Вай гьантрай МахIачкъала шагьрулул ЦБС-рал хъунмур библиотекалий хьунни Ниттил мазрал кьинилун хас дурсса мероприятие. Шикку тIиртIуну дия лакрал шаэртурал ва чичултрал луттирдал выставка.
Мероприятиялул сакиншинначитал хьунни ЦБС-рал хъунмур Зулпат Ушанова ва оьрчIал библиотекалул (19-мур филиалданул) хъунмур Заза ХIасанова.
Андриана Аьбдуллаева
Мероприятиялий гьуртту хьунни Дагъусттаннал халкьуннал чичу Мирза Давыдов, «Дагъусттан» ГТРК-лул лакрал редакциялул хъунмур редактор Тамара Закарьяева, «Ябанну жула миллат» тIисса группалул администратор Эдуард Ибрагьимов, МахIачкъалаллал 16-мур школалул лакку мазрал учительница ПатIимат Аьлиева, МахIачкъала шагьрулул 1-мур гимназиялул учительница Фарида Юсупова, библиотекарттал зузалт. Дачин дурну бия мероприятие Амира Кьурбанова.
Мазурдил ва ниттил мазрал кьинилул тарихрая бусласисса ихтилат бунни Заза ХIасановал.
— Аьрасатнал Элмурдал академиялул мазурдил институтрал бусласимунийн бувну, Аьрасатнаву 150-нния ливчусса, лугъатругу хIисав дарча, 300-нния ливчусса мазру бусса бур.
Мазраха зузиминнал бусласимунийн бувну, махъсса 150 шинал лажиндарай 14 маз бухлавгун бур жула билаятрай, миннува 5 маз – Совет хIукумат лирну махъсса шиннардий, 20-22 маз бухлагансса нигьачIаву дусса даражалий бусса бур. Жула маз бухлаган къабитан жула бияла хъунмассар. Му жуйнма гьарнайн – нитти-буттайн, учительтурайн, жяматрайн, хъарсса ишри. Маз бакъахьурча, миллатгу бакъашиврун ккаллиссар. Аьпа баннав, Надиршагь Хачилаевлул увкусса куццуй, «лаккучунал лаккучунахь лакку мазрай къаувкусса махъ – му щала жула миллатрайн къаршину кIура баллалисса махъри», — кунни ванил.
Мирза Давыдовлул ихтилат бунни лакрал тарихрая, авадансса литературалия, лакку мазрал аваданшиврия, ва пасихIшиврия. Дурккунни цаппара цала назмурду.
Лакку мазрайсса назмурдугу дурккуну, балайрдугу увкунни МахIачкъала шагьрулул 1-мур гимназиялул ва 16-мур школалул дуклаки оьрчIал.
Цила ихтилат ххаллилсса лакку балайлий къуртал бунни Тамара Закарьяевал. Ахирданий цила балайрдайну тяхъа буккан бунни мажлис Чакарханум ХIажикьурбановал.
