«Спорт террорданийн къаршину» тIисса цIанилу Гъумук хьунни Ватан дуруччултрал кьинилун ва Авгъаннава совет аьрал буккан бувсса кьинилун хас дурсса аьдатравун дагьсса теннисрал турнир.
Му хьунни райондалул дуклаки оьрчIал, жагьилтурал ва бугьараминнал дянив.
Зулайхат Тахакьаева
Му сакин дурну дия райондалул администрациялул жагьилтурал иширттал, спортрал ва туризмалул отделданул. Отделданул каялувчи Малик ХIусмановлул барча бунни гьуртту хъанахъими байрандалущал, чIа увкунни дуккавриву ва спортраву тIайлабацIу.
Райондалул бакIчи Юсуп МахIаммадовлул цIания жагьилсса спортсментуран тIайлабацIу чIа увкунни ванал хъиривчу Макьсуд Макьсудовлул.
Бяст-ччаллий гьуртту хьунни Гъумучиял, Щардал, КIундиннал, ГьунчIукьатIрал, ЧIурттащиял, Хъунайннал, Хьурттал, Кумиял ва ШавкIуллал школарттал дуклаки оьрчIру – мукьцIалуннийн бивсса чIавасса оьрмулувусса теннисрай буккулт.
Дуклаки оьрчIал дянив бяст-ччал бия кIива категориялий: 5-8-ми классирттал дуклаки оьрчIал дянив цалчинмур кIану бувгьунни ХIусманов Мурадлул (Гъумучиял школа), кIилчинмур кIану – Сулайманов Жамбулатлул, шамилчинмур кIану – Сулайманов Рамазаннул (Хьурттал школа); 9-11-ми классирттал дуклаки оьрчIал дянив цалчинмур кIану бувгьунни Кьурбанов Русланнул (Щардал школа), кIилчинмур кIану – Муртазялиев Кьурбаннул, шамилчинмур кIану Ванатиев АхIмадлул (Хьурттал школа).
Жагьилтурал ва бугьараминнал дянивсса бяст-ччаллий гьуртту хьунни 28 инсан. Цалчинмур кIану бувгьунни ХIасанов РахIимлул, кIилчинмур кIану – ХIусайнов Альбертлул (Вихьул), шамилчинмур – Жабраилов Маликлул (Гъумучи).
Чутсса теннисрай гьуртту хьунни мяйва чут. Муний ххув хьунни ХIусманов Малик ва ЦIаххаев ХIалим (Гъумучи). КIилчинмур кIану бувгьунни Аьшаев Абусупияннул ва МахIаммадов Залимханнул (Хъунайми), шамилчинмур кIану – Жабраилов Маликлул ва АлхIасанаев Бухаринал (Гъумучи). Ххув хьуминнан ва хьхьичIунсса кIанттурду бувгьуминнан буллунни сакиншинначитурал чулухасса дипломру ва арцуйнусса бахшишру.
