ОьрчIру буруччинсса чаран ляхълай
ЦIуссалакрал райондалул цIуминалийсса цинярдагу кIулшивуртту дулаврил идарарттай хьунни дуклаки оьрчIал нитти-буттахъал батIавуртту.
Ми батIавурттай ххал бивгьунни экстремизмалул идеологиялийн ва терроризмалиясса нигьачIаврийн къарши бацIаврил, жагьилтал ИГИЛ-данул кьюкьравун кIункIу хьун къабитаврил масъалартту. Нитти-буттахъал батIаврий гьуртту хьунни ЦIуссалакрал райондалул администрациялул бакIчинал цалчинма хъиривчу Аь. Буттаев, КIулшивуртту дулаврил управлениялул Новостройрайсса вакилтал, шяраваллал администратортал ва миннал хъиривчутал, полициялул капитан О. Аьлиев, Новостройрайсса мизитрал имам ХIасан-хIажи.
Райондалул кIулшивуртту дулаврил управлениялул хъунаманал хъиривчу Малика Акаевал кIицI лавгунни цIана, жагьилтал террористурал кьюкьравун кIункIу буллалими чялиш бувксса чIумал, нину-ппухъру цачIун бавтIун, укунсса батIавуртту дуллалавугу терроризмалул идеологиялийн къаршину бацIансса ца чаран хъанахъишиву.
Вайва гьантрай нитти-буттахъал батIаву хьунни ДучIиннал 2-мур школалийгу. БатIаврил бакI дургьуну бия школалул директор Бахттун Шуаьева.
- Жура цахъи дунугу оьрчIахсса къулагъас чан хьун дитарча, ми жулва канища буккантIиссар. Жунма цинявннан хъинну личIлулну бикIан аьркинссар, ххишаласса аякьа, ургъил дикIан аьркинссар жулва оьрчIах, - увкуна ванил.
- ХIакьину 100-хъул Дагъусттаннал жагьилтал террористурал кьюкьраву талай бур. ИГИЛ-данул эмиссартал утти-цIанагу кьаст лахIлай бур цивппа хьунабакьлай ягу социал сетирдайхчIин жагьилтал хъяврин бан, ми цалва ххуллийн кIункIу бан, - увкунни хъирив ихтилат бувсса О. Аьлиевлул.
- Ниттил ххишаласса аякьа, къулагъас дикIан аьркинссар оьрчIах, ниттин кIулну бикIан аьркинссар школалул кьатIув ми ссаха зий буссарив, щищал буссарив. Миннал багьу-бизулуву бахханасса цичIав хIисав хьурча, кьюлтI къабувну, ми оьккимуния арх бансса чаранну лякъин аьркинссар, - увкуна Аь. Буттаевлул.
Цалва-цалва пикрирду ва насихIатру бусласисса ихтилатру бувна нитти-бутталгу. Шикку гьаз хьунни оьрчIру личIи-личIисса кружокирттавун занази баврил, ххишаласса спортрал секциярду зузи баврил масъаларттугу.