Уттигъанну бакьин буллан бивкIунни Къяннал шяравату Вихьлив бияннинсса ххуллу. Вай давурттив дуллай бур Ккуллал райондалийсса ххуллурдал ялув бавцIусса идара. Вай дуллалисса давурттая цIуххин, на хьунаавкьуссияв ва идаралул хъунама ТIутIилаев Аьвдулхаликь МахIаммадрамазановичлущал.
— Вай давурттив дуллан жул идаралийн тапшур дурссар, вай дуллансса бяст-ччал баян бувавриву жул идара ххув хьуну тIий. Хъювхъиял ва Къяннал шяраваллавун нанисса ххуллул кIибачIулия Къянив бияннин бакьин бувсса ххуллучIату Вихьлив дияннин дур 4 километра. Проектрайн бувну дур 3 километра. Мунийн бувну, 4-мур километрагу дузал дуван багьанссар. Ва даву дуван итадаркьуну дур 6 миллион арцул. Ххуллул утташиву дикIантIиссар 4,5 км. Ххуллул чулиннай щин нанисса кIанттурдай бетондалул бургъурду бишинтIиссар. Ххуллул лахъишиврийх бикIантIиссар ххуллу зия къахьуншиврул щин дачин дувансса куртI бакъасса каналлу. Ххуллу дузал бувайхту, аьркинний бацIан бувантIиссар бетондалул тталлу. Гьавалул тагьарданул битарча, вай давурттив ноябрьданул ахирданийннин къуртал дуванмур буванну. Укунсса давурттив дулланшиврул баян бувайсса бяст-ччаллаву жул кунна чансса механизмарду дусса идарарттан ххув хьун захIматну бикIай. Му захIматшивугу дархIуну дикIай давурттив дайдишиннин банкирал жул экономикалул хIалкьазия ккаккан буллалисса чагъарду тIалав буваврицIун, ца миллиондалийн дирсса арцу заминналун банкирай дишин багьлан бикIавриву. Шикку, жучIа давуртту дувансса техника духьурчагу, миксса арцу счетрай дакъашиву дахчилан дикIай. Арцу дакъашиву хъанан бикIай ганиннин дурсса давурттах цила чIумал заказчикнал арцу жул счетрай къадичаврил сававну.
Ва ххуллу буллай зий дур 1 погрузчик, 1 экскаватор, 3 самосвал, 2 бульдозер, 1 грейдер.
