Январь зурул 23-нний ЦIуссалакрал райондалул администрациялул актовый залдануву хьунни райондалул агьалинал цIуллу- сагъшиврулсса буллай оьрму гьан бувсса, Дагъусттаннал лайкь хьусса хIакин, ДАССР-данул здравоохранениялул отличник, Хъундяъвилул фронтовик МахIаммадлул арс Мирзоев Нурулла дакIнийн утлатисса мероприятие. Му цурдагу Нурулла МахIаммадовичлун 100 шин хьушивруцIун дархIусса дия.

ЦIуссалакрал райондалул азархана Нурулла Мирзоевлул цIанийссар, райондалий мунал цIа къакIулсса, къабавсса инсан ушиву къакIулли. Мунал цIанил хIурматран райондалул администрациялул хIукму бувну бия ххаллилсса хIакин ва каялувчи дакIнийн утлатисса мероприятие агьалигу лагма лаган бувну дуван. Хъамаллуравух бия Республикалул БакIчинал ва ХIукуматрал администрациялул паччахIлугърал наградартталсса буллалисса управлениялул хъунама Артур Исрапилов, Дагъусттаннал цIуллу-сагъшиву дуруччаврил министрнал хъиривчу Салман АхIмадов. Бия райондалул бакIчи ХIажи Айдиев ва Халкьуннал Мажлисрал депутат Амирхан Амирхановгу. Агьалинаву ххуйсса цIа кьариртсса инсанная бусанмургу бавтIцириннал зумув чIявуя. ТтурчIиял шяравасса Нурулла МахIаммадович увну ур 1917 шинал шяраву хIурмат бусса, захIмат ххирасса кулпатраву. Байбихьулул школагу буттал шяраву къуртал бувну, Грозный шагьрулий рабфакрай дуклай ивкIун ур. 1936 шинал дуклан увххун ур Ухссавнил Ккавкказнаву сийлийсса Да­гъусттаннал паччахIлугърал медициналул институтравун.1941 шинал марцIну ххювардай институт къуртал бувну, терапиялул кафедралий аспирантуралуву кIулшивуртту цIакь дуллан нанисса жагьилнан аьрайн гьан багьну бур, зий ивкIун ур КиеврачIасса Юго-Западный фронтрал дивизиялул медициналул пунктрай, полкрал хъунама хIакинну. 1944 шинал Лакрал ва Ккуллал районнаясса цаппара шяраваллал агьалинащал ТтурчIиял агьлугу Аухнавун бизан байхту, цIуну хIасул дурсса ЦIуссалакрал райондалий хIакинну зун му тIалав увну ур Дагъусттаннал партиялул обкомрал ва Минздраврал. Дяъвилул шиннугу, дяъви къуртал хьуну махъсса шиннугу диркIун дур агьали лахъай азардал бас буллалисса. Ми шиннардий хьхьу-кьини къашайшалтрал чIарав ивкIун ур Нурулла МахIаммадович. «Дагестан сквозь призму времени» тIисса луттираву му укун буслай ур тай чIуннардия: «Райондалий сайки бувагу бакъая медициналул база, буссия 2 хIакинная ва 3 медработникная хIасул хьусса группа, шяраваллавун къашайшалтрачIан бахьтта занан багьайва. Амбулатория, аптека ча бикIанссия, жу къашайшалтралсса буллай буссияв заллухъру бакъа дачIра лирчIсса къатраву».
ЧIявусса инсантал къашавай хъанахъаврил сававгу диркIун дур инсантал ккашил къиялул аьз бувну бушивугу, профилактикалул мероприятияртту дувансса кашигу дакъахьукун, гьава баххана хьуну азурдану, заэвну бушивугу. Эпидемиялул азарду ппив хьуну нанисса ппурттуву ДАССР-данул Минздраврая министрнал цалчинма хъиривчу Жамалуттин ХIажиев бакIчисса кьюкьа дуркIун дур ЦIуссалаккуйн хIакинтуран кумагран. Хьхьу-кьини личIи дакъа зий бивкIун бур Нурулла МахIаммадович ва мунащалми. Гьамин муналли райондалул азархана, бугу-бувну, ччаннайгу бацIан бувсса. Цимурца аьркинмунил дузалсса азархана бувсса. Мунащал зий бивкIсса хIакинтал хIакьинусса кьинигу дакIнийн бутлайнува бур, Нурулла Мирзоев мудангу цIимилийсса, аякьа дувангу лахьхьин буллан икIайва, хIакиннал кIукIлусса ихтилат къашайшалан дарувссар тIун икIайва тIий. ЧIявусса инсантал, мунал цIуцIаврища ххассал бувмигу, мунал инсаншиврул хIайран бувмигу, хIурматрай буслай бур Нурулла МахIаммадович ххаллил­сса хIакин, ххуйсса каялувчи ушаврицIун, дакI- ­аьмал хъин­сса, хасиятрал алвагьсса инсан ивкIшивугу. Мунал захIматран хIукуматралгу лайкьсса кьимат бивщуну бур: райондалий цалчин Дагъусттаннал лайкь хьусса хIакиннал цIа ларсмагу му ур, ДАССР-данул Верховный Советрал Президиумрал ХIурматрал грамотардан лайкь хьуну ур цимилагу, райсоветрал депутатну увчIуну ур. 2005 шинал Госсоветрал указрайн бувну, мунал цIа дирзун дур ЦIуссалакрал райондалул азарханалун. ХIакьинусса кьини Нурулла МахIаммадовичлул кунна хIакиннал цIа адаврай дуручлай зий бур мунал варистал: райондалул азарханалул хъунама хIакин, Дагъусттаннал лайкь хьусса хIакин, Чувшиврул Ордендалун лайкь хьусса Людмила Султанова, ссурахъу; Хасавюрт шагьрулийсса медициналул центрданий (Центр планирования семьи и ребенка) хъунама хIакинну зузисса Дагъусттаннал лайкь хьусса хIакин, Халкьуннал Мажлисрал депутатну ивкIсса Мирзоев Зайнулла, арс. Мирзоев Заур зий ур ккарччал техникну. Мирзоев Аьбдулбасир – Астраханнайсса стоматологиялул клиникалий ортопедический отделениялул хъунаману. Файзулла тIима арс Дагъусттаннал шяраваллил хозяйствалул лайкь хьусса зузала ур.
Райондалул Жяматийсса Советрал председатель Оьма­ров Магьдинал Нурулла МахIаммадович дакIнийн утлатисса мероприятиялул ахирданий лавхъсса мукъуву чIурчIав дурна мунал, райондалул медициналул сий лавай­сса даражалийн гьаз даврицIун, агьалинаву цалла цIа марцIну личIансса тамансса давурттив цаймигу дуршиву, мунал наслугу ххуйсса цIа хIурматрай ядуванну къуццу тIий бушиву ва агьалинавугу мунал цIа мудангу кьиматрай душиву.