Июнь зурул 15-нний ЦIуссалакрал райондалий хьунни райондалул администрациялул бакIчи ХIажи Айдиевлул шяраваллал бакIчитуращалсса ва идарарттал каялувчитуращалсса ирглийсса совещание.

Шикку гьаз бунни райондалул агьали туберкулезрал къашавай хъанахъаврил масъала. Мунил хIакъираву ихтилат бунни райондалул азарханалул хъунмур хIакин Людмила Султановал. Мунил бусласимунийн бувну, туберкулезрал къашавай хъанахъими чан хъанай бур. Амма чIяву хъанай бур му азаруннил литIлатIими. Людмила Султановал кIицI бунни профилактикалул даву гуж дан аьркиншиву, агьали диспансеризация дурну ххалбуллан аьркиншиву. Вава масъалалул тагьар Новостройрай цукун дуссарив бусласисса ихтилат бунни Новостройрайсса азарханалул хъунмур хIакин Булбул Исрапиловал. Ххалбигьлагьисса масъалалул хIакъираву кьамул дунни туберкулез ппив хьун къаритансса чаран ляхълансса постановлениялул проект.
Ва бакъассагу, совещаниялий гьаз бунни налогру датIаврил масъала. Ххалдиргьунни цалчинмур дачIи шинайсса налогру датIаврил ккаккияртту. Райондалул бакIчинал тапшур бунни шяраваллал хъуниминнайн экономистуращал архIал цалчинмур дачIи шинай налогру датIаврил отчет хIадур дан.