ЧIявусса директортал баххана хьуссар Вихьуллал дянивмур даражалул школалий га тIивтIуния шинмай. Гай директортурал кьюкьлуву ца яргсса кIану бугьлай ур 22 шинай ва школалий каялувшиву дуллай ивкIсса Чупанов Зайнуттин Аьбдуллаевичлул. Ванал цIагу, цувагу къакIулсса Ккуллал райондалул учительтураву ва къуллугъчитураву бюхъай чансса бакъа къабикIан.

Зайнуттиннущал на кIул хьуссара нава Вихьуллал школалий зузисса чIумал. КIул шаврищал, жу чIал къавхьуну дусталгу хьунав.
Зайнуттин ия чурххал ув­цIусса ва лахъсса, лажиндарал лишанну тIайласса, гьавасрал виувцIусса, зирангсса жагьил.
Нава Ккуллал райондалул школардал инспекторну зузийнигу, ОНО-рал хъунаману усса чIумалгу, Зайнуттиннул цIа кIицI дайссия ххуйну зузисса учительтурал цIардащал. Махъату, нава ЧIяйннал дянивмур даражалул школалул директорну зузийни (11 ш.), Зайнуттин Аьбдуллаевичгу зий ия Вихьуллал школалул директорну. Жу ччя-ччяни хьунабакьайссияв батIавурттай, семинардай ва цайми-цайми иширттай.
Январь зурул 7-нний Зайнуттиннун ниттил увну там хъанай дур 80 шин.
Чупанов Зайнуттин Аьбдуллаевич увссар 1935-ку шинал Вихьуллал шяраву. Ванал оьрчIнийсса шинну, та чIумалсса цинявппагу оьрчIал кунна, захIматсса диркIссар. Зайнуттиннун оьрмулухун дакIний лирчIссар ккашилсса дяъвилул шинну, мучIая бувсса гьухъа, навтлил чирахъ, кIурая дурсса щекьи, дуклаки оьрчIал ишла буллалаврил хилчIа хьусса лу­ттирду.
Зайнуттин Аьбдуллаевичлул къуртал бувссар цала буттал шяраву биял бакъасса дянивмур даражалул школа, 1956-ку шинал – Буйнакскаллал 1-мур педагогикалул училище. Гара шинал тIайла увкссар зун Вихьуллал дянивмур даражалул школалийн, лакку мазрал ва литературалул учительну. Нагу Зайнуттиннущал ва школалий зий ивкIра 1960-ку шинайн ияннин.
ЛяличIину кIицI бан багьлай бур Зайнуттиннул, лакку мазрал ва литературалул дарсру дишаврищал, музыкалулссагу дихьлай ивкIшиву 5-8 классирттаву. Музыка ванал оьтту-ттурчIавунма бувххун бия педучилищалуву дуклакисса чIумалва. Зайну­ттиннул аккордеондалий, гармондалий балайрдахун макьанну къадурцуну царагу концерт къалагайва школалий. Гармон бищайва ванал хъатIайгу, байраннайгу, дустуращалсса мажлисирттайгу. Зайнуттиннул усттарну бищайссар скрипкагу.
Буйнакскаллал Цалчинмур педучилищалуву ларсъсса кIулшиврий гьашиву къадурну, Зайнуттин 1962-ку шинал заочнайну увхссар дуклан Да­гъусттаннал паччахIлугърал университетрал тарихрал факультетрайн. Ххуйсса кьиматирттащал къуртал бувссар му. Ванан дуллуссар ларайсса категориялул учительнал цIагу.
Итххявхсса, аькьлу-кIулши гьартасса, цаятура кьянкьасса тIалавшин дайсса инсан ушиву чIалай, 1979-ку шинал Зайну­ттин ивтссар Вихьуллал школалул директорну. Ва къуллугърай зий, Зайнуттин Аьбдуллаевичлул чIалачIи бувна цува мяйжаннугу бюхъу-гьунар бусса, дуккаврил ва тарбиялул даву лавайсса даражалий дачин дан кIулсса педагог ушиву. Чупанов Зайнуттин директорну зузисса шиннардий (22 ш.) Вихьуллал школалул лажин диялну ххуй чулиннай даххана хьуна. ЧIаланну гьаз хьуна дуккаврил ва тарбиялул даврил даража, цIакь хьуна школалул учебно-материальныйсса гьану. Капитальныйну, унгу-унгуну бакьин бувна бух хьусса школалул корпусру. КIинттул классру щинай гъили буллалаврийн бувкIуна школа. Школалул лагма дацIан дуруна чапар. Райондалий ва республикалий гьарца шинал дуллалисса олимпиадарттай, мукунма спортрал бяст-ччаллаву, дуклаки оьрчIал хьхьичIунсса кIанттурду бугьайва. 1993-ку шинал Вихьуллал школа ххув хьуна республикалул телевидениялул баян бувсса «Истоки» тIисса конкурсрай…
«Ттун тIайлабацIу хьуссар нава директорну зузисса шиннардий ттула даврицIун кабакьлай бикIаву учительтурал коллектив, цалва пишалул ус­ттартал», — тIий ур Зайнуттин Аьбдуллаевич. Ялагу ва буслай ур цалла давриву 50-гу шинай цанма эбратну бивкIшиву цIанихсса педагог, Вихьуллал жяматравугу, райондалийгу бусравну бивкIсса Аьлиханова Сиянат (аьпа баннав цил).
Школалийсса даврил чIя­русса чIун «канай» дунугу, Зайнуттин хьхьичIунну хIала уххайва жяматийсса давур­ттавухгу. Ва ия КIулшиву дулаврил управлениялучIасса ва Вихьуллал шяраваллил администрациялучIасса Советирттал членнугу.
Дуккаврил ва тарбиялул давриву хьун дурсса ккаккиярттахлу Чупанов Зайнуттин лайкь хьуссар наградарттан. Миннувух кIицI данна укунсса бахшишру: Халкьуннал просвещениялул отличник, Дагъусттан Респуб­ликалул лайкь хьусса учитель, ЗахIматрал ветеран ва чIярусса ХIурматрал грамотартту.
АрулцIалла шинавун увхсса чIумал, Зайнуттин хушрай даврия увкьуна. Увкьуна цIу бунува, жяматрачIа бусраврай унува. Вагу ванал аькьлу-кIулшилул, хасиятрал ца лишанни.
Зайнуттин Аьбдуллаевичлул бур цалва хасиятрацIун бавкьу­сса кулпат Мариян, амбулаториялул акушерка. Вайннал хъунигу бувну, дуккингу бувну, давур­ттай бивтунни 3 душ ва 2 арс.
Жува учарухха «наниналли ххуллу битайсса», куну. КуртIсса дур вай мукъурттил мяъна. Зайнуттиннулгу бивтунни мяйцIалла шинал манзилданийсса оьрмулул ххуллу. ЧIалай бур нахIакь дан къабувтшивугу.
Ттула дуснан, хъуннасса кьинигу барча дуллай, чIа тIий ура цIакьсса цIуллушиву, тирхханну, оьрчIая, оьрчIал оьрчIая неъмат ккаккаву, оьрмулий барачат бишаву.
Ися МахIаммадов,
Дагъусттаннал лайкь хьусса учитель