Ларгсса нюжмардий Апанни Къапиевлул цIанийсса Лакрал музыкалул ва драмалул театрданул кIицI ларгунни 80 шинал юбилей. Мунин хас дурсса хъуннасса батIаву хьунни Оьруснал театрданул Хъунмур залдануву. Ва кьини шивун бавтIун бия лакрал ва Дагъусттаннал цаймигу миллатирттал интеллигенция.

Бадрижамал Аьлиева
Театрданул бюхттулсса юбилейрал шадлугъ дайдирхьунни театрданул тарихрая бусласисса документал кинорая.
Лакрал театрданул дайдихьу хьуну дур 1914-ку шинал Лакрал райондалий Гъази-Гъумучиял шагьрулий лакрал интеллигенциялул тIиртIусса кружокрая. Муния шиннай хIисав дулларча, жулва театрданун 100 шин хьуссагума хъанай дур. 1916-ку шинал Гъази-Гъумук бивхьуну бур Гьарун Саэдовлул «Къалайчитал». 1920-ку шинал му кружокрая хьуну бур Сяид ХIабиевлул цIанийсса Совет театр. ВКП(б) Обкомрал ва Да­гъусттаннал АССР-данул Совнаркомрал хIукмулийн бувну, 1935-ку шинал тIивтIуну бур Лакрал драмалул театр. Му тIитIлатIисса чIумалгу театрданул ккаккан бувну бур Гьарун Саэдовлул «Къалайчитал». Театрданул тарихраву яргсса цIарду ва бивхьусса яргсса пьесарду чIявусса хьуну бур: И. Балугъов, А. Жалалов, Аь. Аьлиев, А. Гунашев, ХI. Бугъанов, З. Султанов, А. ХIусайнов, М. Рамазанова; М. Чариновлул «ХIажияв ва ХIабибат», «Шагьалай», «Шумайсат», А. Оьмаршаевлул, М. Аьлиевлул, М-Х. Пашаевлул пьесарду. Театрданул художествалул каялувчину зун увцуну ур Ттуп­лисуллал театрал искусствардал институтрал режиссертал хIадур байсса отделение къуртал бувсса П. Джапаридзе. 40-ку шиннардий театрданий каялувшиву дуллай ивкIун ур режиссер А. Васильев. Буттал КIанттул цIанийсса Хъунмасса дяъви байбишайхту ватан дуруччин театрданул 13 артист лавгун ур, театргу чIумуйнусса лавкьуну бур. Дяъвилийн лавгминнава чIявуми зана къавхьуну бур. Театрданул артистал Ш. Ибрагьимова, ХI. Буттаев, Б. МахIаммадова, А. Сайпуева ва мукунма цаймигу захIматралмур фронтрай зий бивкIун бур. Дяъвилийн гьаннин театрдануву зий ивкIсса Якьуб Сулаймановлуя Совет Союзрал Виричу хьуну ур. 1943-ку шинал ахирданий театр цIунилгу зун бивкIун бур, му ппурттуву бивхьуну бур цIу-цIусса пьесарду, миннувух чIявучин ххира хьусса «Аршин-мал-Алангу». Дяъви къуртал хьуну махъ театрдануву зий бивкIун бур пишакарсса режиссертал, Аьрасатнал хъуни шагьрурдая бучIан бувсса: А. Васильев, В. Терехин, П. Джапаридзе, М. Селиванов, [tube]https://www.youtube.com/watch?v=bITysW657uQ[/tube]В. Тургенев ва цаймигу. 1960-ку шинал театр гьуртту хьуну бур Москавлив Дагъусттаннал литературалул ва искусствалул декадалий, Минкаил Аьлиевлул «Бу­ттал шяраву» спектакльданущал. Му хъинну ххуй бивзун бур, чIявуми артистуран лавайсса кьимат бивщуну, ми паччахIлугърал наградарттан лайкь хьуну бур. М. Мусалаевлун «РСФСР-данул лайкь хьусса артист» тIисса цIа, И. Балугъовлун ва Ш. Ибрагьимован «Знак Почета» орден, ХI. Ибрагьимовлун ва Аь-ХI. Жалаловлун «Дагъусттаннал халкьуннал артист» цIа дуллуну дур. 1964 шинал театрданувун бувкIун бур Б. Щукиннул цIанийсса Театрал училищалул лакрал студия къуртал бувсса 14 инсан. Гихуннайгу – кувннияр кув яргсса спектакльлу, цIарду.
60-70-ку шиннардий театрданунсса пьесарду чичлачисса драматургтурал цIардаву ххи хьуну дур Б. Рамазановлул, ЦI. Камаловлул, М. Буттаевлул, К. Мазаевлул, В. Эфендиевлул, Г. Аьлиевал, Р. Рамазановлул, М. Давыдовлул цIарду. ЛичIи-личIисса шиннардий театрданул режиссерталну бивкIун бур Э. Бамматов, А. МахIаммадов. 70-ку шиннардий, ГИТИС-рал режиссертал хIадур бай отделениягу къуртал бувну, хъунама режиссерну, яла художествалул каялувчину зун ивкIун ур цIанихсса Валерий Эфендиев.
1973-ку шинал Ереваннал художествалул ва театрал институт­раву хIадур бувну бур Лакрал театрданунсса 2-сса выпуск – Ш. Каримов, Л. Оьмарова, М. МахIаммадов, С. Мусалаев ва цаймигу. Театрданул тарихраву хъунмасса кIану бугьлагьиссар, мунил цIаний чIярусса шиннардил мутталий захIмат бивхьуссар ХIусайнаева Качардул.
80-ку шиннардий театрданувун бувкIун бур лакрал студиялул 3-мур выпускравасса яргсса артистал А. МахIаммадов, Ч. Дагирманова. Муниннингу, муния махъсса шиннардийгу театр лайкь хьуну бур цикссагу бахшиширттан, дипломир­ттан, театрданул спектакльлу цимилгу бувккун бур личIи-личIисса премиярттал лауреатъталну. Гьарта-гьарза хьуну дур театрданул репертуар. Театрданул вай махъсса шиннардий бивхьуну бур хъинну чIявусса спектакльлу, лайкь хьуну бур чIярусса ларайсса наградарттан. Аваданни ва куртIри Апанни Къапиевлул цIанийсса Лак­рал театрданул тарих. Муния буслансса чIявур.
Документал фильм ккаккан дурну махъ махъ буллунни ДР-лул культуралул министр Зарема Буттаевахьхьун.
[tube]https://www.youtube.com/watch?v=uJ4WaefxEb4[/tube]- Ххирасса дустал, аьзизсса ттул ватанлувтал! ХIакьину, мяйжаннугу, чIявумиллатру бусса жулла республикалул культуралул оьрмулуву хъинну агьамсса кьини хъанай дур. Дагъусттаннал ца яла хьхьичIавамур театрданул, авадансса аьдатру дусса, авадансса тарих бусса, жулла республикалул театрал искусствалул тарихравун бувхсса, цимигу никирал дакIурдиву куртIсса аьш кьадиртсса креативсса творчествалул проектру, яргсса цIардащалсса спектакльлу бусса творчествалул багажращалсса, Апанни Къапиевлул цIанийсса Лакрал музыкалул ва драмалул театрданул хьунадакьлай дур 80 шинал юбилей. ЛяличIийсса гьунар бусса, ххаллилсса Лакрал театрданул коллектив барча буллай ур жулла респуб­ликалул БакIчи АьбдуллатIипов Рамазан ХIажимурадовичгу: «ДакIнийхтуну барча буллай ура Апанни Къапиевлул цIанийсса Лакрал музыкалул ва драмалул театр тIивтIуну 80 шин шаврищал. Театрданул юбилей республикалул культуралул оьрмулуву хъанахъисса яргсса иширан ккаллийссар. Лакрал театрданул Дагъусттан Республикалул чIявумиллатирттал сахIналул искусство хьхьичIуннай давриву хъунмасса бутIа бивхьуссар. Лакрал театрдануву хъуни хьуссар гьунар бусса артистурал цимирагу ник, цалгу тарбия бувсса ва буллалисса цалва тамашачитураву рувхIанийшиврул ларайсса лишанну ва эстетикалул хъинсса, ххуйсса тIин-тIааьн дунияллул драматургиялул классикалул произведениярттайну ва уттизаманнул автортурал язими пьесардайну. Лакрал театрдануща, миллатрал центр хIисаврай, хьунни сахIналул гъалгъалул художествалул язими лишанну дуруччин ва авадан дуван бювхъусса сагъсса миллат­рал мазрал лаборатория хьун. ДакI дарцIуну ура театрал магьирлугъравусса зул пишакаршиврул вания тихуннайгу тамашачитуран ххаришиву дулланшиврий. ЧIа тIий ура театрданул коллективран вания тинмайгу хIазсса яргсса спектакльлу, творчествалул цIу-цIусса тIайлабацIуртту ва ккаккияртту Дагъусттаннал ва Аьрасатнал буллугъшиврул цIаний», — дурккунни Зарема Буттаевал Республикалул БакIчинал барча буллалисса адрес.
[tube]https://www.youtube.com/watch?v=sZtwSRbcO_0[/tube]Гихунмай Зарема Ажуевнал баян бунни чIярусса шиннардий­сса творчествалул захIматрахлу, театрал магьирлугъравусса хьхьичIуннай­шивурттахлу, Дагъусттан Республикалул БакIчинал ХIукмулийн бувну, «Дагъусттан Республикалул халкьуннал артист» тIисса бусравсса цIа дуллалишиву Лакрал театрданул хьхьичIунсса артистка Саният КьурбанмахIаммадован (Рамазанован). Тамашачитуран ччянива ххира хьусса ххишала бакъа гьунар бусса, итххявхсса Саниятлун ва цIа дулаву тамашачитурал хъинну ххарину кьамул бунни. «ДР-лул культуралул лайкь хьусса зузала» тIисса цIа дуллунни Эфендиев Насирдун. Республикалул БакIчи Рамазан АьбдуллатIиповлул цIа кусса ссятру дуллунни театрданул художествалул каялувчи Бадрижат МахIаммадхIажиеван, театрданул хъунама художник Аскар Аскаровлун, ДР-лул ХIукуматрал чулухасса ХIурматрал грамотарттан лайкь хьунни ХIажиаьли ХIажиаьлиев, Шамсуттин Къапланов, Юлиана МахIаммадова, [tube]https://www.youtube.com/watch?v=7GLvi9QdCM0[/tube]ДР-лул Культуралул министерствалул чулухасса ХIурматрал грамотарттан лайкь хьунни Жинасат ДинмахIаммадова, Уди Аьлиева, Ларина Оьмарова, Халисат Батирбекова, ПатIимат Какваева, ПатIимат Давидова, Аьбдул Давидов, Жанет Генжеева, Хасбулат Кьурбанов. ДР-лул Культуралул министерствалул Барчаллагьран лайкь хьунни Аслан МахIаммадов, Гулизар Султанова, МахIаммад ХIусайнов, РайхIанат Буттаева ва Шагьун Ибрагьимова. Бувсунни АьФ-лул Культуралул министерствалул чулухасса Барчаллагь Аьбдул Мурадовлун баян бувну бушиву. Театрданул даву, кIулсса иш бур, коллективрал даву душиву, цаннал тIайлабацIу, гаманая хъар шайсса, цачIусса. Мукун, театрданул щалва коллектив (сайки 40-ннийн бивсса инсантал) лайкь хьунни театрданул каялувшиннарал чулухасса Барчаллагьрал чагъардан. Министрнал чIа увкунни театрданун цIу-цIусса ххувшавуртту, бусрав, кьадру-кьимат бусса тамашачитал.
Лакрал театрданул коллектив юбилейращал барча буллали­сса махъ лавхъунни МахIачкъалаллал шагьрулул бакIчинал 1-ма хъиривчу Запир Алхасовлулгу:
— Ххирасса дустал! 80 шинал оьр­му инсаннан – му биялсса муттар. Театрданун, тIурча, му цIу-цIусса тIитIаларттал, цIу-цIусса пикрирдал, дазурдал чIунни. ХIакьину жура ккаккарду документал фильм, цивугу Гьарун Саэдовлул цIа кIицI лаглагисса. Ттун пахру бур жулва тухумрал, жулва кулпатрал цIагу мунацIун дархIуну душиврия…
Гихунмай мунал бувсунни хъунасса революционер, Дагъусттаннай цалчинсса драматург цала ттаттал къатраву гай шиннардий цимилгу лаивкIшиву га чIумул режимрая, кIицI лавгунни театр сакин шаврицIун цала ттаттал, хьхьичIавасса гъанчунал цIардугу дархIуну душиврия, ттаттал язими дустуравух Гьарунгу ивкIшиврия цува ххарину ушиву.
— Жулва хъуншагьрулул оьрмулия тIурчаннив, мунивун Лакрал театрданул ляличIиссава гьавалул ссирт духхан дуллай бур, му буцIин буллай, щаллу буллай. Барчаллагь зун мунихлуну, — увкунни Запир Мухтаровичлул.
Ванал Ямлихан ХIажиевлун, Сухраб Шуаьевлун, Анзор МахIам­мадовлун, Басират МахIаммадован, Мариян Шихамирован, Гьарун ХIусайновлун дуллунни шагьрулул администрациялул бакIчи М. Мусаевлул чулухасса бахшишру.
Театр юбилейращал барча бунни Лакрал райондалул администрациялул бакIчи Юсуп МахIаммадовлулгу цалва ихтилатраву кIицI лавгунни театрданул ххаллилсса тарих бушиву, дакIнийн дирчунни шяраваллавун театр бувкIсса чIумал щябикIансса кIанттурду бакъа бивкIсса чIунну, ххарину кIицI лавгунни хIакьинугу театрданул хъинну ххуйсса программа душиву, мунил даву цалнияр цал усттар хъанай, магьиршиву ларай хъанай душиву, язисса режиссертурайн оьвкуну, ххаллилсса постановкарду бихьлай бушиву. ЧIурчIав дунни цIанасса, цимурца интернетрал, телевидениялул ла-ялун дурсса чIумал, махъа нанисса ник тарбия давриву театрданул бугьлагьисса агьамсса кIанттуй.
Дагъусттаннал Театрал иш­ккаккултрал союзрал председатель, Аьра­сатнал халкьуннал артист Айгун Айгуновлул театрданийн миллат­рал дагьани увкунни, халкьуннал лавгмур ва цIанамур чIалачIи буллалисса, бучIантIимуниясса хияллавун бичлачисса.
— Агар инсантал занай цалва театрданувун, мунил чIаравбацIаву дулларча, тIутIайх бичинтIиссар театр, мунил ххувшавуртту чIяруссалийла гьарза хьунтIиссар. Мудангу занан аьркинссар халкь цалва миллатрал театрданувун, гьарца пьесалия махъ мунил ххуйшивурттая ва диялдакъашивурттая ихтилатру буллай, му ххалбигьлай, цанна ци ччиссарив тIалав дуллай, — увкунни ванал.
Муданма кунма аьчухсса, бю­ххансса, марцIсса лакку мазрай экьинанисса ихтилат бунни Аьбдуллаев Эса Халидовичлул.
— Ва хIакьинусса ххаллилсса батIаврийн на, батIаву къаучинна, буттахъал мазрай даккаву учинна. Ва жулла даккаву хъанахъиссар жулва театр, жулва миллат, жулва халкь, жулва тарих бивкIшиврул,
бушиврул ва мукьахунмайгу бикIантIишиврул, цалчин, шартIну, кIилчин – лишанну…
Эса Халидовичлул миллатрал театр ва миллатрал кказит хIисав бунни миллатрал кIира хъаттиран.
Сибирбаг Кьасумовлул цалва ихтилатраву ацIаву дунни театрданул махъсса шиннардий бивхьусса пьесардай. Бувсунни театрданул вай шиннардил дянив дурсса творчествалул ва граждан виричушивурттая.
ДР-лул Жяматийсса Палаталул председательнал хъиривчу Ссапарбаг Аьбдуллаевлул, театрданул муданасса тамашачи хIисаврай, ххарину ва пахрулий кIицI ларгунни театрданул махъсса шиннардийсса хьхьичIуннайшивуртту.
— Театрданул пишакаршиврул даража махъппурттуву хъинну лавай хьунни. Жу, тамашачитал, гъирарай бучIару театрданувун, ххарину ва коллективрайнсса бусрав-барчаллагьрай лагару шива. Театрданул гастроллал хъирив тIурча махъсса шиннардий лаллайвагу бакъару, щалва Дагъусттаннайхгу, Ухссавнил Ккавкказнавухгу, гихунмай, Аьрасатнал цайми шагьрурдайхгу занай бур ми, — увкуну, барчаллагь увкунни Ссапарбаглул театрданул каялувчитурахь.
Лакрал интеллигенциялул чулуха коллективран буллунни арцуйнусса конвертру.
Ахирданий театрданул коллективрал ккаккан дунни хъуннасса концертрал программа. Муниву агьамсса кIану бугьлай бия тамашачитуран ххира хьусса чIявусса пьесардавасса парчрал.
Барча, ххирасса Театр, вил 80 шинал юбилей! Хъун хьуннав вил кьадру-кьимат, чIяву баннав бусрав бусса тамашачитал!