Февраль зурул 6-нний Ккуллал райондалул Ваччавсса УО-лул къатраву хьунни райондалул дуклаки оьрчIал дянивсса «Экология дуруччаву – дуклаки оьрчIал пикрирдаву» тIисса элмулул зумунусса конференция.

ХIажимурад ХIусайнов
Ва конференциялий гьуртту хъанай бия 12-17 шинавун бияннинсса дуклаки оьрчIру: Хъусращиял, Ккуллал (кIива), Ваччиял, ЧIяйннал, ЦIуйшиял, Къяннал, Хъювхъиял школардал.
Конференциялул мурадну бия оьрчIал аькьлу-кIулшилуву хIасул буван цивппа яхъанахъи­сса кIанттайсса тIабиаьт, лагма­сса уртту-щин, лелуххант, жанаварт муданмагу буручлан аьркин­сса пикрирду бикIан багьлагьишиву, мукунма шяраваллил тIабиаьт дуру­ччаврил давурттавун оьрчIру кIункIу бувансса чаранну ляхълахъаву.
ОьрчIал чIявуми докладру хас бувну бия гьарцаннал цалла шяраваллал лагмасса тIабиаьт дуруччаврин ва цаппаранналсса бия аьмну Ккуллал райондалул, Дагъусттаннал тIабиаьт дуруччаврин хас бувсса. Конференциялул ахирданий жюрилул личIи бувна республикалулмур конференциялий гьуртту хьунсса кIива доклад: Ккуллал 1-мур школалул дуклаки душ Оьмариева Галинал ва Хъювхъиял школалул дуклаки оьрчI ЦIаххаев МахIарамлул.
Ва конференциялул хъунмасса кIану бугьлай бур гьашинусса шин экология дуруччаврин хас дурсса дуну тIийгу.