Аьрасатнал билаятрай махъсса шиннардий май зурул 15-нний кIицI лагай Кулпатрал кьинилул байран. Му агьамсса кьинилун хас дурсса байрандалул шадлугъру хьунни ЦIуссалакрал райондалийгу.
Гьарица шинал ЦIуссалакрал райондалул КЦСОН-лий ва байран дувай чIявусса оьрчIру бусса кулпатирттайнгу оьвкуну.
Байрандалул агьаммур мурадгу кулпатирттаву хьунабакьлакьисса масъалартту щаллу бан кумаг баву, чIарав бацIаву дур.
Кулпатрал кьинилущал барча буван оьвкуну бия 3 ва ххишаласса оьрчIру бусса кулпатирттайн. Ва кьини КЦСОН-далийн бувкIун бия Хункерова Яхмат, Церибецева ТIавус, ХIасанбагова Куржан, ХIусайнова Савдат, Усттаева Жарият, Мусаева Аминат, Жавтаева Малика. Шиккун бувкIсса хъамал хьунагубавкьуну, миннахь оьрчIру хъуни буллай буллалисса захIматрахлу барчаллагь тIутIисса ихтилат бувна ХIаммадаева Лейлал.
— Кулпатрал кьини – му жулва оьрмулул бивзсса гьанур, бавкьусса, цIакьсса кулпатирттахьри жулва чаннасса ва ххарисса бучIантIимургу бусса. Гьарцагу кулпатран чIа тIий бура талихI, тирхханну, нахIу-хIалимшиву, буллугъшиву ва цIуллушиву. Зул кулпатирттаву тачIав чан къахьуннав мюрщултрал хъяхъисса чIурду, бишиннав цинявннал оьрмурдай барачат, — увкунни КЦСОН-далул хъунмур Малика Жамхатовал.
Ахирданий дукралул ссупралух щябивкIсса хъамаллуран ккаккан дунни концерт ва дуллунни дакIний личIансса бахшишру.
Шиккун бувкIсса ниттихъал барчаллагь увкунни цанна ва байран хIадур дурсса, цахра мудан хъуннасса аякьа дуллалисса КЦСОН-далул зузалтрахь.
