Декабрь зурул 25-нний ЦIуссалакрал райондалийсса ЦIуссалакрал гимназиялий шадлугърал даражалий барча бунни «ХIакьинумур бувчIиншиврул ва бучIантIимургу чIаланшиврул кIулну битан лавгмур» тIисса республикалул ССУЗ-ирттал ва школардал дуклаки оьрчIал дянивсса викториналий хьхьичIунсса кIанттурду бувгьусса оьрчIру.
Имара Саидова
ДакIнийн бутанну, май зурул 18-нний МахIачкъалалив «Аьрасат – ттул тарих» музейраву 60-нния ливчусса республикалул ВУЗ-ирттал, ССУЗ-ирттал ва школарттал командартту гьуртту хьусса викториналий ЦIуссалакрал райондалул дуклаки оьрчIал кIилчинмур кIану бувгьуну бивкIшиву.
ХьхьичIунсса кIанттурду бувгьусса оьрчIру барча бан гимназиялийн бувкIун бия ЦIуссалакрал райондалул бакIчи ХIажи Айдиев, викториналул даврил сакиншинначи, ДР-лул Жагьилтурал иширттал министерствалул хьхьичIунма пишакар Муслим Хавчаев, «Единая Россия» партиялул вакил МахIаммадшяпи Сулайманов ва райондалул кIулшивуртту дулаврил идарарттал каялувчитал.
Муслим Хавчаевлул цала ихтилатраву кIицI лавгунни викторина Аьрасатнал ва Дагъусттаннал тарих куртIну кIулсса, итххявхсса оьрчIру аьлтту баву мурадрай дуллай бивкIшиву.
Финалданувун дагьсса республикалул школарттал 12 командалува личIи-личIисса номинациярттай шанма цалчинсса кIантту бувгьунни Чапаевкаллал 2-мур СОШ-рал, ЦIуссалакрал гимназиялул ва ЦIуссалакрал 1-мур СОШ-рал дуклаки оьрчIал.
