Хъуннасса чIун чIарах къадурккунни Гъумучиял шяраваллил администрациялул бакIчину жяматрангу ччянияцIава ччай ивкIсса жагьилсса ХIусниев МахIаммад Камиллул арс увчIуну. Цува къуллугърай авцIусса кьинива гьавас буну айивхьунни цIусса бакIчи Лакку улклул вирдакI Гъази-Гъумучи цIубуккан бансса давурттаха зий.
Жагьилсса шяраваллил бакIчинал гъира ва шавкь чIалай, ванал сиптарду хъинчулий ккаклай, шяраваллил жагьилталгу МахIаммадлул лагма лавгунни.

Цалчинсса шаттирду МахIам­мадлул байбивхьунни шяравух рейдру даврия. Махъсса шиннардий шяравух ччи-ччинийх ургала акъа итабавкьуну бия ризкьи, хIатталливсса гьаврдура ккуччу-кьютIу дурну дия. МахIаммадлул цалва буккан бунни ризкьи хIатталлувагу, Хан-Муртазааьлил гьайкалданучIатугу. Оьвчаву дурунни жяматрайн цала-цала ризкьилул ялув бацIан, баян бунни хIатталлив ягу гьайкаллачIа биривсса ризкьилул заллухъруннай аькIри дихьлантIишиву.
Хъирив гьантрай хъуннасса субботник дунни дяшяравусса базаллуву, дух хьусса чIамурдугу ппив дурну, экьидирчунни шиннардий салкьи хьусса ччюрк.
Хъуннасса субботник дурунни колхозрал багърал чIаравсса хIатталлив. Ми давурттаву гьур­тту хьунни шяраваллил жагьилтал ва идарарттал зузалт. Арантурал дакьин дунни чапар.
Хъиривмур нюжмардий жяматрайн оьвчаву дурну, махIла-махIлардай субботникру дан бунни. Къувирду ва кьакьарду кIучI дурну, ххюл бивчуну, грейдер гьан дурну, бакьин бунни Гъумучиял КъалалучIан нанисса ххуллу. Экьидирчунни му ххуллуцIух салкьи хьусса ччюрк. ХхуллуцI ттучанну бусса заллухъруннай дюъ дирхьунни цала лагма-ялттусса кIанттай марцIшиву дуруччин.
«Шяраваллаву муданма ца яла агьамсса ва захIматсса буру­ккин бур агьали щинал дузал баву, хаснува щин микIлачIлачIисса кIинттул чIумал. Гъинттулгу гъараллу гьарза хьурча, щин оьлухъ­лай дия. Шяраваллил администрациялул пишакар Ражвадин Аьбдуллаевлущал, цаппара­сса жагьилталгу бувцуну, лавгру Ххюлусмав, щин салкьи дайсса кIанттайн. Сайки гьарца ттуршра метралул манзилданий дуссар щинал къуйрду. Ми къуйрду дусса кIанттурдайх бувккун, пишакарнащал ххалдигьарду дансса давуртту. Люкру щамарал дурцIуну дур, ми марцI дан багьлай бур. Оьллааривсса щинаххуллийгу ремонтрал давуртту дан багьлай бур. КIуруннабакIуйсса щинал кьаллугу щамарал бувцIуну бур, кIайгу марцI бан бур», — тIий ур МахIаммад ХIусниев.
Ялтту увккунни шяраваллил бакIчи шяравусса лекьавайсса къатралгу. Чансса дакъар шяраву мукунсса къатри. «Ххяххабаргъ» кказитрал редакциялул махъсса, ссанчIав аьркин къадуллай тамансса шинну хьуну, лекьавайсса къатри зерххуну, шикку оьрчIру бялахълансса майдан бан дакIний бур. Лагма-ялттусса идарарттал каялувчитуралгу ва пикри хъинчулий ккавккун бусса бур.
Лекьавай дусса дур колхозрал хIаят. Къатригу дакьин дурну, шиккун базар бизан бан дакIний ур. Шикку гьарташиву дур, гьарца журалул хъуслин цанма-цанмасса кIантту личIи бансса сант дикIанссар. Ризкьи биххайсса кIанугу хъус даххайсса кIанттая личIи бан бюхъан тIий бур. Транспортранссагу гьарташиву дур, тIий ур.
Яла къулагъас аьркинсса масъалану МахIаммад кIицI лаглай ур Гъумучиял бяр. Ттинингу жу лях-карах буслайнма буру бяр бакьин буллалисса давуртту чун дирну дуссарив. Ми сайки къуртал шавай дур. Шяраваллил бакIчинал бусласимунийн бувну, гьарцагу давуртту къуртал дурну, хьхьувайсса чани бувцуну махъ, ши­кку дан тIий дур фонтан.
«Ттуйн бияннинсса каялувчитуралгу тамансса давуртту дур­ссар райцентр цин лайкьсса даражалийн буцин. Вайннал къадурну лирчIмур дан нагу хIарачат банна. Барчаллагь тIий ура райондалул бакIчи Юсуп МахIаммадовлухь, ванал хъиривчу Абакар Къюннуевлухь, райондалул каялувчитурал кумаг бакъа, ссуссукьусса шяраваллил бюджетрацIух вай давуртту дан ка хъирив къалаянссия.
Хъунмасса барчаллагь хIакьсса патриот Гъумучатусса Шахшаев Мурадлун, 30 азарда къуруш дуллунни шяравалу цIудуккан дансса давурттан кумагран. Ттигу бур кумаг банну тIисса инсантал. Умуд бур, буттал шяраваллил ялун бучIантIимуний дакI аьтIисса чиваркIуннал ка-кумаграйну, дан дакIниймур бартдигьин бюхъан­ссар тIисса», — увкунни МахIаммад ХIусниевлул.
Жугу дакIнийхтуну тIайлабацIу чIа тIий буру МахIаммадлун. ЧIяву хьуннав вил пикрилул уртакьтал, чIарав бацIанми!