Хъусращиял школалалий хьунни Аьрасатнал ва Дагъус­ттаннал Халкьуннал артист, Аьрасатнал ва Дагъусттаннал ПаччахIлугърал премиярттал лауреат Ширвани Чаллаевлул оьр­мулул 80 шин там шаврил юбилейран хас дурсса шадлугъ. Му сакин дурну дия Аьрасатнал кIулшиву дулаврил бусравсса зузала Савдат Тахакьаевал.

Зулайхат Тахакьаева
Ширвани Чаллаевлул чирчусса Дагъусттан Республикалул гимн руцаврия дайдирхьуна шадлугъ, цинявппагу лавай бивзун.
Гихунмай Савдат Тахакьаевал бувсуна композиторнал оьр­мулия, мунал авадансса творчествалул ирсирая, дуниял хIайран дурсса произведениярттая, бюхттулсса наградарттая.
Хъирив гьарцаннан бю­ххансса ихтилат бувна Гъазиева Нурижатлул: «Ширвани Чаллаев жула миллатрал ттиркьюкьир, пахрур. Ссавнийсса цIурттавусса барзри, цIансса хьхьурду чанна лахъан дуллалисса. Ватанлувтурал дакIурдиву тачIавгу лагь къахьунтIисса чани буллалисса чирахъри. Зума авхънахь хъян излазисса, хъямала агьлагьисса, хъяхъа тIисса тIутIул къуп кунасса, буттал шяравалугу, шяраваллил агьлугу, Лакку кIанугу ххирасса Ширвани Чаллаевлун оьрмулул 80 шин шаву – му жулла цинявнналагу хъуннасса байрандалун ккаллисса ишри. Ва дунияллий кIа ссавний дяхтта битлатисса бургъиха, хьхьувай ттурлу дакъасса ссавний пар-пар тIисса цIурттал дяниву пперха тIисса чаннацIукуха, жула барзунттайсса марцIсса щаращава нанисса замзамрал щинаха, ардаравсса яла кьанкь нахIумур тIутIуха лащан ан лайкьсса инсанни Ширвани Чаллаев. Ванал чирчусса гимнраву жунма асар хъанай бур зунттавух бишлаши­сса мурчал хIукъугу, уртту-тIутIал ттюнгъасса щурщугу, щаращал караматсса жюржугу, гъинттул чявхъа гъаравух бувксса аьтар­ттал гьалак дуккан дурсса неххал аьраттал­сса ххур­ххугу, багъирдаву мурхьирдай балай тIутIисса лелуххантрал чIурдугу, архниятусса хьхьирил чавхьгу.
Жун цинявннанагу ххира­сса, язисса шяравучу Ширвани Рамазанович! Вил юбилей барча дуллай, чIа тIий буру вин лахъисса оьрму, жуллагу дакIру ххари дуллан, кьатIаллил билаятирттал агьлугу хIайран буллан. Вила шаттирдайх лавгун, дунияллийх машгьур хьусса арс Камилгу вила къириятран лав­хьхьусса хьуннав, винма аьзиз­сса душ Мариянгу ина ххари уллансса бизаннав!».
Ихтилатрал хъирив Нурижат Давудовнал цила дарс дишай­сса оьрчIащал увкуна Ширвани Чаллаевлул «Скажите, горы» тIисса балай.
Композиторнан хас був­сса ихтилатру бувна шяраваллил администрациялул бакIчи Эдуард ХIажиевлул, учительница ТIагьират Давдиевал, биб­лиотекалул зузала Сабрина ХIажиевал.
Дуклаки оьрчIал бувккуна Манашир Якьубовлул Ширвани Чаллаевлул 50 шинал юбилейран хас бувну чивчусса луттиравасса бутIри, кказитирттайсса макьаларттавасса парчри. Гьарцагу дуклаки оьрчIал мукъуву асар хъанай бия республикалул цIа бюхттул дурсса шяравучунаясса пахругу, мунахсса ччавугу. Экрандалий ккаккан бувна Ширвани Чаллаевлул цалалу ва Дагъусттаннал Халкьуннал артистка Лариса ХIажиеващал тIутIисса балайрду.
Композиторнал дакьин дур­сса халкьуннал макьандалухун балай увкуна Нурижат Гъазиевал.
Ширвани Чаллаевлул юбилейран хасну школалий дур­сса давурттая буслай, Савдат Тахакьаевал кIицI лавгуна «Детст­во без границ» тIисса республикалул конкурсрайн гьан дур­сса Аминова Шавлухълул «Жемчужина нашего села» тIисса даву (каялувчи С. Тахакьаева) лайкь хьушиву Республикалул КIулшиву дулаврил министерствалул чулухасса ХIурматрал грамоталун. Мукунна вава министерствалул грамоталун лайкь хьуну дур ЩайхахIма АхIмадовлул каялувшиндаралу ванилла чирчусса «Дагестанцы в разных широтах мира» тIисса давугу.
Шадлугъ къуртал дуруна 2001 шинал хьусса, оьрмулул 65 шинан хас дурсса, школалул учительтуращалсса ва дуклаки оьрчIащалсса хьунабакьаврия махъ Ширвани Чаллаевлул школалун пишкаш бувсса, Манашир Якьубовлул цаятува чивчусса луттирай бувсса байтлийну:

Барчаллагь вин, учкъулай,
ттун оьрчIшив
дакIнийн руртсса.
Зухьхьун учительтурахьхьун
цIуллушиву чурххахьхьун,
Тархъаншиву дакIнихьхьун!