![](https://ilchi.info/wp-content/uploads/2020/07/39adc23a-287x300.jpg)
[dropcap]В[/dropcap]ай аварасса зурдардий ахIвал-хIал кIюласса, чIяву оьрчIру бусса кулпатирттал чIарав бацIлацIиминнавух бия табасаран миллатраясса ХIусманова Диана АьбдулахIадлул душнил
каялувшиву дуллалисса «Благие дела» тIисса цIанилусса группагу. Ванихь, ванил каялувшиндаралу зузисса махъсса жагьилтурахь кказитрайхчин барчаллагьрал махъру учара тIисса тавакъюрайсса инсантал бур, миннавух – лакгу.
Бадрижамал Аьлиева
Дианал мархри бур Дарбантуллал райондалийсса Рубас шяравасса. Оьрмулул 3 шинаву бивзун, нитти-буттащал ялапар хъанай бивкIун бур Тамбовуллал областьрай ва Бакуй. Азирбижаннай дяъвилул ишру сукку хъанан бивкIукун, махъунмай цила шяравун бивзун, микку къуртал бувну бур Дианал школа. ДГУ-лул филологиялул факультетгу бувккуну, махъсса 19 шинай ялапар хъанай бур Минводы шагьрулий, зий бур школалийн гьаннинсса кIулшиву дулайсса центрданий педагогну. Цуппалу цила 3 оьрчIалсса буллалисса ванин кIулну дур хIал-ахIвалат кIюламиннал тагьаргу.
Ванияр 5 шинал хьхьичI соцсетирдай Дианал итталун дагьну дур Детдомрайсса оьрчIал ялтту уккан гьан ччисса ца инсаннаясса, цащалва архIал бизанминнах луглагисса баян баву – Диана хIала бувххун бур му давривух. Мукунма хIала бувхсса цайминнащал архIал цачIун хьуну, ларсун дука-хIачIанмургу, лавгун бур ятинсса оьрчIачIан. Гихунмай мукунмасса аьрххирду цикссагу хьуну бур.
ЧIун ларгун, му группалувусса инсантал чIявуми лавгун ва даву Дианал сайки циллалу дачин дурну дур. Цилва лагма цаймигу лаган бувну, «Благие дела» тIисса группа сакин бувну бур. Хаснура пандемия сававну инсантураща зун къахъанахъисса чIумал, вайннал кумаг МахIачкъала ва Каспийск шагьрурдайсса цикссагу кулпатирттан бучIину лявкъуну бур.
Барчаллагь вин, Дианай, инсантуран буллалисса ка-кумаграхлу. Вил каши цалнияр цал бюхттул хъананнав!