Ниттил мазрал кьинилун хасну ДГУ-луву вай гьантрай хьунни «КIулшивуртту дулавриву Дагъусттаннал миллатирттал мазурдил бугьлагьисса кIану» тIисса цIанилусса ккуркки стол.
Ванил сакиншинна дурну дия ларгсса шинал университетраву тIивтIусса Миллатирттал мазурдил центрданул каялувчину зузисса Марина ХIасановал. Шикку гьурттушинна дан бувкIун бия ДГУ-лул, ДГПУ-лул аьлимтал-филологтал, шагьрурдаясса ва щархъаясса ниттил мазрал учительтал, ДР-лул Миннацрал, ДИРО-лул пишакартал ва студентътал.
З.АьбдурахIманова
Школалий миллатирттал мазрайсса дарсру дишаврия бакъа, шикку ихтилатру хьуна ниттил мазру кулпатравугу, оьрчIансса садикирттавугу чанну ишла бавриясса, нитти-буттал миннух багьайсса къулагъас къадуллалавриясса.
ХIакьинусса кьини 6 миллатрал мазрай дарсру дихьлан республикалул школарттай ишла буллай бусса бур 185 азаруннийн бивсса луттирду. ЧIявуми учительтурал цала-цала дарсирдай ишла дуллай бусса бур цала салкьи дурсса, цачIун дурсса методикалул давуртту. Махъсса шанна шинал дянив кIулшивурттал даража лахъ байсса курсру бувккуну бур 2534 ниттил мазрал учительтурал.
ДР-лул Миннацрал пишакар Юсуп ХIусайновлул цала ихтилатраву кIицI бувна цачIан оьвчайсса чIявуми нитти-буттахъаясса тавакъюрду миллатирттал мазурдийсса аудиолуттирду итабакьинмур бувара тIисса бикIайшиву.
Ихтилатру мукунма бия ниттил мазрал дарсру дишайни ишла дайсса материал-техникалул щаллушинна дуван аьркиншивриясса, мазурдиха зузисса жагьилсса пишакартуран, аьлимтуран хIукуматрал чулухасса кумаг бан аьркиншивриясса ва цаймигу.
Вузирдаву зузисса пишакартурал кIицI бувна шиная шинайн миллатирттал мазурдил отделениялийн нанисса студентътурал кьюкьа ххялтIа дуклакавриясса буруккин. Мисалдаран, ларгмур шинал ДГУ-лул лазгиял мазрал отделениялийн цуя ца студент увкIун акъар.
Бувсуна хъунмасса гъира ниттил мазурдих бушиву билаятрал цайми регионнай ялапар хъанахъисса ва дуклакисса жагьилтурал чулуха. Мисалдаран, Саратовуллал университетраву информациялул технологиялул факультетрай дуклакисса жагьилнал, ххалгу диргьуну, щурущи дурну дур даргиял мазравусса къайтагъуллал лугъатрай цачIун був махъру тIайлану чичавриясса даву (приложение).
