Гъумук кIичIиртту марцI бунни ччюрклицIа, кIяла бунни мурхьру.
Субботникрай администрациялул зузалтрацIун цачIун хьунни идарарттал зузалтгу. «Сирень Победы» тIисса Ххувшаврил юбилейран хас бувсса акциялул лагрулуву бувгьунни сиреньдалул къатIри.
Райондалул администрациялул бакIчи Абакар Къюннуевлул мукъурттийну учин, субботник хьунни куннай кув бавкьуну. «ХIакьину жу дугьарду тIутIив, сиреньдалул къатIри. Райондалул агьалинайнгу оьвтIий буру цалва-цалва къатрал лагмахаллугу лавкьуну, щюллишиву дугьияра, тIий. МарцIшиву дуруччаву гьарца кьинисса къайгъуну хьун аьркинссар цумацаннангу. Ххувшаврил кьининийн гьарца нюжмардий субботникру дуллан ккаккан бувну бувссар райондалий», — увкунни ванал.
Райондалий мурхьру бугьаврих хъуннасса къулагъас ттинингу дуссия. Багъирдал шинал райондалул бакIчи Юсуп МахIаммадовлул тапшур бунни ахъулсса шайсса мурхьру чIяву бан ва паччахIххуллул тия-шия вахIшийсса мурхьру бугьан.
