Итни кьини Лакрал райондалий Аьрасатнал МВД-лул «Лакский» МО-лий ва райондалул администрациялий хьунни цIусса каялувчи жяматращал кIул уллалисса батIавуртту. Миннуй гьуртту хьунни райондалул бакIчи Юсуп МахIаммадов, райондалул идарарттал каялувчитал ва зузалт, администрациялул зузалт.

Ва иширал ялув МахIач­къа­лалия увкIун ия Лакрал райондалий низам дуруччаврил органнал даврил ялув авцIусса виваллил иширттал къуллугърал полковник Арамис Бегов.
Ва кьини дурусну шанна шин хьуссар Аьрасатнал МВД-лул «Лакский» МО-лул каялувчину МахIмудов Марат ЯхIиянал арс зий.
Цалва ихтилатраву Арамис Беговлул кIицI лавгуна Марат МахIмудовлун захIматсса шар­тIирдаву зун багьшиву. Цалчин, каялувчину авцIуну барзру чIарах букканнин, цува райондалий­сса тагьарданущалвагу кIул хьуннин оьсса оьзру ялун бившиву – полицанал отделданул ряха язи­сса зузала экстремистурал каруннища ливтIушиву. КIилчингу, ми ливтIуминнах луглагисса жапасса тагьардануву, кIирагу районнал отделлугу цачIун дуллай, отделданул цIусса къатравун бизлай даву хьхьарчуну бивкIшиву.
«Амма чIал къавхьуну, Марат ЯхIияевичлул каялувшиндаралу, отделданул зузалтрал бат бувссар вай бакъасса, хьхьичIвагу низам дуруччай органнал зузалт ливтIусса шама къачагъ, вайннан кумаг буллай бивкIсса ацIниясса инсанталгу бувгьуну, багьайсса танмихI кьувкьуссар. МарцI дурссар кIирагу район паччахIлугърайн къаршисса къачагътурал чул бувгьуминнацIа», — увкуна Арамис Беговлул.
Ванал увкумунил ялун Юсуп МахIаммадовлулгу ххи бувна Марат МахIмудов бюхъу-бажар бусса, зузалтрая ххишаласса тIалавшинна дусса каялувчи ушиврийну бювхъушиву шанна шинал дянив райондалий хьусса хъунисса лагрулул мероприятияртту низам къалирну, цила кьаралданий дан. Райондалул администрациялул чулуха дуллуна ХIурматрал грамота.
Райондалул бакIчинал хъиривчу Юсуп Рамазанов, прокурор Светозар Оьмаров, КIулшиву дулаврил управлениялул каялувчи Явсупи ХIамзаев, кIанттул бувчIавурттал комиссиялул хъунама Илияс ХIажиев, счетная палаталул хъунама ХIусайн Куччаев, Гъумучиял лицейрал директор МахIаммад Хъунбуттаев барчаллагьрай бия Марат МахIмудовлуйн цалла дуллалисса гьарцагу даврил чIарав ацIаврихлу. КIицI лаглай бия Марат ЯхIияевич халкьунначIан гъан­сса, инсаннан кумаг бан, чIарав ацIан хьхьичIунсса каялувчи ивкIшиву. Къуллугърал бурж биттур буллай, ливтIусса полицанал зузалтрал оьрчIахсса къалагъас чан къадуршиву.
ТIайламур бусан, чIявусса бия ва райондалия нанаврия яхI гъавгъсса. ХIакьинусса заманнай агьалинал чулухасса хIурмат ва бусравшиву хIалал дан бигьа бакъар, хаснува полицанал зузалтран, Марат ЯхIияевич тIурча агьалинан бусравну ия цува дакI тIиртIусса, аьчух­сса, пахру-ххара бакъасса, жяматраву авкьусса ушивруцIун. Ва дяркъусса, ххуллурдайх микI-чIикI дусса кьини шяраваллавагума, карчI къадурну, бувкIун бия ванахь барчаллагь учин.
Къуллугъчинал бурж лажин кIялану, халкьуннан бусравну уккавур. Марат МахIмудовлуща бювхъунни мукун уккан, агьалинаву хъинсса цIа кьадиртун гьан.
ЦIуну ивтсса жагьилсса каялувчи, полицанал подполковник Амиров Юсуп Рамазановичлунгу цинявппа чIа тIий бия бигьа да­къасса давриву тIайлабацIу.
Арамис Беговлул бусласи­мунийн бувну, ваналгу цалва захI­матрал ххуллу байбивхьуну бур укунасса милицанал даврия. Цалла ларайсса пишакаршиврийну, къуллугърайн дакI тIайлашиврийну ччясса мутталий лахъ хьуну ур. Зий ивкIун ур Ханты-Мансийскалив, «Лакский» МО-лул каялувчину итаннин зий ивкIун ур лап жапа­сса къуллугърай – Хасавюрт шагьрулул экстремизмалийн ва терроризмалийн къаршисса центрданул каялувчину.