ДР-лул Культуралул министерствалул Республикалул Халкьуннал творчествалул къатлуву бувсунни мартрал дязаннив Парижлив хьушиву Дарбантуллан 2 000 шин шаврил лагрулуву Дагъусттаннал ваДарбантуллал Кьинирду Франциянаву даврин хасъсса Сакиншиннарал комитетрал заседание.

ЮНЕСКО-лучIасса Аьрасатнал Муданмасса вакил Элеонора Митрофановал оьвкуну, заседаниялувух гьуртту хьун Франциянавун сакиншиннарал зузи группалущал архIал лавгун бур ДР-лул культуралул министр Зарема Буттаева. Му аьрххилий хьуну дур Элеонора Митрофановащалсса хьунабакьаву, муний ххалбивгьуну бур Кьинирду даврийн багьайсса ва гихуннайсса уртакьшиврийсса зузаврицIун бавхIусса масъалартту. Митрофановал барчаллагь увкуну бур жулва культуралул министрнахь ва мунищалсса делегациялухь ва аьр­ххилухлу, цилва ихтилатраву кIицI лавгун бур цивппа цинявппагу цил ялув шиккун бавтIсса гай Кьинирду Аьрасатнал ва Парижуллал культуралул оьрмулуву яргсса лажинну, ЮНЕСКО-лул хъамакъабитайсса ишну хьуншиврий дакI дарцIуну бушиву, чIа увкуну бур гихуннайсса давриву тIайлабацIу.
ЮНЕСКО-лул штаб-кварти­ралуву хьусса цайми батIавурттайгу ххалбивгьуну бур Дагъусттаннал ва Дарбантуллал культуралул Кьинирду Парижлив даврил лагрулуву хьунтIисса гала-концертирттацIун, выставкардацIун ва цаймигу шадлугъирттацIун бавхIусса техникалулми масъалартту.
Дагъусттаннал ва Дарбантуллал культуралул Кьинирду Парижлив дуван дакIний бур ва шинал декабрь зуруй. Му байрандалул шадлугъирттавун бухлай бур Дагъусттаннал яргсса экспозиция, цувгу ккаккан бувну бикIантIисса фото-выставкалийну, декоративно-прикладной искусствалийну, Дагъусттаннал халкьуннал аслийсса канил пишардайну. Мукунна хьунтIиссар хъуннасса концерт, цивухгу гьуртту хьунтIисса респуб­ликалул искусствалул усттартал ва творчествалул коллективру.
Дагъусттаннал ва Дарбантуллал Кьинирду Франциянаву дувантIиссар Аьрасатнал Федерациялул Президентнал ХIукмулийн, Аьрасатнал Федерациялул ХIу­куматрал, ДР-лул ХIукуматрал Распоряжениялийн, вице-премьер Александр Хлопониннул каялувшиннаралу хьусса, Сакиншиннарал комитетрал заседаниялул Протоколданийн бувну.
КIулсса куццуй, Дарбант, Аьрасатнал Федерациялул хьхьи­чIавасса шагьру, тарихрал, культуралул, архитектуралул ва археологиялул ляличIийсса гьайкал хIисаврай, бухлахиссар ЮНЕСКО-лул ирсирал объектирдал щаллагу дунияллул сияхIравун. ООН-далул 37-мур сессиялий кьамул дурсса Агьамсса датардал календарьданувун дагьлагьиссар Дагъусттаннал ва Дарбантуллал Кьинирду Парижлив давугу. Ми Кьинирдал лагрулуву концертирттан, выставкардан ва цаймигу иширттан заллугу уква буллай бур.