Барачатсса барз бунуккар ва февраль барз ЦIуссалакрал жяматран: цIусса миналий хъинсса школа Гьамияхь тIивтIунни, ххуйва- ххуйсса садик Чапаевкалийгу тIивтIунни.

Ларгсса нюжмардий тIурчарив ЦIуссалакрал райондалий гийх, ЦIуссалакрал шяраву, тIивтIунни «Буратино» цIа дусса садик.
Гимназиялул къатри дакьин дурну, ччясса мутталий цIудуккан дурну, 220 оьрчIансса садик бунни. Му тIитIаврил шадлугърайн ЦIуссалаккуйн бувкIун бия бусравсса хъамалгу: Дагъусттаннал ХIукуматрал председательнал хъиривчу Шарип Шарипов ва республикалул ветеринариялул комитетрал хъунама Вахмурад Курчаевгу. Жямат барча бан увкIун ия ккалли дансса царагу мероприятие лях гьан къаритайсса, оьнийгу, хъиннийгу райондалул жяматрачIату хIура къашайсса, Халкьуннал Мажлисрал депутат Зайнуллагь Мирзоевгу.
Шадлугърал дайдихьу дуллалисса махъ лахълай, райондалул хъунама ХIажи Айдиевлул кIицI лавгунни райцентрданул агьали ччянива ялугьлай бивкIшиву цIусса садик тIитIаврих, ца-цаних тIий агьалинал мурадру бартлаглай бушиву, республикалул хъунимигу кабакьу буллай бушиву хайр-мюнпатрансса давурттив бакIуйн дуккан дуван.
Вице-премьер Шарип Шариповлул цалвамур ихтилатраву бувсунни, махъсса кIира шинал лажиндарай республикалий 41 учреждение тIивтIушиву школданийн занан бувасса оьрчIансса, республика хьхьичIуннай дансса давурттавух ттизаманнул тIалавшиннарду хIисавравун ларсъсса, ххуйсса садикру буллансса программагу душиву.
Садик тIитIаврил байран чIюлу дунни «Эдельвейс» ансамбльданул къавтIалтрал.