Январь зурул 13-нний МахIачкъалалив Расул ХIамзатовлул цIанийсса Миллатрал библиотекалуву хьунни Аьрасатнал печатьрал кьинилун хас дурсса шадлугърал мажлис. Мунил сиптачитал хьунни ДР-лул Печатьрал ва информациялул министерство. Мероприятиялий гьуртту хьунни республикалул кказитирттал редактортал, корреспондентътал, жаваблувсса секретарьтал, дизайнертал, верстальщиктал, хIасил печатьрал аралуву зузими.
А. Аьбдуллаева
Мероприятие тIитIлай, ДР-лул Печатьрал ва информациялул министр Бурлият Токбулатовал барча бунни Дагъусттаннал СМИ-рдал зузалт печатьрал байрандалущал. Бувсунни Аьрасатнал печатьрал тарихрая ва хIакьинусса республикалул СМИ-рдал цIуцIи кIанттурдая.
— Печатьрал кьини хъанай дур кказитрал зузалтрал дакъассагу, информация ххал бавриха, хIадур бавриха ва халкьунначIан биян бавриха зузисса гьарица инсаннал байран. ХIакьину жула билаятрай буклай бур биялсса кказит-журналлу, агьалиначIан биллай бур информация, чагъарунний бивщуминнуйхчIин бакъассагу, электрон журалул кказит-журналлайхчIингу.
Роскомнадзорданул бусласимунийн бувну, Аьрасатнаву сияхIрайн лавсун бур (2016 шинал февраль зурул 17-ннийн бияннинсса чIумуву) 83 азарва СМИ. Миннуву чIявуми чагъарунний бивщусса кказит-журналлу бур.
Щалагу Аьрасатнаву кказит-журналлу буклай бур 102 мазрай. Миннувух бур Дагъусттаннал халкьуннал мазурдий буклакимигу. Республикалий сияхIрайн лавсун бур 332 СМИ: 168 печатьрал ва 164 электронный, мукунна 2 информациялул агентство.
Печатьрал изданиярттаву 13 кказит ва 2 журнал Дагъусттаннал халкьуннал мазурдий буклакисса бур. Мукунна республикалий зий дур миллатирттал мазурдийсса теле- ва радиовещание.
Дагъусттаннал СМИ жула паччахIлугърал политикалул системалул, Аьрасатнал цасса информациялул пространствалул ца бутIа хъанай бур. Миннул агьалиначIан ччясса чIумул мутталий тIайласса информация биян буллай бур.
Кказитирттал, радиостанциярттал, телеканаллал, издательстварттал зузалт, интернет-журналистал чичлай бур ттизаманнул тарихраву цIусса лажинтру. Пишалул байран республикалул СМИ-лул зузалт хьунадакьлай бур ххуйсса ккаккиярттащал.
Республикалул властьрал органнал цIакь бувсса цинявппагу СМИ-рдал бур цала сайтру, интернетраву бур районнай буклакими кказитругу, агьамсса информация ппив хъанай бур социал сетирдайхчIин, хьхьичIунсса республикалул телеканаллу хьхьу-кьини къаувкуну зий дур.
ЦIусса шинал зунтIиссар жува заллусса региондалул цифровой каналгу. На барчаллагь тIий бура зу бихьлахьисса захIматрахлу. Жула пиша цуксса къабигьассарив жунма бакъа къакIулссар. ДакI дарцIуну бура жула кьюкьраву дазу-зума дакъа цала пиша ххирасса инсантал бушиврий, — увкунни Бурлият Токбулатовал.
ДР-лул БакIчинаясса барча баву дурккунни ДР-лул ХIукуматрал ва Республикалул БакIчинал администрациялул управлениялул хъунама Зубайру Зубайруевлул.
— Журналист пишарив ягу призваниерив? Ттухь цIуххирча, ва дур сянат. Сянаткарнал кунна, журналистналгу давриву цала дакIгу, цIагу дихьлай ур, — кIицI лавгунни цала ихтилатраву Зубайру Зубайруевлул.
Кказитру чIумуха, заманалуха лавхьхьуну зун аьркинссар, информация ччяни инсантурачIан биян бансса чаран ляхълан аьркинссар, тIитIин аьркинссар цала сайтру, — увкунни Зубайру Зубайруевлул.
Печатьрал зузалт барча буллалисса ихтилатру бунни ДР-лул ТIабиаьтрал луртаннал ва экологиялул министр Набиюлла Къарачаевлул, «Дагестан» телерадиокомпаниялул директор Луиза Аьлихановал ва м.ц.
1997 шиная байбивхьуну Аьрасатнал печатьрал кьини хьхьичIунсса журналистуран дулайссар личIи-личIисса премияртту. Жагьилсса журналистуран булайссар цIусса проектру зузи бан паччахIлугърал стипендияртту. Аьдатравун дагьну дуссар ва кьинилун хасну дувайсса литературалул конкурсру ва конференцияртту. Ва кьинигу ДР-лул Печатьрал ва информациялул министерствалул чулуха ХIурматрал грамотартту дуллунни республикалул СМИ-рдай хьхьичIунну зузиминнан. Министерствалул грамотартту ларсунни «Илчи» кказитрал корреспондентътал Имара Саидовал ва Залму АьбдурахIмановал. Журналистуран бахшишру дунни личIи-личIисса организациярттал чулухагу. Аьрасатнал Профсоюзрал чулухасса грамотартту лайкь дурминнавухгу бия «Илчилул» зузалт. Аьрасатнал культуралул зузалтрал профсоюзрал чулухасса грамотартту дуллунни Андриана Аьбдуллаеван ва Имара Саидован.
