Июнь зурул 27-нний «Нордавиа» авиакомпаниялул МахIач­къалалия Москавлий дайдихьлай дур цIусса рейсру.

Рейсру дуллан тIий дур Бо­инг-737-500 самолетирттай, цирдагу агьалинан къулайсса шартIру дусса. Ва авиакомпаниялул самолетру лехлантIиссар Москавлия Домодедово аэропортрая ссят 16.25 хьусса чIумал итни ва хамис кьинирдай, МахIачкъалалив самолетру диллантIиссар ссят 19.00 хьусса чIумал. МахIачкъалалиягу Москавлив «Нордавиа» компаниялул самолетру лехлантIиссар ссят 20.00 — нний ва Домодедово аэропортрайн самолетру диллантIиссар ссят 22.40 хьу­сса чIумал.
«Нордавиа» компаниялул самолетирттайнсса билетирттал багьри кьюкьин баву мурадрай, МахIачкъалалия Москавлийнмай бур бизнес классрал 2700 къурушрансса билетру. www.nordavia.ru авиакомпаниялул сайтрайхчIин билетру ласласиминнан, промо группалул тариф личIаннин, вайми тарифирдан 5% кьювкьуну билетру ласун бюхъайссар.
Авиакомпаниялул дур оьр­чIансса скидкардугу – кIира шин хьуннинсса оьрчIру уква буцинсса ва 2-12 шин хьусса оьрчIан 50% кьювкьусса билет­ру, мукунна оьрчIангу хъуниминнан кунна ккаккан дурсса багаж украссар.
Пассажиртурал тIалавшинна биттур даву мурадрай, авиакомпаниялул ца инсаннан 23 килограммрал кIушиву ва 203 см. лагру дусса багаж укра ласун­сса ихтияр дур. Канихьгу ца инсаннан 10 кг. кIушиврул ва 115 см. лагрулул дусса буза укра ласунсса ихтияр дур. Багаж ласаврил нормарду ишла дан бю­хъайссар кIира шинава ливчу­сса оьрчIащагу. КIира шин хьуннинсса оьрчIру бувцуну нанисса пассажиртурахьгу ихтияр дуссар 10 кг. кIушиврул ва 115 см. лаг­рулул дусса украсса багаж ласунсса.
Самолетрай пассажиртуран дуллан тIий дур украсса дукра ва хIачIия.
Мукунна авиакомпаниялул ччя-ччяни лехлахисса пассажиртуран дур «Золотая миля» тIисса программа. Ва программалуву гьуртту хъанахъисса пассажиртуран бур гьарца левхтари бонусру буллай ва ми салкьи хьуну махъ авиакомпаниялул, награда хIисаврай, буллай бур уквасса билетру. Пассажиртураща программалуву гьуртту хьун бю­хъайссар уква.
Вай рейсру пассажиртуран къулай дизарчан, «Нордавиа» компаниялул каялувчитал гихунмай МахIачкъалалия цаймигу шагьрурдайнсса рейсру тIитIин дакIний бур.
Ибрагьимов
Аслан Германович,
ООО «Транс-Авиа» авиакомпаниялул хъунама директор
ХIадур бувссар
Асият Абачараевал