Республикалул прокуратуралул тапшур бувну бур ОьрчIал къатраву ва интернатирттаву ялапар хъанахъисса балугъравун къабивминнал мюхчаншиву дуруччаврин ва миннал ихтиярду дуруччаврин хас бувсса «круглый столлу» бан гьарца районнай.
Ларгсса нюжмардий мукунсса «круглый стол» хьунни Лакрал райондалийгу. Муний гьуртту хьунни райондалул бакIчинал хъиривчу Ансар Къажлаев, КIулшиву дулаврил управлениялул, Виваллил иширттал отделданул, больницалул зузалт, балугъравун къабивминнал иширтталсса байсса отделданул ва опекалул ва попечительствалул органнал пишакартал.
«Круглый столданул» даву дайдихьлай, Лакрал ва Ккуллал районнал прокурорнал хъиривчу Сяид МухIадовлул бувсуна, МахIачкъалаливсса «Забота» интернатрай оьрчIал ихтиярду ссуссукьу дуллалисса, оьрчIай рахIму бакъасса ишру ялун ливчуну махъ, республикалул прокуратуралул тапшур бувшиву гьарца районнай нитти-буттахъал аякьалулу бакъасса балугъравун къабивминнал хIалкьазия ххал бигьин. Бувсунни прокуратуралул ялун личин бувшиву интернатраву тарбия хъанахъисса оьрчIру директорнал дачалий зузи буллалисса ишру. Ми ишру хIисавравун лавсун, интернатрал директор тахсирлув буллалишиву балугъравун къабивминнал ихтиярду ссуссукьу дуллалишиврий.
Сяид МухIадовлул мукунма бувсунни Лакрал райондалий бакъашиву нитти-буттал аякьалулу бакъасса оьрчIансса идара.
Опекалул ва попечительствалул отделданул хьхьичIунсса пишакар Къисттаман Къюннуевал бувсунни райондалийсса нитти-буттахъал аякьалулу бакъасса оьрчIал тагьардания. Ми цинявппагу бусса бур опекунтурачIа. Ванил ихтилатрава, къулагъас аьркинсса тагьар дусса дур Хъурхърал шяраву цала ссурахъичIа ялапар хъанахъисса душнил. Анаварсса мутталий ххал дан ккаккан бунни душ ялапар хъанахъисса шартIру ва дукра.
