[dropcap]Ф[/dropcap]евраль зурул 17-18-нний Ккуллал райондалул школарттай лакку мазрал дарс дихьлахьисса учительтурал дянив хьунни яла ххуйну дарс дишайма учитель язи угьлагьисса конкурс.

ХIажимурад ХIусайнов
Конкурс най дия кIира кьини. Цалчинмур кьини дия Ва­ччиял школалий. КIилчинмур кьини конкурсравух гьуртту хьуминнал дянива личIи увсса шама учитель хьунаавкьуна Ккуллал шяраваллил кIилчинмур школалий.

КIикку баянгу бувна цуманал цукунсса кIантту бувгьу­ссарив.
Конкурсравух гьуртту хъанай ия ххюя учитель: Ккуллал 1-мур школалул учительница Далиева Гугьарша, Ваччиял школалул учительница Мирзаева Дарико, ЧIяйннал школалул учительница Шалласуева Луиза, Вихьуллал школалул учительница МахIаммадова Зарета, Къяннал школалул учитель МахIаммадов Рамазан.

 

Учительтурал дарс дишаврин кьимат бишлай бия жюри. Жюрилуву бия: Ккуллал райондалул кIулшиву дулаврил управлениялул каялувчи ТIилиев Камил, ванал хъиривма Оьмариев Жамалуттин, управлениялул пишакартал ХIусайнов Юсуп, Аьлие­ва Жавгьар, Ваччиял школалул учительница МахIаммадова Аьйша, Хъювхъиял школалул учительница МахIмудова Магьрикаят.

Шалласуева Луизал дарс хас дурну дия Бадави Рамазановлул творчествалун. Къяннал школалул учитель МахIаммадов Рамазаннул дарс хас дурну дия Мазяйхъал Казбеклул творчествалун, мунал 70 шинал юбилейрацIунгу дархIуну. Зарета МахIаммадовал цила дарс кIура даен дурну дия лаккучунал дакIнил тIимурдай макьанну руцлацаврийн. Ва цуппагу оьрчIал хьхьичIун бувккуна Вихьуллал шяраваллил янналуву: адрилул гьухъуву, мучIал чIинчIулуву, варсул уссаву.

Му кьини дарсру дирхьусса ххюя учительнава язи увгьуна шама: Мирзаева Дарико, Шалласуева Луиза, МахIаммадова Зарета. Хъиривмур кьини Ккуллал кIилчинмур школалий хьуна вайннал классрал ссят дишаврил ва цала цивппа презентация баврил конкурсгу.

Ахирданий жюрилул дуруна жям: цалчинмур кIану буллуна МахIаммадова Заретан, кIилчинмур – Мирзаева Дарикон, шамилчинмур – Шалласуева Луизан. Бувгьусса кIанттурдан лавхьхьусса дипломругу буллуна вайннан.
Конкурсрай цалчинмур кIану бувгьусса МахIаммадова Зарета гьуртту хьунтIиссар республикалулмур конкурсрай. Жувагу чIа учинну тIайлабацIу!