Февраль зурул 15-16-нний Ккуллал райондалий хьунни шяраваллавусса школарттай лакку мазрал ва литературалул дарсру дихьлахьисса учительтурал дянивсса конкурс.
Ва конкурсравух гьуртту хъанай ия 7 учитель: Ккуллал 1-мур школа – Аьлиева Гугьарша, 2-мур ЦIувкIуллал школа – ЯхIияева Шагьрусттан, Ваччиял школа – Мирзаева Дарико, ЧIяйннал школа – Маммакьурбанов Арсений, Хъювхъиял школа – Хизриева Зайнаб, Вихьуллал школа – Аьлиева Уммукулсун, Къяннал школа – АьбдурахIманова Сарьяна.
Вайннал дихьлахьисса дарсирдал хIисав-сан дуллай бия: Ккуллал райондалул УО-лул каялувчи ХIаммакуева Альбина, ванил хъиривма Оьмариев Жамалуттин, УО-лул пишакар АхIмадов Нураттин, Вихьуллал школалул лакку мазрал учительница Мусаева Заретта, Хъювхъиял школалул лакку мазрал учительница МахIмудова Магьрикаят.
Цалчинмур кьини конкурс най дия Ваччиял школалий. Шикку цала дарс дишаврил пагьму-гьунар ккаккан бувна, Ваччиял школалул 9-10- ми классирттал дуклаки оьрчIахь дарс дирхьуну, Аьлиева Гугьаршал, Маммакьурбанов Арсенийл, ЯхIияева Шагьрусттаннул.
КIилчинмур кьини конкурс хьуна ЧIяйннал школалий. Ва кьини цалчин ЧIяйннал школалул 9-мур классрахь дарс дирхьуна Ваччиял школалул учительница Мирзаева Дарикол.
Хъирив 10-мур классрал оьрчIахь дарс дирхьуна Вихьуллал школалул учительница Аьлиева Уммукулсуннул.
Сарьянал хъирив дарс дирхьуна Хъювхъиял школалул учительница Хизриева Зайнаблул, 9-мур классрал оьрчIахь.
Муния махъ жюрилул личIи увсса 4 учительнал дирхьуна оьрчIахь классный час.
Ванийну арула учительнал дянивсса конкурс къуртал хьуна. Жюрилул жям дурну, бувсуна цума учительнал цумур кIану бувгьуссарив. Цалчинмур кIану буллуна ЧIяйннал школалул учитель Маммакьурбанов Арсенийн. КIива кIилчинмур кIану буллуна Вихьуллал школалул учительница Аьлиева Уммукулсуннун ва Къяннал школалул учительница АьбдурахIманова Сарьянан. Шамилчинмур кIану буллуна Ваччиял школалул учительница Мирзаева Дарикон. Ххув хьуминнан буллуна дипломру, арцущалсса конверт_ру ва «Назмурдайнусса ниттил сурат» тIисса луттирду.
Ккуллал райондалул УО-лул каялувчи ХIаммакуева Альбина хъунмасса барчаллагь баян буллай бур конкурс нанисса мутталий сакиншиндарал давурттив дурсса Ваччиял ва ЧIяйннал школарттал директортал Мирзаева Бажихь ва Каммаева Иринахь.
Ва конкурсраву ххув хьусса Маммакьурбанов Арсений гьан тIий ур Республикалул лагрулийсса конкурсравух гьуртту хьун. Жувагу ванан тIайлабацIу чIа учинну.
