Август зурул 16-нний ДР-лул Культуралул министерствалул актовый залдануву, бур учинсса лакрал миллатрал вакилталгу бавтIун, хьунни маслихIатшиндарал мажлис.
Микку гьурттушиву дуллай бия: ДР-лул ХIукуматрал Председательнал 1-ма хъиривчу ХIажимахIаммад ХIусайнов, АьФ-лул Конституцион судрал судья ХIадис ХIажиев, ДР-лул экономикалул министр ХIажи Султанов, ДР-лул культуралул министр Зарема Буттаева, ДР-лул Кадрардал хIакъиравусса управлениялул начальник Артур Исрапилов, ДР-лул Халкьуннал Мажлисрал депутатътал ЖахIпар Абуев, Аьвдуллагь Расулов, ДР-лул БакIчинацIунсса Ветерантурал Советрал председательнал хъиривчу Сиражуттин Илиясов, Медициналул университетрал ректор Сулайман Маммаев ва цаймигу.
Мажлис нани бувну ия Лакрал райондалул бакIчи Юсуп МахIаммадов. Мунал бувсунни район хIадур хъанай душиву хьунадакьин сентябрьданул 21-нний цал архIал кIира цаннияр ца агьамсса ва хьхьичIунсса байран – Лакрал райондалун 90 шин шавугу, Ризкьичитурал кьинигу. БавтIми Юсуплул кIул бунни му иширацIун дархIуну сакин дуллалисса программалущал. Бувсунни хъунмур шадлугъ дикIантIишиву Лакку билаятрал ца яла цIанихмур кIанттуну хъанахъисса Оьллаарив, кIикку бивщуну бикIантIишиву гьарцагу шяраваллил жяматрацIун цIакь бувсса къушру-чятирду. Бувсунни бикIантIишиву спортрал личIи-личIисса тIуркIурдугу, дучри ххяххан баврияту байбивхьуну, чару-пут личаврийн, архъан кIункIу даврийн бияннин.
Дур му байрандалуцIун цачIуну бартдигьлагьисса цайми-цайми мероприятиярттугу: Гъумучиял зума-къирагърай дацIан дантIисса аьнтIикIасса кIаландалул (къапулул) гьанулий бишинтIий бур символданул чару; тIитIинтIий бур райцентрданийсса Жагьилтурал парк; хьхьичIмур кьини Культуралул къатраву ккаккан дан най бур хъуннасса лакку концерт ва м.ц.
Райондалул хъунаманал дан-дитан дакIниймуния бувсун мукьах бавтIминнал бувунни му иширацIун бавхIусса цала-цала чулухасса мюнпатрансса маслихIатру.
Лаккуй хьун нанисса му хъуннасса мероприятиялуцIунсса аьщуй-ххуттай бавцIусса программагу, райондалул каялувчи Юсуп МахIаммадовлущалсса чIиви-хъунсса ихтилатгу жу аьлтту банну «Илчилул» хъиривсса номерданий.
Райондалул администрация оьвтIий бур Лакку билаят ххирасса цинявппагу ватанлувтурайн – му Кьинилул байрандалий гьуртту хьун, Буттал аьрщарайн биян!
Жул корр.
