Февраль зурул 15-нний совет аьралуннал махъа-махъсса саллатI Авгъаннава шавайн увкIсса кьини хъанай дур. Яла махъ ва кьини байрандалийн кIура дарунни. Жува миннайн «афгантал» учару. Га дяъвилувух гьуртту хьуссар лакрал жагьилталгу. ЧIявуссаннал жанну дуллуссар, ми жунма тачIавгу дакIния къагьантIиссар.
Ккуллал райондалул Ваччавсса чIунлахъиялул центрданул ца къатлувун бавтIун бия Авгъанисттаннал дяъвилий гьуртту хьусса 2-мур ЦIувкIуллал шяравасса аьрали подполковник Маммаев ХIусбан, Хъусращиял шяравасса Закарияев МахIаммадхIажи. Вайннащал хьунабакьин бувкIун бия райондалул администрациялул вивсса политикалул отделданул каялувчи Хизриев Шамххал, культуралул зузалт, Ваччиял школалул дуклаки оьрчIру, райондалул Ветерантурал советрал председатель Загьидиев Аьбдул. УвкIун ия хьунабакьавриву гьуртту хьун, мукуна, Лакрал ва Ккуллал районнал цачIусса военкоматрал зузала, хъунама прапорщик Юсупов Ажув.
Хьунабакьаву тIиртIуна Хизриев Шамххаллул. Махъру лавхъуна Маммаев ХIусбаннул, Закарияев МахIаммадхIажинал, Загьидиев Аьбдуллул, Юсупов Ажувлул ва цала Хизриев Шамххаллул. Ваччиял школалул оьрчIал ккаккан дурна цукунсса захIматшивуртту ккаркссарив жула чиваркIуннан. Дурккуна оьрчIал ххуй-ххуйсса, ватан ххирану дикIаврин хас дурсса дикломацияртту, шеърирду. Балайрду увкуна культуралул зузалтрал: Кьурбанов ХIабибуллагьлул, МахIаммадова Асиятлул, Рамазанова Гулжагьрал, СалихIова Шавлухълул. Хьунабакьаврил ахирданий дурна саллатIнал къавтIавугу.
Къахьуннав чувчIаввагу дяъвирду.
