Ларгсса нюжмардий Лакрал райондалул администрациялул актовый залдануву хьунни райондалул депутатътурал ирглийсса сессия. Му бачин бувну ия райондалул бакIчи Юсуп МахIаммадов. Муний гьуртту хьунни Лакрал райондалул администрациялул бакIчи Абакар Къюннуев, мунал хъиривчутал Юсуп Рамазанов, Амсар Къажлаев, райондалул идарарттал каялувчитал ва депутатътал.

Зулайхат Тахакьаева
Сессиялий цалчин ххалбигьлагьисса суал бия «Лакский район» МР-данул Уставраву дахханашиннарду ва ххишиннарду даву. Муния ихтилат бувуна депутат АбухIанипа МахIаммадовлул.
Райондалул идарартту ссутнил ва кIинтнил чIумуйн хIадурну бушиврия бувсуна Юсуп Рамазановлул. Ванал бусаврийн бувну, сакин бувну бивкIун бур рейдру дуллансса комиссия. Август ва сентябрь зурдардий му комиссия гьарца щархъавун ва идарарттайн бивну, кIанттурдайра ялун личин дурну дур диялдакъашивуртту. Комиссиялул кIилчин рейдру даннин ми диялдакъашивурттал 90 процент духлаган дурну дур.
Райондалий бур 27 кIулшиву дулаврил идара: миннува 23 – школа, 3 – ялун ххисса кIулшиву дулайсса идара ва ца детсад.
Школардал ремонт дан КIул­шиву дулаврил управлениялул бюджетраву дирхьуну диркIун дур 1 млн. ва 460 азарда къуруш арцул. Цинявппагу школар­ттай дурну дусса дур ремонтру (бувщуну, хIулувхIуну, сирду бувккун), ЧIарттал ва КIундиннал школарттай бувну бусса бур цIусса хIажатхантту. Карашрал школалул лагма дурну дусса дур чапар. Дакьин дурну дусса дур Гъумучиял лицейрал отопление, цIудурну дусса дур Хьурттал школалул отопление. Дакьин дуллай бусса бур Гъумучиял детсадрал отопление.
Октябрь зурул ахирданийннин бувкIун бур 464 тонна хъу­ручIул.
Цинявппагу школар­тту мюхчан бувну бусса бур цIуда­гьаврия.
Ххуйсса даражалий дусса дур школарттай террордания мюхчан баврил давугу. Гьарца школалий бивтун бусса бур террордания мюхчан баврил тIалавшиннардал жаваблувсса инсантал. Амма цаппарасса школарттал лагма ттигу дакъа­сса дур чапарду, биялну бакъасса бур хьхьувайсса чани.
Райондалул азарханалий дакьин дурну дусса дур отоплениялул радиаторду, ттукIрал ххаллу, поликлиникалий бакьин бувну бур радиаторду, баххана бувну бур линолеум, хIулувхIуну, сирду бувккун бур палатардаву.
Азарханалул кочегаркалуву даххана дурну дур ттукIрал оборудование, бакьин бувну бур пачру, марцI бувну бур вярчIурду.
Шярава шяраваллавунсса ххуллурдайгу тамансса давуртту дарчагу, ттигу кIинтнийн хIадур къабувсса ххуллурду ливчIун бушиву хIисавравун лавсун, ххуллурдал идаралул каялувчинайн умуд бивхьунни кIи дучIаннин къадурми давурттугу къуртал дурну, микI-чIикIирайн бичлансса къунгу чIумуй бучIан банссар тIий.
Гъумучиял электросетирдал хъунама Зураб ХIажиевлул бувсунни дакьин дуршиву Хъунайннал, ШавкIуллал, Гъумучиял, Ккурккуллал шяраваллавусса ттукIрал ххаллу, фидерду. Даххана дурну дусса дур Ххюлусмавсса, ГьунчIукьатIувсса, ХьурукIравсса трансформаторду. КутIасса чIумул мутталий бувцуну бур Гьухъалив цIуну бувсса 18 квартира бусса къат­равунсса ттукI. Ремонтру даву дакъассагу, лаглагисса шинаву даххана дурну дусса дур 170 счетчик.
Шяраваллил хозяйствалул управлениялул каялувчи Ризван Оьмахановлул бувсунни цинявппагу СПК-рдал къушру бакьин бувшиву ва кIи рутан аьркинссаксса лазуни ва кормагу хIадурну душиву.
Лакрал райондалул бюджет­раву дан дакIнийсса дахханашиннардая бувсуна райондалул финотделданул хъунмур Аьйша Амирхановал.
Райондалул цIусса жяматийсса советравун бухлахимин­ная бувсуна Юсуп МахIаммадовлул.
Сессиялий мукунма ххалбивгьуна агьалинаясса налогру датIаврийн багьайсса суаллугу.