Ларгсса нюжмардий Дагъусттаннал паччахIлугърал техуниверситетраву зузисса Раджабова Земфирал 50 шинал юбилей кIицI ларгунни, вузрал коллективгу, гъан-маччамигу лагма лавгун.
Университетрал ректорнал къуллугъ чIумуйну бартбигьлагьисса Н. С.Суракьатовлул Барчаллагьрал чагъар буллуни Земфиран. Ванил студентътуран цIакьсса ва куртIсса кIулшивуртту дулаврил ххуллийсса хIарачатрая, университетравугу, кьатIувгу бусрав хьунсса даражалий даву дуллай бушиврия ва элмулувугу жагьилсса оьрмулий хьхьичIунсса хIасиллу ккаккан дуваврия бия ва барча буллалиминнал гьануми ихтилатру.
ПатIимат Рамазанова
Рамазаннул душ Раджабова Земфира бувну бур Каспийск шагьрулий. Ванил ппу Ккулатусса ур, нину ПатIимат 1-мур ЦIувкIратусса дур. Каспийскалий 2-мур школагу къуртал бувну, ва дуклан бувххун бур Дагъусттаннал политехнический техникумравун. Вагу марцIну ххювардай къуртал бувну, яла бувххун бур Дагъусттаннал паччахIлугърал университетрал экономикалул факультетрайн.
1996 шинал Аграрно-экономикалул колледжраву преподавательну зун байбивхьуну бур. 2003 шинал Дагъусттаннал политехнический институтраву хъунмур преподавательну зун бивкIун бур. Шанна шинава бивтун бур информацион системардал, финансирдал ва аудитрал факультетрал деканнал хъиривчуну. ХIакьинусса кьининин вава даврий зий бур. 2009 шинал дурурччуну дур экономикалул элмурдал кандидатнал диссертация. 2019 шиная шинмай ва Дагъусттаннал кIулшиву дулаврил ва элмулул аккредитация дурсса экспертгу бур. Ванин «ПаччахIлугърал граждан къуллугърал Дагъусттан Республикалул 3-мур классрал советник» тIисса чингу дуллуну дур. Цуппа зузисса коллективрал ва студентътурал дянивгу хIурматрайсса Земфира Раджабова кIирагу шяраваллил агьулданунгу, лагма-ялттуцириннангу ххирасса ва бусравсса инсан бур.
Арс Рамазан МахIачкъала шагьрулул финансирдал управлениялул хъунама минахурну зий ур. Душ Динара «Целитель» аптекалул сетьрал провизорну бур. Лас СултIанмахIамма цаппара шиннардил хьхьичI нязаннивсса бивкIулул жуятува личIи увну ур.
ДакIнихтуну чIа тIий буру оьрмулул ва элмулул чагъиравусса Земфиран цIакьсса цIуллушиву, давривугу тIайлабацIу, дуван дакIнийсса элмулул давурттивгу бартдигьинсса тавпикь!
