Гьашину «Образование» тIисса миллатирттал проектрал лагрулуву иширайну дачин дурну дуссия «Современная школа» тIисса федерал проект.
Имара Саидова
Ва проектрайн бувну кIулшивуртту дулаврил идарарттай хIасул дан най дур гуманитар ва цифровой профиллал кIулшивуртту дуллалисса центрду. Укунсса центрду тIитIаврил мурад хъанай бур дуклакки оьрчIру «Технология», «Информатика», «ОБЖ» ва цаймигу дарсирдал программартту лахьхьавриву итххяххан баву.
Проект сакин хьуну бур шанма бутIуя:
1. Педагогтурал кIулшиврул даража гьаз баву.
2. КIулшивуртту дулаврил база низамрайн буцаву.
3. КIулшивуртту дулаврил идарарттайсса помещенияртту ккаккан дурсса тIалавшиннардайн бувну уттизаманнул оборудованиярттал дузал баву.
2019 шинал июнь зурул 10-нний ДР-лул КIулшивуртту дулаврил министерствалул бувсса «О центрах образования цифрового и гуманитарного профилей «Точка Роста» №1181-05/19» тIисса хIукмулийн бувну Республикалий хъирив лавну ххал бигьлай буссия вай центрду тIитIинсса, кIулшивуртту дулаврил идарарттал тагьар.
ЦIуссалакрал райондалия «Точка Роста» тIисса федерал проектравун бувххунни арулва школа: ЦIуссалакрал 1-мур СОШ, ЦIуссачIуртащиял 2-мур СОШ, ЦIуссамехелтиял СОШ, ТIюхчардал СОШ, ЦIуссаккуллал 2-мур СОШ, Чапаевкаллал 2-мур СОШ ва ДучIиннал 2-мур СОШ.
Проектраву кIицI лавгсса хьхьичIсса кIивагу бутIа, муниципал бюджетрал харжирацIух дузал бувну бур ЦIуссалакрал райондалул арулвагу школалул. Федерал проектрал лагрулуву оборудованияртту машан ласун най дур ва ми школарттай тIивтIусса центрдай дишин най дур федерал бюджетрал харжирацIух.
