Махъсса нюжмардул мутталий Ккуллал райондалий хьунни цаппарасса дахханашивуртту. Уттинин Ккуллал райондалул бакIчи Сулайманов Сяидлул хъиривману зий ивкIсса ХIажиев Эдуард цамур къуллугърайн лагаврийн бувну, ванан кIанай ивтунни Чаринов МахIаммад.
ХIажимурад ХIусайнов
Чаринов МахIаммад Аьлиллул арс увссар 1976 шинал Ккуллал шяраву. 1993 шинал ванал къуртал бувссар Ккуллал 1-мур школа. 1994 шинал увххун ур Дагъусттаннал педуниверситетрал тарихрал факультетрайн. Му 1999 шинал къуртал бувну бур. 2001-2005-ку шиннардий зий ивкIун ур ЧIяйннал школалий тарихрал дарсру дихьлай. 2005-2009-ку шиннардий зий ивкIун ур Ккуллал 1- мур школалий. 2009-ку шинал Ккуллал райондалул администрациялий жагьилтурал ва спортрал иширтталсса бувайсса отдел тIитIайхту, зий уссия ва отделданул бакIчину.
МахIаммадлул цалва кулпат ПатIиматлущал хъуни буллай бур 2 душ ва 1 арс.
МахIаммадлул Ккуллал райондалул администрациялул жагьилтуралсса ва спортралсса бувайсса отделданул бакIчину зузисса мутталий ккаккан бунни цува гьунар бусса сакиншинначи ушиву. Ванал каялувшиврулу дурссар чIярусса соревнованияртту. Жагьилтуралгу цала бакIчинал хъунмасса хIурмат бикIай. Умуд бур МахIаммадлул райондалул бакIчинал хъиривманал къуллугъгу багьайсса кьяйдалий бачин буванссар тIисса.
ТIайлабацIусса къуллугъну хьуннав вил къуллугъ, МахIаммад Аьлиевич!
