Аьрасатнал Федерациялул хIукмулийн бувну, 2011-ку шинал июнь зурул 10-нния шиннай зий дусса дур «Федеральная информационная адресная система» тIисса программа. Мунил тIалавшинна дур Аьрасатнавусса шагьрурдал, шяраваллал кIанттал сакиншиннарду буржлувну душиву къатта-къушлил, идарарттал, цайми объектирттал номерду интернетрал кумаграйну кIицI дурсса программалувун ласун.Ва программалул операторталну ккаккан бувну бур Федерациялул Налогирттал къуллугъ (ФНС). Программалуву сияхIрайн лавсъсса адресирттай яхъанахъиминнал ва шиккусса объектирттал заллухъруннал ихтиярду дуруччаврилми масъалартту биттур буллан ккаккан дурну дур Аьрасатнал Федерациялул Финансирттал министерство.

ХIажимурад ХIусайнов
Най бунува кIицI буван ччива инсантуран ва иширая, хайр бакъа, цукунчIавсса зарал бакъашиву. Циван учирча, сияхIирттайсса къатта-къушлил, объектирттал заллухъруннал цIа-бакI къадикIантIиссар. Аьрасатнал Конституциялийн бувну таксса инсаннал оьрму ашкара бул­­лан къабучIиссар, га дуруччин аьркинсса кьюлтIшиврун хIисав бувайссар. ЦIа-бакI дусса чичрурду дикIайссар аьркинначIа, гайннахьгу ихтияр дакъассар, цала давриву ишла дуварча дакъа, гай ашкара дуллан.
Ккуллал район зунттал кIан­ттай душиврийн бувну, шикку интернет ххуйну зун къадикIай. Ва ишираву шяраваллал администрациярттан захIмат хъанай бия кIицI дурсса программалул масъалартту щаллу буван. Мунийн бувну Ккуллал райондалул администрациялул Ваччавсса цала совещанияртту дувайсса залдануву шяраваллал администрациярттал зузалтран хIасул бувунни ххуйну интернет зузисса кIантту.
Декабрь зурул 8-нний ва программалия бусан, ссан аьркинссарив бувчIин буван увкIун ия Лакрал ва Ккуллал цачIусса прокурорнал хъиривма МухIадов Саэд. «Цукунсса духьурчагу, хъуслил заллу икIан багьлагьи­ссар. Заллу махъ усса чIумал, гай цала хъус душиврул чагъарду бухьурча, залуннаща шайссар цала ихтиярду жущал, прокуратуралул зузалтращал, дуруччин. ЦIана инсантуран аьркинсса чагъарду щаллу буллай бур интернет­рал порталлайсса программарттайну. Миккугу инсантал яхъа­нахъисса кIичIирттал номердащалсса сияхI дикIан багьлай бур. Мукунма инсантурал аьркинлугъру биттур дуллан тIивтIуну бур МФЦ тIисса идарартту. ВайнначIагу дикIан багьлай бур инсаннал къатта-къушлил, ужагъраву думунил сияхI. Му чIумал аьркин­сса чагъардугу бигьану, шава щяивкIун, интернетравухчIин дузал буван бюхълай бур, идарарттал бухкIуллайх къазанайна. Мюрщи оьрчIру оьрчIал багъравун занази буваншиврул шивува очерданий ацIан бюхълай бур. Мукунма оьрмулуву аьркин шайсса циняв масъалартту интернетравусса программарттайну дузал буван хъанахъи­ссар», — куна МухIадов Саэдлул. Дуллуна мукунна суаллахьхьун­сса жавабругу.