Август зурул 31-нний Гъумучиял клубраву хьунни цIусса дуккаврил шинан хас дурсса кIулшиву дулаврил зузалтрал августовское совещание.

Зулайхат Тахакьаева
Муний гьуртту хьунни райондалул каялувчитал, ДР-лул ХIукуматрал хъунаманал хъиривчу, экономикалул ва территориал развитиялул министр
Раюдин Юсупов, ДР-лул ХIукуматрал хъунаманал маслихIатчи Жяъпар Абуев, ДР-лул культуралул министр Зарема Буттаева, ДР-лул кIулшиву дулаврил ва элмулул министрнал маслихIатчи Жамал Жамалов, ДР-лул КIулшиву дулаврил министерствалул Лакрал райондалийсса куратор Кинаят Юнусова.
Совещание тIитIлатIисса цала ихтилатраву райондалул бакIчи Юсуп МахIаммадовлул кIицI лавгуна ДР-лул БакIчи Рамазан АьбдуллатIипов республикалул ялун бучIантIимунилгу, жяматрал иш бачаврилгу хъунмур бияла хъун хъанахъисса никирал кIунттихь ккаклай ушиву – цуксса диял хьу­сса дурив му ник кIулшивуртталгу, рувхIанийшиврулгу, мяърипатралгу, мунин лавхьхьусса бушиву обществалул тIайлабацIугу.
«Ва залдануву щябивкIун бур райондалул ялун бучIантIимур цал кIунттихь бусса агьлу. Ххарира зул дянив чIявуми, жула хъун хъана­хъисса никирал ялун бучIантIимунил буруккинттарай, давриву дакI дирхьуну зий бушиврия.
ЧIаланну ххуй хьунни жучIава кIулшиву дулаврил даража. Жущава бювхъунни оьрчIру ЕГЭ дулаврийн, ахиргу, хIадур бан. Ларгсса шинах бурувгун, ххуй хьунни оьрус мазрал ва математикалул ЕГЭ-рдал хIасиллу. ЧIявуссаннал лавсунни 60-нния ливчусса баллу. 57 % школа къуртал бувминнал дуклан бувххунни лавайсса дуккаврил идарарттавун, 25 % – дянивсса кIулшиву дулайсса дуккаврил идарарттавун.
Республикалул кIулшиву дулаврил зузалтрал августовское совещаниелий ДР-лул БакIчи Рамазан ХIажимурадовичлул жулла район кIицI ларгунни хьхьичIунсса 10 райондалул сияхIраву. ЕГЭ дулаврил пунктрал каялувчинал хъиривчу Гъазиев Хайруттиннун буллунни кIулшиву дулаврил ялув бацIаврил федерал службалул каялувчи Кравцовлул цIаниясса Барчаллагьрал чагъар. Хъун хъанахъисса ник тарбия давривусса ккаккиярттахлу Республикалул БакIчинал чулухасса ХIурматрал грамота дуллунни райондалул КIулшиву дулаврил управлениялул каялувчи Явсупи ХIамзаевлун.
Амма школалун аьмсса мероприятиярттаха хъамаритан къабучIиссар оьрчIащал гьарца кьини дуллан аьркинсса давриягу. Тарбиялул давриву агьамсса кIану бугьан аьркинссар балугъравун биян бувасса оьрчIал дянив тIулдакъашиву хьун къаритансса давурттал, кIулшиву дулаврил идарарттай чялиш дан аьркинссар терроризмалул ва экстремизмалул идеологиялийн къаршисса давуртту.
2015-2016-ку дуккаврил шиннардий райондалий зий буссия кIулшиву дулаврил 25 идара, миннува 21 – аьмсса кIулшиву дулайсса. Ми идарарттай дуклай уссия 963 дуклаки оьрчI. Миннан кIулшиву ва тарбия дулавриха зий уссия 272 педагог. Дурсса анализрал чIалачIи бувсса куццуй, жучIава ца учительнан иллай ур 4 дуклаки оьрчI. Муних къабурувгун, жу хIарачат буллай буру учительтурансса харжру лахъ бан. Учительтурал ахIвал ххуй баврил чулухагу жула район дагьлай дур республикалий хьхьичIунсса 10 райондалул сияхIравун. Гихуннайгу аякьа дуллантIиссару кIулшиву дулаврил зузалтрал ахIвал ххуй бан.
Арцу дакъашиврийн бувну, жун багьунни гьашину Гъумучиял лицей ва оьрчIал творчествалул къатта лакьин. Амма вай шартIирдавугу жу лякъарду гьарца зузала даврил дузал ансса чаранну».
Хъирив кIулшиву дулаврил управлениялул каялувчи Явсупи ХIамзаевлул гьарза-гьартану бувсуна ларгсса дуккаврил шинал хIасиллая ва ялун нанисса дуккаврил шинаву хьхьичI бихьлахьи­сса мурадирттая. Ванал кIицI лавгунни, ДР-лул БакIчи Рамазан АьбдуллатIипов Халкьуннал Мажлисрайн дурсса цала Рисалалуву республика хьхьичIуннай шаврил агьамсса ххуллуну даража ххуй­сса ттизаманнул кIулшиву дулаву ккаклай ушиврийн чул бивщуну, 2015-2016-ку дуккаврил шиннардий райондалул каялувчитурал хъуннасса къулагъас дуршиву школалийн гьаннинсса кIулшиву дулаву хьхьичIуннай даврих.
Бувсунни райондалул бакI­чи Юсуп МахIаммадовлул хIарачат­рацIух Гъумук байбихьулул школалул гьанулий бувшиву ттизаманнул тIалавшиннардацIун бавкьу­сса, гьарца шартIирал дузалсса, 60 оьрчIансса, кIулшиву дулаврил идара «Солнышко». Идара зий байбивхьуссар июль зурул 15-нний. Шиккун занай буссар, Гъумучату бакъа­ссагу, ШавкIратусса, Хьуриятусса ва ХьурукIратусса оьрчIругу. Ва идара тIитIаврийну давурттал щаллу хьу­ссар 20 инсан, му бакъасса, Гъумучиял детсадрая гьивугу чан хьуссар.
ЕГЭ-рду дулавриву хьусса хьхьичIуннайшивурттая буслай, кIицI лавгунни дуклаки оьрчIру экзаменнайн хIадур бан КIулшиву дулаврил управлениялулгу, школарттал каялувчитуралгу хъуннасса даву дуршиву.
«Райондалул бакIчи Юсуп Ма­хIам­мадов цува уссия ЕГЭ-рдайн хIадур баврил ялув авцIуну шинал лажиндарай. ЧIярусса хьунабакьавуртту дурссар 9-11 классирттал дуклаки оьрчIащал, учительтуращал ва нитти-буттахъащал. Цинявппагу школарттай сакин дурну дуссия пробныйсса ЕГЭ-рду ва ГИА-рду. Мунийну бювхъунни жуща цасса экзамен ккалли бансса гъалатIругу итакъабавкьуну, низамгу лиян къадурну сакин дан», – увкунни ванал.
2016 шинал ГИА ОГЭ-рал кьяйдалий дуллуну дур 93 дуклаки оьрчIал. ЕГЭ дуллуну дур 66 дуклаки оьрчIал. Вайннава оьрус мазрал экзамен дуллуну дур 65 дуклаки оьрчIал, математикалулсса – 63 дуклаки оьрчIал.
Ларгсса шинах бурувгун ЕГЭ-рдал хIасиллу ххуйсса хьуну дур. ­Оьрус мазрал экзамендалул дянивсса балл лавсун бур 53,8 (республикалий 51,4); математикалул экзамендалул базовыйсса кьимат лавсун бур 3,7 (республикалий 3,4). ­Оьрус мазрал ва математикалул экзаменну ххуйну дулурчагу, хьхьаранура личIлай дур обществознаниялул, историялул, химиялул ва биологиялул ккаккияртту. 2018 шинал историялул ЕГЭ дикIан тIий дур чара бакъасса.
15 дуклаки оьрчIал школа къуртал бувну бур медальданущал: 4 – Гъумучиял школалул; 7 – лицейрал; Хъурхърал, Кьубиял, Щардал, ГьунчIукьатIрал школарттал.
Шама дуклаки оьрчI ливчIун ур аттестатру къалавсун: ца Гъумучиял школалул, 2 лицейрал.
Бувсунни уттинин райондалий цинявппа школартту 5-мур класс­райн бияннин зий бивкIшиву ФГОС-рай (Федеральный государственный образовательный стандарт). Гьашину ФГОС-рай зий байбивхьуну бур 6-ми классругу.
Гихунмай кIулшиву дулаврил управлениялул каялувчинал балжину бувсунни оьрчIру чансса школарттая; гьунар бусса оьрчIащалсса даврия – райондалул дуклаки оьрчIал республикалул олимпиадарттай ва конкурсирдай дуллалисса гьурттушиндарая; учительтурал пишакаршиву ларай даврия; школарттай низам дуруччаврил даву ци даражалий дуссарив; ялун ххисса кIулшиву дулаврил даврия – Гъумучиял оьрчIал творчествалул къатлувун ва магьирлугърал школалийн заназисса дуклаки оьрчIал хьхьичIуннайшивурттая.
Райондалий цалчин ФГОС-рай зий байбивхьусса ШавкIуллал школалул байбихьулул классирттал учительница Учуева Аксанал балжину бувсунни цала школалий ФГОС цукун зий дуссарив.
Райондалул ДЮСШ-лул директор Шарапуттин Хановлул бувсу­нни райондалул администрациялул Спорткомитетращал ва КIулшиву дулаврил управлениялущал цачIуну дуклаки оьрчIащал дуллалисса спортрал давурттая.
Гьашину Лакрал райондалул ДЮСШ-лун хьуну дур 35 шин. ХIакьинусса кьини микку вардиш хъанай бусса бур 14 группа – лачIунбуккаврил, боксрал, волейболданул ва настольный теннисрал секциярдал. Гьашинусса шинал райондалий хьуну бур 12 бяст-ччал. Дур турнирду аьдатравун дагьсса.
Школа сакин бувния шинмай гьашину цалчин гьуртту хьуну бур дуклаки оьрчIру республикалул кьатIувсса бяст-ччаллий – Нальчикрай хьусса щалагу Аьрасатнал лачIунбуккаврил турнирданий. Ростоврай каратэлул СКФО-лул первенстволий 3-мур кIану бувгьуну бур. КIицI лавгунни цала давриву хьунабакьлакьисса буруккинттугу.
ДР-лул КIулшиву дулаврил министерствалул пишакар Кинаят Юнусовал кIицI лавгунни Лакрал райондалий гьунар бусса дуклаки оьрчIру чансса бакъашиву. Миннал республикалул конкурсирдай гьаршинал чялишсса гьурттушинна дайшиву ва хьхьичIунсса кIанттурду бугьайшиву. Бувсунни чIал къавхьуну КIулшиву дулаврил министерствалий сакин бан тIий бушиву гьунар бусса оьрчIру сияхIрайн ласлан­сса база.
«Культура ва образование жяматрал гьанур, билаятрал бучIан­тIимунил гьанур. Мунийн бувну жула мурадругу аьмссар», – увкунни ДР-лул культуралул министр Зарема Буттаевал.
Ххи бунни «Культура детям села» программалул лагрулуву шяраваллавасса оьрчIан сакин буллай бушиву магьирлугърал идарар­ттавунсса аьрххирду. Ми уква буцлай бушиву спектакльлайн, выставкардайн.
Раюдин Юсуповлул кIицI лавгунни ДР-лул БакIчи Рамазан АьбдуллатIиповлул хъуннасса къулагъас дуллай ушиву кIулшиву дулаврил буруккинттах. Билаятрай­сса кризисрах къабурувгун, жула республикалий буллай бушиву дуккаврил идарартту. Гьашину бувну тапшур бувну бур 15 идара – 7 детсад ва 9 школа, миннувасса ца –Лакрал райондалий.
Цала давриву хьхьичIунсса ккаккияртту хьун дурсса кIулшиву дулаврил зузалтран райондалул администрациялул чулуха дуллуна ХIурматрал грамотартту ва арцуйнусса бахшишру.
КIулшиву дулаврил зузалт цIусса дуккаврил шинащал барча бан бувкIун бия Ккурккуллал школалул дуклаки оьрчIру.
КIулшиву дулаврил управлениялул каялувчиналгу, учительтуралгу бувсса ихтилатиртталгу жям дуллай, райондалул бакIчинал цIунилгу барчаллагь увкуна кIулшиву дулаврил зузалтрахь.
«Дурмурнияр данмур ттигу чIярусса дур жучIара. ХьхьичIва-хьхьичI жунма багьлай бур оьрчIру, школа къуртал бувну, жучIатува лавгун махъ цайнува цивппасса оьр­мулийн хIадур буллан, ми заманалул къуркъабацIурдал лахIан къабулланшиврул, жяматрал оьр­мулуву цанмасса кIану лякъин вардиш буллан», – увкуна Юсуп МахIаммадовлул.