Июнь зурул 1-нний кIицI лагайсса ОьрчIру буруччаврил кьини хъуннасса, тяхъасса байран дунни ЦIуссалакрал райондалийгу.
Ва кьини ЦIуссалакрал шяравусса майданнив райондалул администрациялул, Культуралул ва КIулшиву дулаврил управлениярттал, оьрчIал искусствалул школардал цачIуну хIасул дурну дия оьрчIан диялсса дялахъру. Шяраваллил дянивсса майдан бия байрандалун хасну, шарду, ттугъру лавхъун, чIюлу бувну. Мукунна шикку дия «Мы за мир», «Нет терроризму» цIанилусса, райондалийсса школарттал оьрчIал каруннал дурсса суратирттал, выставкардугу.
Кьинибархан шяраваллил майданнив най дия оьрчIал коллективирдал сакин дурсса балайрдал ва къавтIавурттал концерт. Байран хъиннура чIюлу дунни ЦIуссалакрал шяраваллил «Буратино», ЦIуссаккуллал шяраваллил «Дюймовочка», ЦIуссачIурттащиял «Радуга» тIисса оьрчIал багъирдал хIадур дурсса концертирттал. Шикку гьуртту хьусса цинявппагу мюрщи оьрчIан райондалул администрациялул чулуха дуллунни бахшишру. Му бакъассагу, райондалул культуралул къатлул зузалтралгу оьрчIру тяхъа бансса балайрду увкунни. Дунни оьрчIал дянив жура-журасса викторинарду, конкурсру, спортрал бяст-ччаллу, велогонкарду, аьдатравун дагьсса, оьрчIан ххира хьусса, асфальтрай суратру дишаврил конкурс. Шиккура ккаккан дунни тренер Н. Айдановлул хIадур бувсса чIава боксертурал лачIун буккавуртту. Вай цинявппагу конкурсирдаву ва цаймигу бяст-ччаллаву ххув хьуминнан дуллунни бахшишру.
Байрандалий гьуртту хьунни ЦIуссалакрал райондалул администрациялул хъунама ХIажи Айдиев, райондалул шяраваллал бакIчитал, оьрчIру ва миннал нину-ппу. Райондалул администрациялул чулуха оьрчIру байрандалущал барча буллалисса, миннан талихI-тирхханну чIа тIутIисса ихтилат бунни ЦIуссалакрал райондалул администрациялул бакIчинал хъиривчу Земфира Джиржисовал.
