Уттигъанну, Ккуллал райондалийсса ца шяравату гамур шяравун машиналий най унува, чIарав щябивкIсса хъамитайпалущал ихтилат буллалийни (га ттун кIулсса хъамитайпа бакъая), ганил бувсуна цила, 5-6 оьл ябуллай, гайннул дуллалисса накIлия нагь-нис дуллай, гай дахлай, кулпат ябуллай бушиву.
КIул хьуна ттун га, адаминагу ахиратравун лавгун, щащарну ливчIсса хъамитайпа бушивугу. ХIасил, ттун бувчIуна зунттаву яхъанахъисса инсаннал хIарачат булларча, кулпат бакI буккан буван бюхълахъишиву.

Амма ттул ихтилат даву дуллан ччисса инсантурая бухьурчагу, агьаммур гъалгъа вайннал дуллалисса давуртту цахъис духьурчагу бигьа давриятур, учиннуча, механизироват дуван багьлагьишивриятур. ЧIявуссаннан кIулссар, циняв кушурду такну кIицI къабулларчагу, гъаттара ябуван, гай кIюрххил-кьуннил лакьин циксса кушурду бикIайссарив ва цуксса захIмат шайссарив. Гай лакьаву дакъагу, гъинттул гьу­хъалланийн лагларчагу, кIинттул канансса лазунигур хIадур дуван аьркинсса. Ца гьалмахчунал бувсуна ттухь шинал мутталий ца оьл ябуван аьркин шайшиву 120 кип ххалал. НукIува шяраваллаву гъаттарал пара-хъут, гайннул лув дирчуссаннувух хIала дурну, гайннуяту ккупарду бувну, бярайн дуккан дайва. Утти, рахли ца-цавайннал буварча бакъа, бя буллай бакъар. Бяран кIанай хъуручI, ттукI ишла буллай бур, къатри гъили дуван. Мунияту гъаттарал хъут чIявуминнал оьргъашиврун ишла дувай, хъуруннайн дичай. Вай циняв давурттугу явара хъамитайпалул каруннихри дуллалисса.
Га хъамитайпалущалсса ихтилат хьуну махъ, ца-кIива гьантлува, на Ккуллал шяравун лавгун унува, кIикку бакIрайн агьунав оьллу ябаврил даву щалла механизироват дурсса ужагърайн. КIайнначIа оьллал тIунултту личIину, оьллу уттубишайсса кIанттайх тахтарду даркьуну, ппалнил лахъишиврийх, оьллу уттубишайсса кIанттаяр яларайну, ттукIрай зузисса, 30 сантиметралул уттасса мюрщи­сса муххал чIатIращалсса, хъут кьатIув дуккан дувайсса транспортер дия. Укунсса, вара лагрулул транспортер ттун ххал хьуна 2-мур ЦIувкIуллал шяравугу, МахIарамов Аьбдулмажидлул дурсса гъаттарал пирмалий. Ккуллал шяравусса ужагърай оьллу ттизаву, ларкьусса накI салкьи дувайсса бедоннащалсса, ттукIрай зузисса, автодоилкар­ттащалсса дия. ЧIаравва сепоратор бивхьусса нагь-нис дувайсса къаттагу бия.
На, зат кIулчу хъанай, тик­рал къабулланна цуксса захIмат бишин аьркинссарив накIлил литIра жула столданий хьуншиврул. КIицI буван, тавакъю буван ччива анжагъ жула зунттаву яхъа­нахъисса чиваркIуннахь: «Зулва оьрмулул дустал, ни­ттихъул, ссурвал, гъанми, зухава къуллугъ буллай, лахъисса шиннардий яхьуншиврул, бигьа дувара миннал давурттив, ужагърайминнущал кьатIухмигу», — куну.
ХIажимурад ХIусайнов