Ссуттил яла хайр буми ахъулсса цумири? Гьивч, клюква, къавахъ, лаччи, кIялажавж, нувщи, калан, дарчин, иссиявт, пастернак. Вайри ссуттил яла инсаннан хайр бусса, канан аьркинсса ахъулсса ва ахънилсса. Мурхьирдая кьатI хъанай, хъахъи чIапIал бартбису хьуну щялу дахьлаган дайхту, чIун дуркIссар жуннагу кIинттулнинсса хIадуршинна дансса, ахъулсса, ахънилсса канай, жулла иммунносистема цIакь дансса.
БацIанну личIи-личIину гьарцагу ахъулссаннуй.
Гьивчуву чIявусса флавоноидру буссар ва гужсса антиоксидантри. Вай (флавоноидру) инфекциялущал, аллергиялущал талан бикIайссар, бурчул куц ххуй байссар. Букияра гьантлун гьивч, кIюрххилссаннун ягу дукралул дянив, зун хIакин аьркин къахьунтIиссар.
Клюква хъинну тIин ххуйсса, щинтасса ахъулссар, антиоксидантрал аваданссар, къюкIлил бювчIунбишив цIакь байссар, дурухлурдая инсан урувччуну итайссар.
Къавахъраву чIявуссар антиоксидантру, бета-каротин, витамин С, фолиевая кислота. Къавахърал хъувараву чIявуссар цинк, омега -3.
Лаччуву буссар аллицин, му вирусирттащал, бактериярдащал талан дикIайссар. Оьккимур холестерин чан байссар, дурухлурдая (рак) буруччайссар.
КIялажавж (имбирь) бивчуну чяй хIачIларча, хъугьу лагь шайссар, хъинссар аьвкъу-гъили хьусса, кьакьари, лякьа цIуцIисса инсаннан.
Пастернакраву чIявусса клетчатка буссар, витамин С, железо, кальций буссар.
Кольраби (каландалул ца жура) (цIана супермаркетирттаву бахлай бур) гьутрурду марцI байссар, аллергиялущал, инфекциялущал талан бикIайссар, дукра лялиян дайссар, ттиликIран хъинссар, железо, бета-каротин, кальций, медь, витамин С буссар.
Нувщи аваданссар бета-каротиндалул, С витаминдалул, иммунная система цIакь дайссар, аьвкъу-гъили хьуний хъинссар, ххуйну лялияйссар, кьавс хьусса инсаннан кумаг байссар.
Дарчин аьвкъу-гъили хьусса, хъугьу тIисса инсаннан хъинну хъинссар, мукунма диареялунгу хъинссар. Дарчиндалул инсан таза айссар, мунияту дичияра дарчин гьарца канакимунивун, чяйлуя байбивхьуну пирожныйлийн бияннин.
Иссиявтгу хъинну инсаннан аьркинсса, агьамсса ссуттилсса пряностьри. Иссиявт дукралувун бичирча, дукра ххуйну лялияйссар, бактериярду, вирусру литIун байссар, хъугьулун, аьвкъу-гъили хьусса инсаннан хъинну хъинссар.
ЦIуллуну битаннав
Т. ХIажиева
