Литературалул шинал лагрулий, ларгсса нюжмардий Ккуллал райондалий хьунни творчествалул десант: Лакрал театрданул хъуни-хъунисса проектирдал («ПартIу ПатIима», «Хан-Муртазяли», «Камаллул Башир», «Бургъил ккуртта», «Аьрщи ва ссав» ва чIявусса цаймигу) художествалул постановкартту дузрайн буккан бувсса Аьрасатнал лайкь хьусса художник,
ДР-лул паччахIлугърал премиялул лауреат Ибрагьим-Халил Супиянов; УзбакIисттаннал лайкь хьусса художник,
ДР-лул лайкь хьусса художник, ДР-лул паччахIлугърал премиялул лауреат, миллатрал вирттал ПартIу ПатIима ва Хан Муртазяли, Совет Союзрал кIийла Виричу АхIмад-Хан Султан абад бувсса скульптор МахIаммадаьли Аьлиев; шаэр, журналист Космина Исрапилова ва цаймигу гь
урттусса.
Зулайхат Тахакьаева
КIилчинни Лакрал театрданул коллектив Литературалул шинан хасъсса творчествалул десантращал районнайн лавгсса. Цалчинсса аьрххи хьуссия гъинттул ЧIарадиял райондалийн.
Мероприятие хьунни Аьрасатнал халкьуннал аслийсса культуралул центрдануву. Ва журалул хьунабакьавурттал агьамшиву кIицI лаглай, шадлугъ тIиртIуна Ккуллал райондалул пресс-службалул хъунама Щамххал Хизриевлул.
Лакрал театрданул каялувчитурал бунияласса къулагъас дуссар артистурал унгу-унгусса захIмат тIалавсса проектирдах. Канил ка дургьуну най дуссар ттизаманнул цIушиннардугу, буттахъал аслийсса магьирлугъгу. Спектакллаву дунияллул театрал магьирлугърал цIу-цIусса кьяйдарду ишла буллай бухьурча, концертруми дайссар халкьуннал макьанная ва мукъурттия ят къабувцун. Кьянкьасса тIалавшинна дуссар театрданул каялувчи Бадрижат МахIаммадхIажиевал балайчитурая фонограмма ишла къадан ва балайрду, хъунмурчIин, халкьуннал инструментирттахун учаван. ЧIун-чIумуй дайссар Дагъусттаннал халкьуннал инструментирттал оркестрданущалсса концертру. ЦIакьсса ялув бацIаву дуссар балайрдал мукъурттилгу, ми сайки кIурчIулттувух буккан байссар.
Мукунсса программа ккаккан дансса дия театрданул каялувчитурал творчествалул десантращал нанисса артистураясса тIалавшиннагу. «Халкьуннал балайрду шагьрурдай ялапар хъанахъиминнан ччан бикIай, ми эстрадалул балайрдая бизар хьуну бухьувкун. Шяраваллаву, тIурча, хъунмурчIин эстрадалул балайрду тIалавну бикIай», — тIий, кIихIуллану бия лавай нани ххуллий Дагъусттаннал лайкь хьусса артистка Саният Рамазанова.
Залданувун биялсса агьлу бавтIун бия райондалул культуралул цIуну бивтсса каялувчи Марина Ибрагьимовал хIарачатрайну.
Концерт дачин дурну бия гьунар ххисса ва мазрал усттарсса жулва артистал Аслан МахIаммадов ва Саният Рамазанова. НахIакьсса ляркъунни Саниятлул лавай нани ххуллийсса кIихIуллашивугу. Фонограммардай учайсса эстрадалул балайрдая, шагьрулулсса бакъасса, шяраваллалссагу инсантал шацI хьуну бунуккар. Хъинну ххуйну кьамул буллай бия гармун-дачIулухунсса халкьуннал балайрду.
Мудангу дакIнин малхIанну шайссар заманалуцIун бавкьусса, мяъна-мурадрал биялсса, Дагъусттаннал лайкь хьусса артист ХIажиаьли ХIажиаьлиевлул балайрду. Дагъусттаннал лайкь хьусса артистка Халисат Батирбековал чIуниллив зунттурдува ясир бувсса хханссия. Дагъусттаннал лайкь хьусса артистка Саният Рамазановал музыкавагу бакъанма увкуна буттахъал язи-язими балайрду. Тамашачитурал дакIурдийх ках тIисса бия Дагъусттаннал халкьуннал артистка, чIугу, дакIгу иминсса, Луиза Шагьдиловал балайрду. Ххуйну кьамул бувна спектакльданувасса парчригу: Дагъусттаннал халкьуннал артист Аслан МахIаммадовлул ккаккан бувна «АхIмад-Хан Султан» спектакльданувасса парча; Саният Рамазановал ва Луиза Шагьдиловал ккаккан бувна ЦIигьил Камаловлул «Хан-Муртазяли» спектакльданувасса парча; Ислам МахIаммадовлул, Сухраб Шуаьевлул, Юсуп Саркиевлул ва Залина Юсуповал ккаккан бувна Апанни Къапиевлул дяъвилийсса чичрурдаясса «Невыплаканные слезы» спектакльданувасса парча.
Балайрду увкуна Ккуллал райондалул магьирлугърал зузалтралгу: Саманият Аьлиевал, Шавлухъ СалихIовал, Хъусращату бувкIсса Зульфия Даллаевал ва Гриша Ванатиевлул.
Лях-карах ихтилатру бувна хъамаллуралгу. Ибрагьим-Халил Супияновлул ккаккан дурна цалла давуртту. МахIаммадаьли Аьлиевлул бувсуна цаллами давурттая. Космина Исрапиловал бувккуна лакку мазрайсса ва оьрус мазрайсса цилва шеърирду.
Ххарисса ва тIааьнсса хьуна творчествалул десантрал зунттавунсса аьрххи. Лакрал райондалул директор МахIаммад ХIусайновлул барчаллагь увкуна Ккуллал райондалул бакIчинал хъиривчу МахIаммад Чариновлухь, пресс-службалул каялувчи Щамххал Хизриевлухь ва Культуралул управлениялул хъунмур Марина Ибрагьимовахь.
