Июль зурул 28-нний, ДР-лул БакIчинал хIукмулийн бувну, 2013 шинал элмулул, техникалул, литературалул, публицистикалул, искусствалул ва архитектуралул аралуву хьхьичIун ливчуминнан дуллунни Республикалул ПаччахIлугърал премияртту.
Имара Саидова
Литературалул аралуву Республикалул ПаччахIлугърал премияртту дуллунни «Сердце матери» тIисса шеърирдал луттирал автор АхIмад Джачаевлун ва «Ахульго» тIисса романдалул автор Шяпи Казиевлун.
Публицистикалул аралуву Республикалул ПаччахIлугърал премиялун лайкь хьунни «Был такой город. Махачкала» тIисса луттирал автортал Светлана Анохина ва Полина Санаева.
Театрданул искусствалул ва кинорал аралувусса Республикалул ПаччахIлугърал премиялун лайкь хьунни «Многонациональный театр Дагестана. Очерки истории», «Актерское искусство Дагестана», «Фольклор в драматургии и театральном искусстве Дагестана» тIисса луттирдахлу Гулизар Султанова.
2008-2013 шиннардий музыкалул искусствалул, концертрал ва хореографиялул аралувусса премиялун лайкь хьунни МахIаммадтIагьир Курачев.
Изобразительный искусствалул, архитектуралул ва строительствалул аралувусса ПаччахIлугърал премиялун лайкь хьунни Дагъусттаннал Халкьуннал шаэр Расул ХIамзатовлул скульптуралул гьайкал дурсса автортал МахIаммадаьли Аьлиев ва Руслан Умалатов.
Элмулул ва техникалул аралувусса Республикалул ПаччахIлугърал премия дуллунни «Торпедное оружие» тIисса луттирал 7 томрал автортуран: Шамил Аьлиевлун ва Юрий Жуковлун. Вара аралувусса премиярттан лайкь хьунни «Внутренние болезни» тIисса 3 томрайсса луттирал автор Наби Чамсуттинов, Расул ХIамзатовлул пасихIсса мазрал калимартту цачIун дурну сакин бувсса словарьданул автортал Марина АхIмадова, Жарият Аьбдулманапова, МахIач МахIаммадханов.
Республикалул хIукуматрал 5 миллион арцул итабакьинтIиссар, гьарица премиялун 500 азарда къуруш дулун.
