ПатIимат Рамазанова
Дагъусттаннал культуралул лайкь хьусса зузала Супиян Оьма­ров Дагъусттаннал Чичултрал союзрал лакрал секциялул хъунаману ивтунни. Лакрал культуралия, аьдатирттая хавар буминнахь Супиян цурив буслан къабагьантIиссар.

Ва лак­ралгу, къалакралгу хъатIал тямадишиву дувайсса, культуралул агьам­сса мероприятияртту дачин дувайсса инсан ур. Шеърирду чичаврил гьунаргу бусса ур. Супияннул кIива лу дунияллийн бувккун бур. Цувагу зий ур Поэзиялул театрданул хъунаманал хъиривчуну. Гьаннайсса, литературалул, культуралул мухIлу-хIин кIулсса, Дагъусттаннал чичулт ххуйну кIулсса, вайннащал щяикIлай-излазисса инсан ур. ХIурмат лавайсса, цалла тIул-тIабиаьтрайну бусрав хьусса инсан ур. Супияннул лакрал чичултращалсса дахIаву дуссар ва Ккуллал райондалий къуллугъирттай зий ивкIсса чIуннардия шийннай.

«Хаварбакъулийсса хьунни ттуннагу ва даврий итаву, мяйжанссар, ттуяр лайкьсса, биялсса луттирдугу итабавкьусса чичулт бурхха тIий уссияв, ташвишну унува бакIрайнласу буван багьунни», – увкунни Супияннул жул корреспондетнахь. Ттул пикрилийрив, Супиян лайкьссар ва даврий. Ва ур мукъул ус­ттар, маслихIатчи, насихIатчи, организаторнал биялсса опыт бусса каялувчи. Супияннун кIулссар гьарца инсанначIан цукун гъан хьун аьркинссарив, цуманахь ци учин аьркинссарив. Ва ххуйну кIулссар ХIукуматрал къуллугъчитурангу.

Ци даврий зурчагу, ци гьунарданул заллу ухьурчагу, каялувчи бюхъу бу­сса менеджер акъахьурча, даву дюхъан дувангу мунан бигьану къабикIантIиссар. Супияннул бур менеджернал бюхъугу. Миллатирттал литературалухсса хIукуматрал къулагъасгу ялу-ялун чан хъанахъисса ххай бура. Чичултрахасса аякьагу. Вай кIанттугу хIисаврайн лавсун, би­гьану къабикIантIиссар Супияннунгу. Циняв буми лакрал чичултгу, лакрал литературалий дакI цIуцIаву думигу лагма лаган бувну, сантирай даву дулланссар тIисса хьулгу бур. ТIайлабацIу баннав, Супиян!