Жамалуттиннул бивтсса оьрмулул ххуллул хIисав ласлан бивкIукун, дакIнийн багьай «хIарачатран – барачат», «думунийн щукру баймари яла талихI бума» тIисса махъру. Мукун, думунийн щукру бувну, амма мунищала архIал, ца кIанай къаавцIуну, хьхьичIунай най, цала захIматрайну, хIарачатрайну ххуллу лавсъсса инсан ур Жамалуттин.
Уттигъанну цалва оьрмулул 80 шинал юбилей кIицI ларгунни Карашрал шяравасса Гьидалтил арс Аьбдулхаликьов Жамалуттиннул.
Бадрижамал Аьлиева
Увну ур Жамалуттин 1936 шинал Карашрал шяраву Гьидалтил ва Узал кулпатраву. Жамалуттиннул цалва оьрмулиясса ххару чичиннин, цукунчIав къабучIир ванал нитти-буттая ца-кIива махъ къаувкуну. Ванал ппу Гьидалти ивкIун ур цикссагу ккавксса, цикссагу бувхIусса инсан, оьрмулувагу лавгун ур жагьилну унува. Ппу ивкIусса чIумал Жамалуттиннун диркIун дур 6 шин. Мунан буттал лажин дакIний дакъар, мунал оьрмулиягу кIулну бур ниттил бусаврийну. [pullquote]Жамалуттин увчIуну ур Лакрал райисполкомрал председательну. Ва даврийгу ванал цала бусса гуж бихьлай зий ивкIун ур райондалул агьалинаха. Жамалуттин буслай ур цува ва даврий усса чIумал, хъунисса кумагру буллай, райондалул чIарав бавцIуну бивкIшиву республикалул хъуними, лакрал миллатрал хъунисса давурттай зузисса инсантал.[/pullquote]Гьидалти цала маэшатрал хъирив Ставрополлал чуллайн лавгун (му чIумал ми аьрщирду Дагъусттаннахь диркIун дур), тийх хъуннасса хозяйство дурну диркIун дур. Колхозру дуллан бивкIукун, цалла думур аваданшивугу мивун дирчуну дур мунал. Мукун, колхозру дурну махъ, му хъинну бюхъу бусса чув ушиву чIалай, инсантурал Ачикъулахъуллал райондалул «Горец» тIисса колхозрал председательну увчIуну ур. Цайнна вихшала дурсса колхоз мунал ххишала бакъа лахъсса даражалийн лахъан дурну дур, цува ивтсса чIумал бивкIсса 500 хIайвандалия 16 азарва хIайван бувну бур, ми ссуникIурттал гьаннарайн кIура баен бувну бур. Гьидалтин дуллуну дур Лениннул орден, му ивкIун ур Дагъусттаннай цалчин му ордендалун лайкь хьуминнавасса ца. Мунал каялувшиву дуллалисса колхоз ми шиннардий диркIун дур щалла республикалий ца яла хьхьичIунмур, язимур хозяйство. 1936 шинал, му къуллугърая увцуну, Гьидалти ивтун ур тиккурасса Къаясулинский райондалул исполкомрал председательну. Тиччагу гьан увну ур Ростоврайн лавайсса школалий дуклан. Ппу оьрмулува лавгун ур 39 шинаву. Нину 30 шинаву лирчIун дур щащарну, — буслай ур буттал кьурчIисса кьадардания Жамалуттин. Гьидалтил оьрму бивкIун бур щаллусса лува чичинсса. Кказитрал хъиривсса цания ца номерданий мунал оьрмулиясса макьала чичинну.
Канихьсса ца оьрчIащал ливчIун бур жагьилсса оьрмулуву Уза. «Ттул арснал оьрчIан уссу-ссу аьркинссар, щар хьу» тIийнна дикIайсса диркIун дур мунихь ласнал нину. Амма Уза щар къавхьуну бур, оьрчIан аьвкъун ппу ккаккан къаувайссар тIий.
Карашав 7 класс къуртал бувну бур Жамалуттиннул. Бусраврай дакIнийн бичлай ур цала учительтал – ххишала бакъа ххаллилсса педагогтал. Карашрал школалий завучну зий му чIумал ивкIун ур Хъурхъиятусса ххаллилсса учитель Хизиев Жяъпар, школалий ларайсса кIулшивуртту ларсъсса цайми учительтал буна, педучилище бувккусса му ивтун ивкIун ур завучну, цала пишакаршиврийн, за кIулшиврийн ва хIарачатрайн бувну. Мунал хъинну ххуйну оьрус мазрал грамматика лахьхьин дурну дур Жамалуттиннун. Москавлия бучIан буллай, мунал Жамалуттиннун «Пионерская правда» кказитгу чичайсса бивкIун бур. Мукуна дакIний ур цамагу ххаллилсса учитель – КIулушацIатусса ХIасанов Муса. Жамалуттиннул Карашрал школалий 7 класс бувккуну бур 1952 шинал. Чансса хьхьичIун буклай чичин, Карашав дуклакисса чIумалсса Жамалуттиннул тетрадру Мусал цачIава ябувну бивкIун бур 24-хъул шиннардий. ХIукуматрал мукун тарбия бувсса, дуклаки оьрчIал нину-ппушиву дуллалисса ххаллилсса бия та чIумалсса учительтал.
Гъумук 10 классгу къуртал бувну, увххун ур Жамалуттин МахIачкъалалив Шяраваллил хозяйствалул институтравун, амма мугу кьабивтун гьан багьну бур Ленинградрайн. Ленинградрай ца шинайсса технический училищагу бувккуну, тIайла увккун ур Жамалуттин Кронштатрайн заводрай токарьну зун. Зана хьуну Ленинградрайн Микку Технологический институтрал хьхьуваймур отделениялий дугу дуклай, дяхтта заводрайгу зий 3 шин хьуну, буллан бивкIун бур ванан квартира. Му чIумалнин Жамалуттиннул кулпат бувну бивкIун бур, цала шяравасса душ Аьишат бувцуну. Квартира буллан бивкIукун, августрай авчуну ур буттал шяравун, нинугу, кулпатгу буцин Ленинградрайн. Заводрал директор ва цехрал начальник Жамалуттиннухь малагара тIий миннатрай бивкIун бур, ваца му махъунай къаучIантIишиву кIулну бивкIсса кунма. УвкIун ур отпускрай Жамалуттин Дагъусттаннайн. Амма нину Ленинградрайнсса аьрххилия инкар хьуну дур: «Насияра зува, ттух мабургари, на наралугу ялапар хьунссара», — тIий. Цама арс, душ бакъасса, цилва бусса оьрму цала цIаний харж бувсса нинугу кьадиртун, Ленинградрайн гьан Жамалуттиннун намусрал кьамул бувну бакъар, цахарагу чIалачIин дакъасса, цаннагу дазу-зума дакъа ххирасса ниттичIа шяраву авцIуну ур, кьабивтун Ленинградрайсса квартирагу, институтгу, лавайсса харж ласласисса давугу. Жамалуттиннул ва зад буслай ура тIар цIанакул паччахIлугърайсса тагьар чIалай. Бугьарами ябайсса къатлуву 17 инсан усса ур лакрал. Миннал чIявуминнал арсру-душру бусса бур. Ва чун нанисса задри, тIий ур ва.
Му чIумал дурккусса инсантал Карашавгу аьркинну бивкIун бур, ивтун ур му шяраваллил советрал секретарьну, яла председательну. Аьшттарханнайн дуклан гьан увну, бувккуну бур 2 шинайсса партийный школагу, зий ивкIун ур Гъумук райкомрай инструкторну. Бувккуну бур 5 шинайсса заочныйсса высшая партийная школа Ростоврай. Махъ ивтун ур райондалул «Ххяххабаргъ» кказитрал редакторну. Редакциялийн ук-тук уххарча акъа, типографиялийнагу къаувхсса, му даврил хIал къакIулсса Жамалуттин щак-щуклий ивкIун ур му даву цащара дуван хьунавав, рязи хьун хъинавав, къахъинавав тIий. МаслихIат ккавккун бур Ленинградрайсса цала ссурахъищал. Мунал увкуну бур му хъинну захIматсса, мунищала архIал хъинну хIазсса давур куну. УвкIун му къуллугърайн, 17-18 номерданул махъун багьсса кказит хъирив лаян бувну бур, нюжмардий 4 номер буккан буллай, давугу цила нирхиравун дуртун дур. Ванал лагма лавгун хъунмасса захIмат бивхьуну бур редакциялул ва типографиялул коллективрал. Ва даврийгу Жамалуттиннул цува ккаккан увну ур тIайлашиву ва низам ххирасса каялувчину, кьянкьасса тIалавшинна цаятурагу, цайминнаягу дусса.
Ряхра шин дурну дур редакторну зий. Шичча партиялул райкомрал увцуну ур ва цала пропагандалул ва агитациялул отделданул хъунаману. Ва даврийгу ванал сипталийну ва хIарачатрайну увцуну райондалийн Дагъусттаннай машгьурсса цIанихсса пишакар, ЧукIнатусса Муслимов Жамалуттин, бувну бур ххаллилсса ансамбль «Гъази-Гъумучи». Ва ансамбль бивну бур концертирттащал циняв Дагъусттаннал шагьрурдайн, Лакрал, Ккуллал, ЦIуссалакрал, Ахъушиял районнал щархъавун. Халкь хъинну ххарину бивкIун бур вайннал даврияту.
Шичча Жамалуттин увчIуну ур Лакрал райисполкомрал председательну. Ва даврийгу ванал цала бусса гуж бихьлай зий ивкIун ур райондалул агьалинаха. Жамалуттин буслай ур цува ва даврий усса чIумал, хъунисса кумагру буллай, райондалул чIарав бавцIуну бивкIшиву республикалул хъуними, лакрал миллатрал хъунисса давурттай зузисса инсантал. Хаснува барчаллагьрай кIицI лаглай ур га чIумалсса республикалул Госпландалул председатель ШавкIратусса Аьбдулла ХIажиевлул, госбанкрал Дагъусттаннал отделениялул хъунама Сиражуттин Илиясовлул, МахIачкъалаллал муххал ххуллул хъунама Гъази Гъазиевлул, Пенсионный фондрал хъунама Амучи Амуттиновлул, Дагъусттаннал мостоуправлениялул хъунама Шамил Бугъуннаевлул, «Дагавтодорданул» хъунаманал хъиривчу Оьмари Аскандаровлул, Халкьуннал Мажлисрал председательнал хъиривчу ЧIаящатусса Абакар Аьлиевлул, Дагъусттаннал экономикалул министр Рапи Абакаровлул ва мукунма цайминналгу цIарду. Жамалуттин цувагу гай шиннардий зий ивкIсса коллективирттаву хъунмасса хIурматрай, бусраврай ивкIссар, ва кIулми цIанакулгу, укунмасса инсантал бикIу, га чIумал лахъсса къуллугъирттай зий бивкIми бикIу, ванал инсаншиврия, дакI марцIшиврия, хъиншиврия буслай бур.
Райондалий тачIав щилчIав муниннин къадурсса давуртту дурссар му чIумал партиялул райкомрал цалчинма секретарьну зузисса АьвдурахIман ХIусайновлул. Му чIумалли райондалий тIивтIусса Николаевуллал заводрал филиал, Аьбдулла ХIажиевлулгу кумаг бувну, МахIачкъалаллал модельный уссал фабрикалул филиал ТIулизматусса Максим Умахановлулгу кумаг бувну, ювелирный цех. Вай предприятиярттай зий ивкIссар аьмну 150 инсан. АьвдурахIман ХIусайновлулли бувну къуртал бувсса партиялул райкомрал администрациялул къатри, бувссар райкомрал зузалтрансса кIиразивулийсса къатри, бувтIуссар Гъумукух асфальт, дурссар чIярусса цаймигу давурттив, — буслай ур Жамалуттин.
Ванал буллай байбивхьуссар, яла Жамалуттиннул къуртал бувсса, райисполкомрал администрациялул кIизивулийсса къатри. Райисполкомрал хозспособрай Гъумук бувссар мукьва кулпатрансса къатригу.
Исполкомрал председательшиву дуллай 5 шин хьуну махъ Жамалуттин, партиялул обкомрахь ва даврияту итаакьара увкуну, лавгун ур райондалул халкьуннал контрольданул председательну. Шиккугу ванал хъунмасса захIмат бивхьуну бур машлул ва махъсса цаймигу предприятиярттай низам дихьлай.
1990-ку шинал, райондалул хъуниминнал ва ГьунчIукьатIрал жяматрал тавакъюрайн бувну, Жамалуттин лавгун ур «ЯтIул ттугъ» колхозрал председательну. Райондалул къуллугъирттай зий уна ванал чIявуну учайсса бивкIун бур колхозирттал председательтурахь: «Зу га колхозрая ччатI канай буру, му ччатI хьун буллай зузисса гай колхозниктурангу булара ччатI», — куну. Утти ванан цанмагу ччан бивкIун бур цува тIийкун колхозрал председательшиву дан шайсса бурив бакъарив ккаккан. Най буна учин, ва ур шайсса бивкIун бур тIий. Ванал хъунмасса гъира бивкIун бур колхоз тIутIайх дичин дан, колхозниктурал маэшат хъинну гьаз бан, гай халкь ххари бан. «Ци банссар, Совет Союз ппив дурну, хIукуматрал политика мархлуцIакул даххана хьуну, къаивтунна ттула даву дузрайн дуккан дан», — тIий ур Жамалуттин. Муниха зийрив ва унгу-унгуну айивхьуну ивкIун ур.
1990-ку шинал июльданул 10-нний колхозрал председательну авцIуну, августрай ванал Министртурал Советрал председательнал цалчинма заместитель АьбдулбасировлучIан лавгун, 150 га ппиринжрал дугьансса ихтияр ларсун бувгьуну бур. Ца-кIира шинал мутталий ванал, цала гьалмахтурал, министртурал, хъуниминнал кумаграйну, кьювкьу багьлун ларсун дур чIярусса, хозяйствалун чара бакъа аьркинсса техника: ххулув байсса, цалагу зузи къабувсса, цIусса комбайн «Немка», трактор К-700, цIусса, цавагу ккип къабавхIусса рулонный пресс, 5 трактор «Белорусь», бульдозер, ппиринж ттихIайсса комбайн, машина ГАЗ-53, роторная косилка ва м.ц. Ва техника чара бакъа аьркинну диркIун колхозрал маэшат гьаз бан. Амма, колхозрачIа вай ласунсса арцу дакъашиврийн бувну, баххан багьну бур ризкьи, хаснува ятту. Ванал пикри бивкIун бур 3-4 шинавун ятту-гъаттара бивкIссанияр хъиннува чIяву бансса. Ци банссар, къаивтун ур ва цала ххаллилсса пикрирду дузрайн буккан бан.
— ГьунчIукьатIрал жяматращал зий ивкIсса шинну дакIнийн дичлай учин, ххаллилсса жямат бия, буххаву къакIулсса зузалт бия, шяраваллил жяматрай хъинну дакI цIуцIисса, миннал чIарав бацIан ччисса, му чулинмай цащава шаймур буллалисса гьунчIукьатIи бия шагьрурдаймигу. Мукунминнавассар Сиражуттин Дандамаев, Мустапа Ибрагьимов, АхIмад Къушиев, Зиябуттин ХIажимирзаев, Амин Аьбдуллаев, ХIажибутта ХIусайнов ва чIявусса цаймигу, — тIий ур Жамалуттин.
Пенсиялийн укканнин шинну дурну дур Жамалуттиннул Лакрал райондалул администрациялул бакIчинал хъиривчуну зий. 2007 шиная шинай шава ур игьалаглай.
Чув зурчагу, исполкомрай, райкомрай, кказитрал редакциялий, колхозраву, хъинну ххуйсса инсантал бакIрайн багьайва цайнма тIий ур Жамалуттин.
— Ттула уссу-ссу бакъахьурчагу, на нава хъинну талихI бусса, тIайлабацIу бусса инсаннан ккалли увара. Ттул оьрмулуву хъунмасса тIайлабацIу хьуссар ххуйсса кулпат бакIрайн багьаву. Ттун хъинну ххирар гъан-маччами, гьалмахтал, аькьлу бусса, дакI ххуйсса инсантал. Ттул ниттил учайва: «Ттул арс, ттун чIявусса инсантал къатлувун буххайсса чIуннугу ккаркссар, цучIав къауххайми чIуннугу ккаркссар. Инсантал къатлувун къабуххайсса чIун къаккакканнав вин, ттул арс», — куну. Му зукьлу бавцIунни ттуха. Мукунмасса, хъамал ххирасса, кулпатгу бакIрайн багьунни, лажин-дакI тIиртIусса. Адаминал талихI бусса-бакъасса мунал кулпатрайну кIул шайссар, му чулуха на хъинну талихI бусса инсанна, — тIий ур Жамалуттин.
Жамалуттиннул кулпат Аьишат зий бивкIун бур райкомрай бухгалтерну, махъ банкрай.
— Ттул ца хъунмасса талихI ялагу бур – душ Лаура, ххаллилсса, инсаншиву дусса, нитти-буттах, гъан-маччаминнах ччаву дусса, мунил ур 3 ххаллилсса арс — буслай ур Жамалуттин.
Амма ванияр ца-кIира шинал хьхьичI жагьилсса оьрмулий аьпалухьхьун лавгун ур Жамалуттиннун ва Аьишатлун цала арс куна ххирасса куяв Тимур. Ци банссар, нахIумур кунма, оьлумургу бухIан багьай инсаннан.
Оьрмулул 80 шинащалгу барча уллай, чIа тIий буру вин, хIурмат бусса Жамалуттин, кулпатрая, душния, душнил оьрчIая дазу-зума дакъа ххарисса ва цIуллусса шинну!
