ЦIуссалакрал райондалул ОьрчIал ва мюрщи жагьилтурал спортрал школалул (ДЮСШ) выпускниктал хIакьину къуллугъ буллай бур райондалул, Дагъусттаннал ва Аьрасатнал гужирдал структурардаву – полициялул, ФСБ-лул органнаву, МЧС-рай, аьралуннаву ва цаймигу системардаву.
Вай органнавун цукунсса-унугу инсан кьамул къаайшиву кIулну, хъуннасса ххаришиву дикIай цIуссалакрал жяматран цала выпускниктурая. Хъиннура ххаришиву дикIай ми, цала къуллугърай бакъасса, спортравугу хьхьичIунну, бюхъу-бажар буну бушиврия. Къуллугърал захIматшиврух ва диял къахъанахъисса чIумух къабурувгун, вай мудан спортзалданувун бувкIун, цала ялув зий бур, хIадур хъанай бур личIи-личIисса соревнованиярттайн.
Ва ххуллух ЦIуссалакрал виваллил иширттал отделданул зузалт гьуртту хьунни МВД-лул зузалтрал дянивсса самболул Дагъусттаннал чемпионатрай. Региондалийсса тагьар бигьасса дакъашиврийн бувну, соревнованиярттай щала командалуща гьуртту хьун къабювхъунни. Гьуртту хьуминнава полициялул зузала Далгатов Шаматилавл 90 килорал кIушиву дусса 16 инсаннава 3-сса кIану бувгьунни.
Шаматилав чIивинияцIава спортрахун агьсса жагьил ур. ЦIубутIуй ва занай ивкIун ур закканттай буккаврил секциялийн, тренер Айданов НурмахIаммад МуртузалиевичлучIан. Яла занан ивкIун ур дзюдорал секциялийн. Ва секциялуву ва хIадур уллай бивкIун бур Муслимов Герман ва Алимов Сергей. Шаматилав гьуртту шайсса ивкIун ур республикалул, региондалул (СКФО) ва щалагу Аьрасатнал дзюдорал, самболул, каруннай бияврил соревнованиярттай, бугьайсса бивкIун бур хьхьичIунсса кIанттурду. Шаматилав уттиния тихунайгу соревнованиярттай гьуртту хъанансса, ванияргу бюхттулсса шачIанттайн лахъансса пикрилий ур.
ХIадур бувссар
А. Аьбдуллаевал
