Лакрал райондалул администрациялул актовый залдануву хьунни райондалул депутатътурал ирглийсса сессия. Муний гьуртту хьунни райондалул бакIчи Юсуп МахIаммадов, ванал хъиривчутал, депутатътал, идарарттал каялувчитал, школарттал директортал.

Собрание тIигу-тIиртIуну, дачин дурну ия депутатътурал собраниялул хъунама Шамил Абачараев.
Цалчин ххалбигьлагьисса суал бия Республикалул БакIчи Рамазан АьбдуллатIиповлул Халкьуннал Мажлисрал депутатътурайнсса Рисала.
Ва суалданул ялув ихтилат бувуна Юсуп МахIаммадовлул.
«Республикалул БакIчинал Рисала – му бур республикалул политикалул ва жяматрал оьрмулийн, социал-экономика хьхьичIуннай шаврийн, криминал тагьарданийн багьай­сса агьамсса документ. Махъсса шиннардий республикалий хIасул хьусса тагьарданун мяълумсса кьимат бищаврицIун, Рамазан АьбдуллатIиповлул ккаккан бунни му тагьар ххуй дансса ххуллурдугу. Му Рисалалуву бувсунни махъсса шиннардий дурсса давурттая. Хъунмур чIурчIаву дурунни терроризмалущал талатаврий. Республикалул мюхчаншиву дуруччин властьрал, низам дуруччай органнал ва жяматрал аьмну».
Рисалалул ялув ихтилатру ялагу бунни КIулшиву дулаврил управлениялул каялувчи Явсупи ХIамзаевлул ва «Ххяххабаргъ» кказитрал редактор Мусалав Мусалаевлул.
Махъру лахълахъиминнал ихтилатирттахгу вичIидирхьуну, залдануву щябивкIминнал буллу­сса суаллугу ххал бивгьуну, депутатътурал цазумуну хъинчулий ккавккунни ва Рисалалуву Да­гъусттан Республика хьхьичIуннай дан ккаккан був­сса ххуллурду.
Муния махъ Юсуп МахIам­мадовлул дуллуна ларгсса шинал дурсса даврил отчет. Бувсуна ларгсса шинаву райондалий хьусса хьхьичIуннайшивурттая, хьхьичI бивхьунни цIу-цIусса мурадругу. Хаснува Юсуп Ма­хIаммадов авцIуна социал аралий, кIулшиву дулаврил, цIуллу-сагъшиву дуруччаврил, магьирлугърал ва спортрал суаллай.
Ларгсса шинал низам дуру­ччай аралуву дурсса давурттая балжину бувсунни Аьрасатнал МВД-лул «Лакский» МО-лул каялувчинал хъиривчу Закир МухIадовлул.
Райондалул администрациялул структуралийн багьайсса суалданул ялув депутатътурал цазумуну хъинчулий ккавккунни райондалул бакIчинал хъиривчуну ва мунищала архIал экономикалул ва шяраваллил хозяйствалул отделданул каялувчину Кьадиев Макьсуд итан.
Мукунма депутатътурал хIук­му бунни 2016 шинайннинсса райондалул бюджетраву дахханашиннарду дан.