Майрал 23-нний ДучIиннал шяраву бивщунни школа къуртал буллалиминнансса Махъва-махъсса гюнгутIи.
КIюрххила школалул хIаят тIутIавун дахьлаган дурну, чанна лахъан дурну дия чIюлуну лархсса выпускниктурал, миннахь ххуллухъин учин бувкIсса нитти-буттахъал ва мюрщими классирттал дуклаки оьрчIал.
ОьрчIру цIусса оьрмулул ххуллийн тIайла буккан, миннахь тIайлабацIу учин бувкIун бия ЦIуссалакрал райондалул администрациялул вакил, ДучIиннал шяравасса СултIанат ЦIунтIаева, шяраваллил администрациялул хъунама АбутIалиб Аминов ва цаймигу бусравсса хъамал. Ва кьинисса байрандалийн, мукунма, бувкIун бия хьхьичIва шикку дуклай бивкIсса, Гьамиящиял школалул дуклаки оьрчIру ва миннал нину-ппу.
ЦIуминалийсса ДучIиннал школа зий бур 2000 шиная шинмай. 2010 шинал вай бивзун бур уттизаманнул тIалавшиннардай бувсса кIизивулийсса цIусса къатравун. ХIакьинусса кьини ва школалий зий ур 23 учитель. Гьашину 11-мур класс къуртал буллай ур 13 дуклаки оьрчI. Школалий каялувшиву дуллай бур даврил опыт бусса, жагьилсса пишакар Бахттун Шуаьевна. Гьашину итабакьлакьисса 11-мур классрал каялувчи ур ва школалий зий чIярусса шинну дурсса, дуклаки оьрчIангу ххирасса, коллективравугу хIурмат лавайсса учитель МахIаммад Неъматуллаевич. Ва классраву марцIсса «ххювардай» школа къуртал бунни Оьмарова Шакиратлул. Шиккува кIицI бан, ДучIиннал школалий чансса бакъар итххявхсса, гьунар бусса оьрчIру. Хъунмасса бияла бур оьрчIан куртIсса кIулшивуртту дуллалисса учительтурахь. Бур вайннаву личIи-личIисса бахшиширттан лайкь хьусса хьхьичIунсса учительталгу.
Махъва-махъсса гюнгутIул байрандалий оьрчIру барча буллалисса ва миннахь ххуллухъин тIисса ихтилатру бунни школданул директор Бахттун Шуаьевнал, школалул завуч МахIаммад Неъматуллаевичлул, цалчинсса учительница Аьйша ЯхIияевнал. Нитти-буттал цIанияту махъ лавхъунни Исмяилова Аминатлул.
Школа къуртал буллалисса оьрчIал цивппа дакIний личIансса бахшишру дунни учительтуран ва 1-мур классрал дуклаки оьрчIан. Шеърирдайну ва балайрдайну миннал барчаллагь увкунни цахьра дарс дихьлай захIмат бивхьусса учительтурахь. Мюрщими классирттал оьрчIалгу школа къуртал буллалиминнахь чаннасса ва ххарисса оьрму чIа тIисса махъру увкунни. Выпускниктурал тапшур бунни школалул ттугъ хъирив нанисса классрал дуклаки оьрчIайн, школалул ххаллилсса аьдатругу, бюхттулсса цIагу лайкьну дуруччияра тIий.
Махъва-махъсса гюнгутIи бивщусса чIумал, оьрчIру школалия личIи хъанай, якьама бувккунни учительталгу, цивппа оьрчIругу. Школа къуртал буллай тIий, хъювусуллу буклай, выпускниктал ришлай бия дакIний личIансса суратру, куннал гьухърай кув дуллай бия тIайлабацIу чIа тIисса чичрурду. Школалийсса байран къуртал хьуну махъ, оьрчIру лавгунни шагьрулийн цивппа кунмасса выпускниктуращал хьунабакьин.
