Ккуллал райондалул Аьрасатнал халкьуннал аслийсса культуралул центрдануву хьунни гьарца шинал дуккаврил шин дайдишин хьхьичI шайсса райондалул кIулшиву дулаврил зузалтрал августрал конференция.

Муний гьуртту хъанай бия Ккуллал райондалул муниципал сакиншиннарал бакIчи Сяид Сулайманов, ванал хъиривчу Сабрина Илиясова, УО-лул бакIчинал хъиривчу Жамалуттин Оьмариев, Дагъусттаннал БакIчинал зунттал районнайсса вакилнал хъиривми Амирхан МахIаммаддадаев, МахIаммад МахIаммадов, Оьмари Аьлиев, райондалул вивсса 26-вагу кIулшиву дулаврил учреждениялул бакIчитал, директортал ва учительтал.
ЖанахIраву ккаккиялун дирхьуну дия кружокирттай оьрчIал дурсса кьай-кьуй.
Конференция дачин дурну ия Сяид Сулайманов. Ккуллал райондалийсса кIулшиву дулаврил иш-тагьар цукунсса дуссарив гьарта-гьарзану цалва докладраву ккаккан бувна Сяид ХIасниевичлул. Доклад хъунмасса бушиврийн бувну, кIицI буванну мивасса хъиннува агьамми масъалартту.
— ХIурмат лавайсса кIулшиву дулаврил зузалт ва педагогикалул захIматрал ветерантал, хъамал ва оьвкуну бувкIми!
Кьамул бувара дакIнийхтунусса барча баву ва совещание тIитIав­рищал ва дуккаврил шин дайдишаврищал!
Жяматрал дузалшиву, ялун нанисса оьрму ххуйну бачаву хъар хъанай бур кIулшиву, культура, аькьлу-кIулшилул луртама гьарта-гьарзасса душиврия ялун нанисса никирал. Мунияту, жулла республикалий мудангу кIулшиву дулаврил давурттив хIисав дуллай диркIссар ва уттигу дуллалиссар яла агьаммур жяматрал масъалалун. Гьай-гьай, оьрму ца кIанай бавцIуну бакъахьувкун, 90-ку шиннардил дайдихьулия шинмай чан хъанан бивкIунни жулва школардай дуклакисса оьрчIру. Ва иш щалва Аьрасатнан хасъсса ишну хъанай бур. Мунияту дуклакисса оьрчIру чан хъанахъисса чIумал, ччайнугу, къаччайнугу, школарду чан хъанай бур. Му иш бавхIуну бур зунттаву яхъанахъисса инсантал чан хъанахъаврищал. Махъсса 5 шинал лажандарай школалийн гьаннинсса оьрчIал сияхI хъунна хъанай дур. ЦIана оьрчIал 5-гу багъравун занай ур 223 оьрчI. Мукунма оьрчIал багъирдаву кIану ччиминнал сияхI дур 216 оьрчI. Умуд бур, райондалий 90 оьрчIансса цIусса багъ тIивтIуну ва Ккуллал шяраву нукIува школа бивкIсса къатри дакьин дурну махъ, 100 оьрчIансса кIану шайхту, ва иш ца чулийн букканссар тIисса. Ши­ккува кIицI буван, Хъусращиял ва Хъювхъиял шяраваллаву уттинин бивкIсса оьрчIал багъру бакьин буван харж дурссар 6 миллиондалува лирчусса арцу спонсортурал. Ва иш на хъунмасса иширан ккалли буллай ура. Барчаллагь ка итадаркьусса чиваркIуннан.
КIулшиву лахъну дуний, экономикалул ишругу шаттирал хьхьичI бачайшиву кIулсса зат бур. Ши­ккугу, гьай-гьай, зузалал пагьму-гьунар, бюхъу, кIулшиврул луртама дуний, таксса инсанналссанния байбивхьуну, жяматралми ишругу хьхьичIунмай бачайшиву кIулли жунма. Цукунсса программарду дулларчагу, жагьилтал шяраваллил кIанай бацIан баврил масъала агьамссанува личIлай бур. Мунияту жува зущал, учительтуращал, му масъала оьрчIру жула канилу школардай бунува бувчIин буван багьлагьиссар, шяравалу душиву халкьуннан ччатI буллай. Буттал улча, шяравалу, кIулшиву дуллусса школа дакIний бувгьуну, шиччаллиха зун багьлагьишиву оьрчIан бувчIин буллан багьлагьиссар…
Цалва докладраву Сяид ХIас­ниевичлул кIицI бувуна цIанасса чIумал интернетрал, компьютердал технологияртту ишла къадулларча, иш къуманивун багьантIишиву. Чара бакъа бикIан багьлагьишиву школардал сайтру, цийгу ишла буван бюхъантIисса дуклаки оьрчIаща. Ва иширал ялув хьхьарану бушиву кIицI бувна 1-мур ЦIувкIуллал, Вихьуллал, ЦIущардал школарду. Гьаз бувуна ЕГЭ дулаврил масъалагу. КIицI бувна гьашину 11 класс къуртал бувсса оьрчIава 68 дуклан увхшиву. Ми хъанай бусса бия 75% школа къуртал бувсса оьрчIава. Бувсуна 8 оьрчIан дуллушиву медаллу «За особые успехи в учении» тIисса. КIицI бувна 21-мур ттуршуку технологиярттал аьсру душаврийн бувну, учительтуран цалла кIулшивуртту, вузирдаву ларсмуний гьашиву къадурну, гьаз дуллан багьлагьишиву чIумущал бачиншиврул.
Гьаз бувуна Сяид ХIасниевичлул спортрахун, физкультуралухун машгьур шаврил масъаларттугу. Шикку кIицI бувуна ванал, улу, бугьарасса нитти-буттахъул, школалул спортплощадкалийн бувкIун, оьрчIащал цалламур цIуллу-сагъшивугу цIакь дулларча, хъиннува ххуйну бикIантIишиву. Бувсуна ГТО-лул комплекс буллан багьантIишиву. Гьаз бувна школалул оьрмулуцIун бавхIусса чIявусса масъалартту цаймигу.
Хъирив Сяид ХIасниевичлул дуллуна «Почетный работник общего образования РСФСР» хIурматрал лишанну. Ми дуллуминнавух бия Ккуллал 2-мур школалул учительтал Ризванов Кьубанчи, Кьурбанова Загьидат, Мурачуев ХIажи, Вихьуллал школалул учительница ХIусманова Жамилат, 2-мур ЦIувкIуллал школалул учительница Аьбдуллаева Саидат, Хъювхъиял школалул учительница Кьурбанова Софият, ЦIущардал школалул учительница Нурадинова Нарангул.
Школалул оьрмулиясса гьарта-гьарзасса доклад бувна Жамалуттин Оьмариевлул. Махъру лавхъуна Вихьуллал школалул директор МахIаммадов Аьлиллул, Ккуллал оьрчIал багърал хъунмур Исакьова ПатIиматлул, Ккуллал 1-мур школалул учитель Исакьов МахIаммадлул, райондалул Культуралул управлениялул хъунмур Ибрагьимова Маринал, райондалул администрациялул жагьилтурал политикалул отделданул бакIчи Чаринов МахIаммадлул, Ккуллал 1-мур школалул учитель Маммаев Рамазаннул, райондалул бакIчинал пресс-секретарь Хизриев Шамххаллул, Ваччиял школалул директор Мирзаева Бажил, МахIачкъалалия увкIсса хъамаличу МахIаммаддадаев Амирханнул.
Конференциялул ахирданий Сяид ХIасниевичлул учительтурал ва оьрчIал диялдакъашивуртту кIицI дурна. Республикалул личIи-личIисса конкурсирттаву ххуй хьу­сса оьрчIан буллуна дипломру.
Ва конференциялия махъ хьуна дарсру дишаврил методикалун хас дурсса батIавуртту. Ми хьуна Ваччиял, ЧIяйннал школардай, Ва­ччиял оьрчIал багъраву, Ваччавсса оьрчIал творчествалул къатлуву. ХIасил хъинну кIанийн дуртун хIадур дурну дия конференция.