Ккуллал райондалийсса шяраваллавусса школардай 25-нний майрал рирщунни махъра-махъсса занг.Бунияла вай оьрчIал чIюлушиврух, исвагьишиврух, архIалва низамрай саргъунну бацIаврил буслай бия оьрчIру гьавас ххину бушиву. ТIабиаьтрал чIунна дур мукунсса — гьарцазат чантIа тIисса, цалла яла ххуйми лаххияртту кьатIув дуккан дуллалисса.
«Жула оьрчIру оьмулул тIутIиври» тIисса калима, мукъурттийнусса дакъа, бунияласса душиву га кьини тасттикь хъанай бия.Ккуллал райондалий гьашину 11 класс къуртал буллай бусса бия 90-луннийн бивсса оьрчIру.
Ттуннив га кьини бахтти хьуна, махъра-махъсса занг ришлашийни 1965-ку шиная махъ гьуртту хьун къавхьусса, нава къуртал бувсса Вихьуллал школалийсса байрандалул кьинилувух гьуртту хьунгу, тамаша бувангу. Футбольданий буккай майданнив школа къуртал буллалисса ацIа оьрчI-душ (ххюя оьрчI, ххюва душ) ца чулух, гайннайн къаршину 1-мур классрал оьрчIру бавцIуну бия лагма хьхьа бавхIусса лагрулуву. Мукьилчинмур классравун бияннин школа къуртал буллалисса оьрчIал классрал каялувчину бивкIун бия ХIусайнова Аьйша, ганияр махъ ххюлчинмур классрава 11-мур классравун бияннин вайннал классрал каялувчину ивкIун ия Чаринов Чарин . Махъра-махъсса занг рищаврин хас дурсса тяхъашивуртту дачин дурну бия 
Вихьуллал школалул директорнал хъиривмур МахIаммадова Жинасат.
ОьрчIру школа къуртал баврищал, тIайлабацIулийну ЕГЭ дуллуну цалла язи дургьусса касмурду лархьхьуну оьрмулуву тIайлабацIулийн букканнав тIисса чIа тIутIавуртту кIицI дуруна: Вихьуллал школалул директор МахIаммадов Аьлиллул, оьрчIал классрал каялувчитурал Чаринов Чариннул, ХIусайнова Аьйшал, оьрчIал нитти-буттахъал МахIмудиев Мяммащаллал, Мянчиева Зумрутлул, Вихьуллал шяраваллил бакIчинал Сулайманов СайкIул ва цайминналгу. Хъирив школалул директорнал МахIаммадов Аьлиллул оьрчIан, учительтуран дуллуна грамотартту, дипломру Республикалул, райондалул олимпиадарттай хьхьичIунсса кIантту бувгьуминнан.Яла махъру буллуна цахьхьунма оьрчIахьхьун. Вайннал цахьра дарсру дихьлай бивкIсса дарсирдал учительтал так-такну дакIнийн бичлай, вайннахь цивппа ва оьрмулул дяликIулийн лахъан баврихлу хъунмасса барчаллагьру тIутIишиву бувсуна.Ганияр махъ 1-мур классрал оьрчIал школа къуртал буллалиминнан чIучIиндалул пIитIурдавусса тIутIив дуллуна, хъуними оьрчIалгу ххуйсса пакетирттаву дирхьусса школалул кьай-кьуй дуллуна. 1-мур классрал оьрчIал каялувчину бия Аьбдуллаева Сааьдат. Гания гихунмай ванил каялувшиврулу оьрчIал увкуна балайрду, дурккуна дикломацияртту, бивзуна къавтIун. ОьрчIру барча буллай, ххуйсса махъру лавхъуна Вихьуллал шяраваллил Культуралул къатлул директор ХIасанхIусайнова Рукьижатлул, худрук Оьмариева Камилатлул . ОьрчIру барча буллай, балайрду увкуна: БухIанова Заннишатлул, ХIусайнова Зугайнатлул, Мусаева РайхIанатлул, ХIасанхIусайнова Рукьижатлул ва цайминналгу. Ганияр махъ рирщуна махъра-махъсса занг. Ялагу къавтIавуртту, тяхъашивуртту лахъи ларгуна. Ххуллухъин баннав зун оьрчIрув!
ХIадур бувссар ХIажимурад ХIусайновлул
