Январь зурул 14-нний МахIачкъалалий Тахо-Годил цIанийсса педагогикалул институтраву хьунни шагьрулул школарттай ниттил мазрал дарсру дишаврицIун бавхIусса масъаларттан хас дурсса семинар-совещание.

И. Саидова
Шикку гьуртту хьунни шагьрулул КIулшиву дулаврил управлениялул ниттил мазурдил масъалар­ттаха зузисса методистал, ДР-лул КIулшивуртту дулаврил министерствалул вакилтал, КIулшивуртту хьхьичIуннай даврил институтрал филологиялул кафедралул преподавательтал.
Семинарданий ххал бивгьунни шагьрулул школарттай ниттил мазрал дарсру дишаврил, ниттил мазурдийсса олимпиадартту даврин хас бувсса ва Дунияллул Халкьуннал ниттил мазрал кьини кIицI лагаврил хIакъиравусса масъалар­тту. Семинарданул гьурттучитурал ккаккан дунни «Жулва миллатир­ттал телевидение», «Лингвистикалул дарсру» ва цаймигу миллатирттал мазрайсса телепроектру.
Миллатирттал мазру ябаврил хIакъиравусса агьамми масъалар­тту кIицI лаглагисса ва ФГОС-рал тIалавшиннарайн бувну миллатирттал мазру машгьур баврия­сса ихтилат бунни ДНИИП-лул директор ХIамидуллагь Исмяиловлул, КIулшивуртту дулаврил ва элмулул министерствалул аьмсса кIулшивуртту дулаврил управлениялул консультант Раисат Аьдулбасировал, ДИРО-рал филологиялул кафедралул заведующий Мадина Минатуллаевал.
Раисат Аьбдулбасировал кIицI лавгунни цалла Управлениялул хъуннасса къулагъас дуллай бушиву шагьрулул школарттай ниттил мазрал дарсру дишаврил даража лавай баврих. Му бакъассагу, управлениялул гьарица шинал, шагьрулул школарттай ниттил мазрал дарсру дишаврил ялув бацIаву мурадрай, лавайсса даражалий сакин дурну дур методический объединениярттал даву.
Школарттай ниттил мазру лахьхьин баву ва буруччаву мурадрай дуллалисса давурттавух бунни «Второе дыхание родным языкам» тIисса конкурс. Ва давривух чялишсса гьурттушинна дунни шагьрулул школарттай дарсру дихьлахьисса учительтурал.
Р. Аьбдулбасировал мукунма кIицI лавгунни школарттай ниттил мазру лахьхьин баншиврул аьркиншиву дарсру дишаврил даража лавай бан, ишла дуллан информациялул ва коммуникациялул технологияртту, интернетрал кумаграйхчIин личIи-личIисса журалул дарсирдал кьяйдарду ляхълан. Мукунма, оьрчIал маз итххяххан баншиврул, мудан ишла дуллан аьркинссар фразеологиялул, лексикалул ва стилистикалул давуртту. Вай масъалар­ттал хIакъираву МахIачкъалаллал 11-мур гимназиялий дуккаврил шин дайдирхьуния шихунмай тIивтIуну буссар ниттил мазру лахьхьин буллалисса эксперимент буллалисса класс. Шагьрулул школарттай дарсру дихьлахьийни хьунадакьлакьи­сса захIматшивуртту куклу даву мурадрай, циняв учительтураща бю­хъайссар шикку аьмсса маслихIатру ккаклан.
Совещаниялий бувсунни сакин дуллай бушиву ниттил мазурдийсса учебно-методический материаллу дихьлансса учительтурансса сайт.