МахIачкъалалив, «Дагестан» РИА-лул редакциялий, сентябрьданул 29-нний хьунни Къизлардал шагьрулун 280 шин шаврин хас дурсса хIадуршиннардая бусласисса пресс-конференция.
Имара Саидова
Шикку гьуртту хьунни ДР-лул ХIукуматрал Председательнал хъиривчу МахIаммад Исяев, Республикалул Халкьуннал Мажлисрал аграр политикалул комитетрал председатель ЖахIпарбаг Шамхалов.
МахIаммад Исяевлул бувсунни ДР-лул Президентнал 2014 шинал ноябрь зуруй хIукму бувну бивкIшиву Къизлардал шагьрулул юбилей кIицI лагансса ва юбилейрайнсса хIадуршиннарду дуллалисса комитетравун цувагу ухлахишиву.
— Шагьрулул юбилей кIицI лагансса хIукму бувния шихунмай бацIаву дакъа зий буссар сакиншиндарал комитет. Къизлар – му тарихрал шагьрур, республикалул каялувчитурал мунил чулухуннай мудангу хъуннасса къулагъас дуллай буссар. 1730 шинал бивзссар Къизлардал шагьрулул гьану, цуппагу таний бухлай бивкIссар Аьшттарханнал губерниялувун, — увкунни МахIаммад Исяевлул.
Мунал бувсунни Къизлардал шагьрулул юбилейрайн хIадур хъанай дуллалисса давурттавух цалчин цIу буккан бувшиву шагьрулувун бухлахинисса нигьачIийсса тагьарданийсса ламу. Мукунма Къизлардай чIирисса чIумул мутталий бувну, зузи бувну бушиву агьалинан чIярусса къулайшиннарду дусса МФЦ.
— ХIакьинусса кьини, шагьрулул юбилей лавайсса даражалий тIайла дукканшиврул, цащава бюхъаймур буллай, хIала бувххун зий бур Къизлардал шагьрулул ишбажаранчитал ва укунмасса агьали. Шагьрулул юбилейран хас дурсса агьамми мероприятиярттугу дайдишинтIиссар октябрь зурул 3-нний. Хъамаллуран ва Къизлардал шагьрулул агьалинан хIадур дурну дуссар ххаллилсса шадлугъ, — увкунни МахIаммад Исяевлул.
ЖахIпарбаг Шамхаловлул бувсунни цува 18 шинай ялапар хъанай ивкIшиву Къизлардал шагьрулий, мунихлуну хъинну ххуйну кIулшиву цанма Къизлардал районгу, шагьругу, микку ялапар хъанахъисса агьалигу.
— Къизлар ялу-ялун хьхьичIунмай хъанай, цIу-цIусса объектру дуллай, чIаланну баххана хъанай бур. Вана гьашину шикку цIуну бувну, зузи бувну буссар бизнес-инкубатор, къуртал давай дуссар стадион цIу буккан буллалисса давуртту. Шиккур тIайла дуккантIисса шагьрулул юбилейран хас дурсса агьамми мероприятиярттугу. Мукунна къуртал давай дуссар 5-мур школа гьарта-гьарза баву мурадрай дуллай бивкIсса къатри.
Къизлар хъанахъиссар ухссавнил Дагъусттаннал хъуншагьру. Шикку ялапар хъанай буссар чIявусса миллатирттал агьали, цивппагу кувннал чIарав кув бацIайсса, хъамаллурал хIурмат бан кIулсса, яла ххаллилми хасиятру дусса. Къизлардал шагьрулул юбилей хIадур дуллалийни, хъунмасса кумаг бунни Къизлардал коньякру дувайсса комбинатрал, «Кизлярагрокомплексрал», Къизлардал электромеханикалул заводрал, — увкунни ЖахIпарбаг Шамхаловлул.
МахIаммад Исяевлул кIицI лавгунни Къизлардал агьали чялишсса гьурттушинна дуллай, хIала бувххун бушиву шагьрулул юбилей лайкьну кIицI лаган.
Ихтилатирттая махъ юбилейрал сакиншиндарал комитетрал хъуниминнал журналистурал буллусса суаллахьхьун дуллунни жавабру.
