьуминнал цIарду: 1-мур кIану бувгьуна ЧIяйннал шяраваллил багърал тарбиячи КьурбанмахIаммадова Самиржигьаннул; 2-мур кIану – Хъусращиял шяраваллил оьрчIал багърал тарбиячи Сулиева Шамайл; 3-мур кIану – Ккуллал шяраваллил оьрчIал багърал тарбиячи ХIусайнова Изал. Вайннан ХIаммакуева Альбинал буллуна дипломру.